宮雪花嬲亞視唔俾冠軍佢：呢個歲數有邊個好得過我

本帖最後由 matthew1990 於 2016-3-31 19:57 編輯

今日葉家寶為佢本新書《有緣再會》舉行發佈會，就連自稱係「最靚亞姐」嘅花姨宮雪花都有嚟！

佢未開始接受訪問已經大嗌委屈，咩事咁委屈？佢就搞爛gag話：「我以為4月1號之後咩都冇得睇，剩係可以睇我，因為得雪花係上面！」真係要啪啪啪...俾啲反應花姨毛得。

之後花姨仲話有其他委屈，話上網睇到有報道，話佢同亞視老闆傳緋聞，現場記者即時問佢邊個老闆？佢即刻大大聲反問：「邊個老闆呀，叫佢出嚟，我搵律師告佢，我廿年嚟第一次聽到宮雪花傳緋聞，個緋聞仲要係亞視老闆！」問到佢個老闆叫咩名，花姨就話報道冇點名。不過花姨就好激同話佢冇過老闆、員工、女人、男人有緋聞，點解要係亞視老闆喎。

花姨仲未呻完，又話個報道屈佢自稱同趙薇外公拍過拖，花姨仲發誓佢冇講過，佢嬲嬲豬咁話：「屈我話我做新聞，話我自稱同亞視老闆拍拖，點解要話我自稱同趙薇外公拍過拖，我係啲咁嘅人咩，你哋識我我唔係啲咁嘅人，點解你唔講我係最高收視亞姐，點解唔講我係亞姐最高學歷呢？點解每次都講負面嘅嘢，同埋莫名奇妙、莫須有嘅嘢。」

花姨又話自己出過幾本書，第一本書出咗38萬冊，而報道話佢做新聞，周圍同人講佢出書，花姨又好激動喇：「你估書店傻o架，你要出就畀你出書呀？冇市場會幫你出書呀？係咩新聞嚟？我啲朋友都話我廿年委屈都受咗啦！何必最後一日要咁勞氣。」

問到佢係咪識趙薇外公，花姨話：「上海人只識上海人，外地嘅人唔識嘅！我點解要識外地嘅人」記者仲問花姨係邊間傳媒咁衰，佢就話係香港嘅，不過邊間就唔講喎！

到呢度佢仲話有一件事好嬲，就係亞視頒咗個「最受傳媒關注亞姐」嘅獎佢，花姨話：「我唔係應該冠軍係o架咩，有邊個冠軍好得過我，你話嘞有呢個歲數有邊個好得過我，你行出嚟同我比呀！喺呢件事亞洲電視係對我唔住o架！我幫你創作咁多高收視，個個老闆都話我係中、港最出名亞姐，點解唔比冠軍我？」問到佢點解當時唔提出？佢就話：「當時我老實嘛，啱啱喺屋企行出嚟嘛！喺今時今日我一定走咗去唔撈，我即刻去無綫，走喇！所以呢件事，今時今日我真係要講，因為我覺得我係冠軍之中嘅冠軍！」最後花姨仲好似未講夠咁，話自己係最真實嘅亞姐，唔講關係嘅亞姐.....喎！

[其他分享] (零難度) 如何自行製作伴奏音樂
http://www.cmusichart.com/discuz/viewthread.php?tid=22055&page=1&extra=#pid1902279