返回列表 發帖

小企鵝樂評:The Album (part one)

本帖最後由 PenguinMusic 於 2019-4-8 22:23 編輯

The Album (part one)
試聽+短評



聽前感
過去幾個月都聽過董折(麥浚龍)、浦銘心(謝安琪)、藍定凌(古天樂)各自對呢段感情嘅表述,結果今日啱啱就出咗《The Album》嘅第一輯。第一次聽到呢隻碟會用EP方式出(後按:呢方面可能搞錯咗,因為網上唔少資料都話佢係大碟而唔係EP)都有啲失望,不過冷靜落嚟諗下其實都叫合理:而家由董折講前半段、浦銘心講後半段,都叫做有條故事線喺度,更何況今時今日EP同Album(大碟)嘅差異都愈來愈模糊(佢名又叫「the album」吖),而一隻碟出十幾廿隻歌的確又長咗啲,所以恁做應該都唔單止係商業考量嘅(想知有幾商業不妨睇睇Juno今日出嗰條宣傳片

至於故事線,我一直都認同佢哋喺呢方面做得好好,有故事性之餘首歌又襯托到,文案中更包含少量隱喻,認真厲害。事不宜遲,立即開始聽!
勇悍·17 - 麥浚龍(董折)文案

一開始出現咗代表青春嘅木結他聲,配上麥浚龍把滄桑嘅聲,正正配合咗董折呢個角色。呢首歌就恁聽就好似普通嘅青春情歌,但係睇真啲歌詞就唔難發現成件事唔係咁簡單,而係董折年少時對愛情嘅睇法同憧憬。呢個時候,董折似乎對愛情諗得好美好,重巴不得要快啲同情人結婚,以免隨時隨地都可以發生嘅大災難會將兩人分開。一首十分清新嘅作品。
困獸·28 - 麥浚龍(董折)文案

歌詞第一句就用咗「不只心跳冒汗」嚟對應《勇悍·17》,除咗係一個故事嘅連結,更加係一個諷刺。呢首歌入面嘅董折好明顯已經冇咗以前美好嘅愛情觀,而係變成後悔、無奈。同之前嗰首比較,呢首好明顯十分急促,歌詞快之餘唱功亦不能少,證明董折當時嘅勞碌、心繁紊亂。十分引人入勝。
暴烈·34 - 麥浚龍(董折)文案

首歌用咗鋼琴聲作配樂,一嚟就出現份恐怖感覺;又用咗「誰比誰應難過」嚟對應《困獸·28》,再次用咗呢個手法,表達對自己嘅過去一次又一次嘅反悔。呢首歌明顯比之前兩首歌激烈、沈重,高音位都十分考技術,論難度一定高過一直俾人話「難唱」嘅《17》同《28》。除咗曲,詞都十分強硬,難怪叫「暴烈」,原來愛情已經轉化成「家暴」,我鬧你一句、你摑我一巴,一聽就知兩人嘅關係比起上一首歌已經惡化咗唔少。耐人尋味。
一個女人和浴室 - 謝安琪(浦銘心)文案

角度由董折轉至浦銘心。歌一開頭就只剩低浦銘心一個人喺浴室入面嘆世界,唔難估計兩個人應該係因為上一首歌嘅家暴搞到散哂。令人驚訝,浦銘心並無後悔,反而係「享受」緊呢份寧靜,而曲風上已經好容易反映到呢一點。估計浦銘心係想以寧靜假象掩蓋同本來嘅另一半鬧翻,嘗試重拾自己。十分有趣。
一個男人、一個女人和浴室 - 謝安琪(浦銘心)、古天樂(藍定凌)文案

就咁聽似乎係《一個女人和浴室》嘅合唱版,不過件事絕對唔會咁簡單。藍定凌作為浦銘心口中嘅新對象,兩個人十分合襯,雖然有些少忍忍讓讓,但係起碼都叫做一段美好嘅愛情。作為全張專輯唯一一首合唱歌,可以睇到兩者都係你情我願,並唔係之前或者之後嘅單向愛情,可謂甜蜜到爆燈。只不過,作為主角,當然希望浦銘心同董折復合啦,做唔做到就要睇董折同藍定凌之後嘅「表現(演)」喇。
人妻的偽術 - 謝安琪(浦銘心)文案

呢首歌當時打響咗謝安琪復出嘅頭炮(總係冇人理《歌聲如初》)。直至《勇悍·17》嘅出現,大家先發現原來呢首歌只係故事線嘅一部份。但係,呢個時候大家都以為「人妻」係講緊董折嘅老婆,但係以專輯排列方式睇,似乎係講緊「藍定凌嘅老婆」呢個身分多啲。呢個講法啱唔啱就有待揭曉嘞。
沐春風 - 謝安琪(浦銘心)文案

有Juno曲風嘅Kay歌,喺呢度出現。首歌開頭用咗象徵青春嘅木結他聲,可能代表浦銘心心理上嘅「囬春」。從歌詞最後兩句可以睇得出浦銘心當時大概已經四、五十歲。呢個時候嘅浦銘心對住「完美男伴」藍定凌居然覺得悶,同時舊時嘅回憶都一湧而上,令佢想有啲改變。有乜改變,就要等下回分解嘞。
聽後感
十分精彩。一段(半段?)跨越半生愛情故事,僅僅用七首歌就可以講完,配合文案,成個氣氛營造得好好,直頭可以令成個人代入落個故事入面。講好聽,一定係㗎嘞;講故事,亦表現得十分出色,使人有十分深刻嘅印象,緊張嘅故事又會令人有興趣繼續追落去。無論如何,今次出嘅故事只有「part one」,好明顯仍然有唔少謎團同問題係未解決到嘅。再搵答案,就要等到下一張專輯嘅歌出嘅時候再睇喇。個人都希望呢個愛情故事會繼續不斷延續!

~PenguinMusic :)
附件: 您需要登錄才可以下載或查看附件。沒有帳號?註冊
1

評分人數

  • Tonlo

小企鵝推介流行榜.2023Q1季度推介.敬請期待

我覺得個track list排得啱喔

TOP

人妻的偽術係「藍定凌嘅老婆」呢個身分
903訪問有講

TOP

好想快d 睇埋暴裂同春風兩首mv

題外話 其實可以考慮中間加d interlude既間場黎再分得細緻d 更加有layering
同埋如果加埋mv and mv花絮落隻part one 度 我唸成個partone 會 present得好d
anyway partone已買

TOP

我覺得個track list排得啱喔
小伙子. 發表於 2018-12-13 00:18
啱呀
個排序已經講到好多嘢

人妻的偽術係「藍定凌嘅老婆」呢個身分
903訪問有講
hehehaha 發表於 2018-12-13 01:09
今日節目講?

好想快d 睇埋暴裂同春風兩首mv

題外話 其實可以考慮中間加d interlude既間場黎再分得細緻d 更加有layerin ...
add 發表於 2018-12-13 09:35
同意
另外亦都想睇下《34》live
小企鵝推介流行榜.2023Q1季度推介.敬請期待

TOP

人妻的偽術係「藍定凌嘅老婆」呢個身分
903訪問有講
hehehaha 發表於 2018-12-13 01:09



其實出《勇悍17》時已經講咗

TOP


其實出《勇悍17》時已經講咗
SPD 發表於 2018-12-13 14:39
即係嗰陣已經有藍定凌呢個角色?
小企鵝推介流行榜.2023Q1季度推介.敬請期待

TOP

即係嗰陣已經有藍定凌呢個角色?
PenguinMusic 發表於 2018-12-13 14:49




嗰陣好似都已經 plan 定咗啲情夫/情婦

TOP

呢隻碟真係不得了
每首歌作為單曲嚟聽都好正
探討既內容亦都冇人做過
作為專輯更加係不可多得既佳作
只係稍嫌太短
認同其實加幾首interlude會好好多
同時我諗緊其實寂寞應該係同董折未離婚之前?
唔明點解唔入呢隻碟

TOP


嗰陣好似都已經 plan 定咗啲情夫/情婦
just11256 發表於 2018-12-13 18:05
原來如此
呢隻碟真係不得了
每首歌作為單曲嚟聽都好正
探討既內容亦都冇人做過
作為專輯更加係不可多得既佳作
只係稍 ...
aussie2013 發表於 2018-12-13 19:09
同意
加兩三隻interlude/instrumental變做真.Album重得
小企鵝推介流行榜.2023Q1季度推介.敬請期待

TOP

其實Juno 玩概念可以,但影像品味都頗單調,唱歌就專挑戰高難度,實在吃力不討好

TOP

無唱功可言而有錢既丹麥浚龍,只能靠玩gimmick
啲碟既設計永遠奇奇怪怪,addendum爛石頭,evil is a point of view就抹地布,the album part one就穿窿書,凡人唔識既藝術,
自己唔識唱歌,就搵班女人黎做膽,由第三身何詩打後不停搵女人合唱,
如果唔係有三大詞人幫佢寫詞真係應該冇人會想聽佢啲歌

TOP

無唱功可言而有錢既丹麥浚龍,只能靠玩gimmick
啲碟既設計永遠奇奇怪怪,addendum爛石頭,evil is ...
stephybest 發表於 2018-12-15 02:47



其實咁樣評價佢d projects真係好唔負責任嗰三大填詞人又唔係比Juno包咗
根本全世界都可以搵佢地寫詞
其他人真係敢做藝術性大於市場既作品咩?
Addendum已經係對市場最大既妥協
但都有單魚座睡前服瑕疵呢幾首精品
如果Juno凈係玩gimmick但做出嚟既歌係低質根本唔會有人理

TOP

無唱功可言而有錢既丹麥浚龍,只能靠玩gimmick
啲碟既設計永遠奇奇怪怪,addendum爛石頭,evil is ...
stephybest 發表於 2018-12-15 02:47


係呀,所以我更加要多謝佢,
搵三大填詞人同一眾音樂班底,
一直以黎做左好多唔同題材 曲風既歌曲,
多謝佢仲肯繼續花成本花心思,
係內容、包裝,你所講既gimmick上。

TOP

無唱功可言而有錢既丹麥浚龍,只能靠玩gimmick
啲碟既設計永遠奇奇怪怪,addendum爛石頭,evil is ...
stephybest 發表於 2018-12-15 02:47


唱功係弱點認同 不過倒翻轉 有唱功冇音樂性=星夢tvb
正所謂鹹魚白菜各有喜愛

TOP

返回列表