【多謝民建聯】周浩鼎：成功爭取UA東薈城跨過到暑假
到底是誰活在虛擬世界？到底是誰比較離地？當fb一片廣傳呼籲螢光棒毒害、人人即在fb出status表明呢一世，都唔會玩螢光棒(因為螢光棒遺害都係千秋萬代)嘅時候，你行出街睇下，一街都係螢光綠螢光黃螢光粉紅。
活在網絡世界很離地？咁又離地得過民建聯候任立法會議員周浩鼎？佢日前喺fb直播時，竟然呼籲市民唔好煲蠟，可用光棒代替。螢光棒含化學物，有毒，會污染環境，尊貴的周議員，常識無下限。
周浩鼎(要記住佢係民建聯黨員)今年二月新界東補選期間，尚且信誓旦旦，於論壇上回應方國珊質詢、問佢:「東涌居民話你連UA戲院都搞唔掂！」嗰陣，阿鼎係話： 「你唔知唔好亂講嘢呀」、「跟進咗喇，個戲院會留低！」留低？聽日結業喎！仲要係，如果唔係fb專頁「東涌人」跟進呢單嘢，根本冇人知。
說好的「跟進咗喇，個戲院會留低！」呢？你真係估佢唔到，佢今午去咗UA東薈城門外做fb live！話自己成功爭取UA東薈城延期結業？
「依家同大家匯報一下，今日呢間戲院所有嘅戲飛都係18蚊，理由就係呢間戲院聽日要結業。」
「喺呢度匯報一下，呢個戲院結束咗之後呢，其實喺早期，我哋同呢個東薈城嘅公司，喺呢一個連番商討後，喺兩年之後，即係呢個18或19年呢段時間左右，東薈城二期就會起好，到時就有一間全新戲院將會開將。」
「所以喺呢段時間，我明白到大家喺呢段過渡期，居民未必可以喺東涌呢一度呢，可以睇到戲，不過喺2018年我哋就會見到一個新嘅東薈城會落成，裡面會有一個全新戲院。」
「咁喺呢度亦都同大家匯報一下呢，其實我哋本來同東薈城公司傾吨嘅時候呢，原來都係大概喺幾個月前要結業，但我哋都盡量去爭取，延後幾個月結業嘅日子，最後都能跨過到暑假，喺今日……喺聽日結業。」
接下來嘅時間，周浩鼎繼續侃侃而談，大談民建聯／其本人點樣成功爭取受東薈城二期之興建而受影響的商戶如何「無縫交接」blablabla，成條片長2分46秒，單係「匯報」都講咗五次，一派誠懇，令網民有受高度尊重之感。但，更正番，UA東薈城票價今日仍然係正價，聽日last day先係$18。
但門面嘢做得好睇又如何？今年二月明明話「跟進咗喇，個戲院會留低！」依家呢？「會留低」內裡複雜含意，難道就是「間戲院會拆不過兩年後有番」咁樣樣？咁呢兩年東涌人去邊度睇戲？有冇無縫交接？
禮義廉成日話成功爭取呢樣嗰樣，玩少次言語偽術好唔好？ |
發表於 2016-9-18 09:33
| 
發表於 2016-9-18 11:11
|