上個禮拜出咗創作新碟《Sherman I, Me and Myself》,第一隻主打竟然唔係全碟唯一呢首快歌其實(中板會形容得更貼切)《紮孖辮》,而係最唔Sherman 嘅《這首歌的名字是秘密》。Sherman 近年唔係冇慢歌,上隻碟都有《沉默的對話》,但可以咁放鬆咁甜地唱一隻慢歌,肯定已經係一個突破。
落筆之前,我都猶疑咗一陣揀邊首做今個禮拜嘅 Pick A Chill,最後決定都係揀返呢首《紮孖辮》。講嘅係回憶細個嘅童心同率性,鼓勵現在嘅自己。主題其實都繼承咗過去兩隻EP 嘅作品。鋼琴撞chord 前奏,有份jerald funky味,但原來係老拍檔謝浩文加上黃兆銘嘅手筆,節奏唔算重,但都un 到幾下同夠率性。
我有因為今次呢篇文章溫一次 Sherman近幾年嘅歌,其實自從《SS14》開始,感覺到Sherman 嘅歌係輕手咗,一嚟適合返題材,二嚟亦都容易啲消化,搵到條好嘅歌路。今次《Sherman, I, Me and Myself》,碟名當然話俾大家知,呢個係最真實嘅鍾舒漫。希望Sherman 繼續會有率性、甚至癲喪嘅新作,唔好因為《這首歌的名字是秘密》嘅成功突破,反而令自己多咗計算,行返《給自己的信》嘅舊路,忘記咗最合身嘅爽直。