Apple 報導馬明回應全文:
其實呢件事我知道咗之後,我好快已經冇咗嬲呢個感覺,我係好平靜,我係好快變成擔心,我好擔心牽涉到呢件事嘅所有人,任何一個受到傷害我都係唔希望。
我唯一可以代表佢(心穎)講少少嘢,其實我知佢都知自己做錯,我都知佢好想出嚟同大家講,但公司驚佢情緒唔穩定,會講錯嘢,所以就冇安排佢出嚟同大家講,我知道佢啱啱出咗IG,佢要講都講咗,佢仲好年輕,未來仲有好多路要行,我希望大家畀個空間佢。
至於我呢,大家唔需要擔心,我會繼續專心工作,我繼續拍好我嘅戲,我仲開緊工,我唔希望影響到呢套戲嘅進度。
其實安仔自己都講咗嘢,咁安仔講咗我就唔會發表任何意見,因為我覺得呢個世界除咗安仔老婆之外,其實大家都冇資格可以發言,所以我盡快平息咗佢,就算喇。
我最後想交代嘅就係,我知道有啲媒體會訪問我屋企人,我希望大家高抬貴手。無論我媽咪又好Daddy又好,都唔係呢個圈嘅人。你知大家咁多位記者朋友技巧好高,我媽咪突然被咁多支咪『隊』埋去呢,佢係會驚嘅,佢可能會講錯咗嘢,我希望唔好將我媽咪講嘅說話放大,我亦都唔會就佢講嘅任何一句說話回應,我只係希望大家唔好嚇親我屋企人。
其實都冇乜再需要交代,我要講嘅係咁多,希望唔好將件事繼續發酵,唔好再令更多人受傷害,呢件事平息咗佢,盡快過咗就算喇。」 |