齊齊踏入30歲!AGA同Gin Lee當人生新開始
曾兩度合唱大熱歌曲的歌手Gin Lee(李幸倪)和AGA(江海迦)趁新年彼此向對方送上祝福,搞鬼的Gin話要祝AGA不勞而獲,而AGA則祝Gin紅館個唱:「唔使操都咁Fit!」言談間盡顯二人老友鬼鬼一面。問到如何度過新年?Gin就說必定要回馬來西亞「撈起」,寓意新一年風生水起:「通常就喺原位撈到啲嘢食好高、跟住跌落嚟,一路做呢個動作嘅時候一路講啲吉祥說話,通常我都係隨心諗到啲乜就講乜,撈得越高自己個願望實現嘅機會就越大。」出名廿四孝的她表示其後會和家人到澳洲旅行,自己就算再忙都會一手包辦及計劃行程:「就算Plan行程係好攰,但係爸爸媽媽為我哋付出咗咁多,到依家我有呢個能力帶佢哋去旅行,係我應該要做嘅嘢,唔可以厭惡同覺得煩,應該係覺得開心。
細個被家姐呃利是錢
而自認廚藝有待改進的AGA就說會幫家人準備蘿蔔糕:「佢哋會安排一啲好安全嘅位置畀我,例如切吓嘢咁,(切嘢都安全?)係佢哋安全嘛!因為我知道自己煮嘢食方面有待改進,所以我閒時都唔會煮嘢食,只要唔煮就冇事,所以我係唔會畀佢哋有機會話我係地獄廚神!」AGA又大爆自己幼時曾被家姐騙去利是錢的趣事:「我屋企有三姊妹,我係最細嗰個,細細個可能因為天真,我啲家姐會攞啲垃圾嚟賣畀我,我就會好年少無知咁畀晒啲利是錢佢哋。例如佢哋會賣啲過期嘅糖畀我,又會呃我話畀一本魔術秘笈我,到第二日先發現只係出面派嘅傳單。大大吓我媽咪發現咗,之後就開始幫我Keep住啲錢,至少媽咪會買啲冇過期嘅糖畀我食,哈哈!」
唔介意年齡
兩位唱得之人今年齊齊踏入3字頭,怕不怕被標籤成中女?兩位鬼妹仔均表現得相當豁達,Gin笑說:「其實我基本上喺25歲之後就已經冇再計自己幾多歲,就當自己年年25歲喇!可能細個嘅時候會比較介意,依家已經唔會,屋企人可能都知我事業心重,反而會叫我唔好咁快,專心做嘢先。」AGA亦表示認同:「尤其係入咗呢一行之後覺得時間過得特別快,等到做完晒啲嘢發現又係時候收爐喇,咁又過咗一年。與其話係關口,不如話係一個New Start。」AGA又透露今年會首次參與「饑饉30」,作為30歲時的一個挑戰:「我上年經歷咗好多事情,亦都了解到呢個世界上有好多需要幫助嘅人,好多事情發生緊,但係我哋自己嘅生活太過忙碌,好似生活咗喺一個Bubble裏面。今年受到邀請,我真係好想去嘗試,我好有信心可以完成,因為我係一個好有意志力嘅人。」
新一年繼續拼搏
至於新年目標,Gin除了積極操弗準備6月的紅館個唱外,亦計劃推出首張國語專輯,而AGA除了出新碟和在香港開騷外,同時也忙於內地巡唱,齊齊繼續為事業拼搏!
http://hk.on.cc/hk/bkn/cnt/entertainment/20180219/bkn-20180219220010506-0219_00862_001.html
討論重點:
* Gin Gin 疑似會一年兩碟
* 留意片入面兩個人既神情,期待某會員再次解讀 Gin 同 Aga 既內心戲
|