Cool Music Forum - Powered by Discuz! Board

標題: The Album 三年總結——What is《The Album》？ [打印本頁]

作者: just11256 時間: 2021-1-8 21:46 標題: The Album 三年總結——What is《The Album》？

本帖最後由 just11256 於 2021-1-8 22:32 編輯

麥浚龍嘅《The Album》企劃，經歷咗三年，終於完滿落幕。呢個咁龐大嘅計劃，喺樂迷嘅熱議中開始，亦喺爭議聲中完結，當中嘅評價有讚有彈，難以簡單概括。當中嘅主要論點似乎都水落石出，包括：麥浚龍保持到音樂質素、發掘出謝安琪聲線嘅可能性，又同時將謝安琪歌曲嘅題材變得單一、離地⋯⋯呢篇文章唔旨在重複呢啲論點，亦唔旨在對《The Album》作出全面、透徹嘅評價，而係想開拓四個我較少見到嘅解讀方向，引起大家繼續思考。

重要一提嘅係，《The Album》係一個混合媒體（mixed media）企劃，當中包括音樂、文案、影片、演唱會、週邊商品等等，只評佢嘅音樂似乎有欠公允。但呢度係《只有好音樂》，加上我冇買過任何呢啲產品，我只可以評論歌曲呢方面，所以我亦對宣傳期間任何嘅 IG 帖文（「顛覆樂壇」等等）同花邊傳言置諸不理。順帶一提（唔係重點）：mixed media，喺香港樂壇入面未必係新鮮事，但做得咁徹底、咁多樣，似乎暫時只有麥浚龍一個。

（簡稱：
《The Album》：《The Album》所有專輯統稱
《Part 1》:《the album part one》
《Part 2》:《the album and the rest of it…》
《Part 3》:《the album and the end of it》）

1. 第一個解讀方向：故事性（Narrativity）
故事性，一開始係呢個項目最大嘅賣點，亦係吸引好多人好似追劇咁留意《The Album》。去到《Part 2》、《Part 3》，劇情被批為冇發展，甚至「暴走」，引起唔少樂迷「棄故」。但由《Part 1》開始，究竟《The Album》有冇成功咁交代過佢個故事？而佢又有冇呢個責任？

音樂不同小說、電影，佢唔係一個故事嘅載體。或至少，佢載故事嘅容量，遠比小說同電影小。（歌劇、音樂劇除外，講緊嘅係主流流行音樂。）《The Album》講故事嘅方式，由《Part 1》開始，都係鬆散、隱若嘅，少交代情節，較交代人物心理。而呢樣唔係壞事，因為故事，唔一定係傳統線性敘事結構、有開端發展高潮結局，而可以係一個慢慢擴展出嚟嘅宇宙。所以去到後來劇情「暴走」，一啲都冇影響到我嘅體驗，反而佢越暴走、越多旁枝末節，我越興奮，因為佢個版圖越擴越大。

近年漫威同《星球大戰》嘅電影宇宙畀我哋睇到，故事嘅細節越解釋得多、越有關連、越「everything is connected」，宇宙嘅版圖反而會越縮越小。所以《The Album》入面，我冇介意過林嘉欣韋羅莎等人彈出彈入，佢哋嘅神出鬼沒反而令到個故事更添趣味。去到今日，我哋都冇一個《The Album》曲目排序嘅官方答案，換而言之，呢個故事係可以任由聽眾自行排列，你鍾意〈epilogue〉開頭都得。《The Album》嘅鬆散敘事（loose narrative），邀請咗聽眾自行「腦補」，激發出無限嘅可能性。

[YouTube]Y0OQ6b38Pl0[/YouTube]

2. 第二個解讀方向：文本互涉（Intertextuality）
文本互涉，又稱「互文」，指「文本的意義由其他的文本所構成」。由《Part 1》開始，《The Album》已經充滿互文。「數字系列」嘅頂真尚且較表面，係〈一個女人和浴室〉同〈(一個男人) 一個女人和浴室〉先真正震撼到我。〈男人〉，唔單止將〈女人〉重新配唱，更加換走主歌，將副歌據為己有。兩首歌各自有頭有尾，可以獨立咁聽同欣賞，但冇咗對方嘅 context 同所賦予嘅意義，似乎又爭咁啲嘢。正正係呢種不明確嘅藕斷絲連，令到你兩首歌曲更為感人同成功。同樣嘅做法，喺《Part 2》「寂寞系列」同《Part 3》一分鐘歌入面亦有再用。

去到《Part 2》，互文唔單止存在喺每張大碟自己入面嘅「『intra-』textuality」，更加向香港流行樂歷史互文。香港聽眾向 sampling 等外國慣常做法甚無認識，馮穎琪無懼可能引發出「抄襲」指控，喺〈偷情的禮儀〉入面大膽引用林憶蓮嘅〈不必在乎我是誰〉。同樣地，你唔需要認識後者，都可以欣賞前者，但呢個密碼衍生出多重意義：所以林憶蓮，喺浦銘心嘅世界入面係存在？黎明又喺董折嘅世界入面存在？究竟呢個世界孰真孰假？林憶蓮「隱藏已久的渴望」，就係浦銘心嘅「偷情」？林憶蓮追求愛情，浦銘心以「彼此欺哄」回應？唔單止係〈偷情〉回應緊〈不必在乎〉，兩者之間更加係互相對話緊（舊歌都係活嘅）。而麥浚龍喺開闢樂壇新例之時（無可否認《The Album》有部份嘅創新），亦不忘紮根於香港樂壇經典。所有嘅創新，都有賴前輩準備，而所有前輩嘅經典，都只係有待後人超越。

[YouTube]GCiXSZr3b8E[/YouTube]

作者: just11256 時間: 2021-1-8 21:47

本帖最後由 just11256 於 2021-1-8 23:38 編輯

3. 第三個解讀方向：時間性（Temporality）
上述嘅互文，引伸出《The Album》獨特嘅時間性。由《Part 2》開始，麥浚龍突走懷舊路線。但懷舊有好多種，佢唔係張敬軒咁將舊嘅風格搬去新嘅作品，而係開宗明義咁喺 2010 年代創作啲你可能喺八、九十年代聽到嘅歌。佢唔似可以獨立存在嘅《Senses Inherited》，因為如果你唔熟悉黎明腔，你根本唔會知〈忘記和記 featuring 黎明〉做緊乜。咁樣係一種倒退？定係一種創新？創新中倒退？倒退地創新？我唔知，但我知道〈忘記和記 featuring 黎明〉之所以吸引到樂迷，因為佢嘅懷舊唔單止係借啲意貪嗰陣味，更加係六分鐘嘅氣勢磅礴，邀請埋黎明出山，要做就做到盡。

《The Album》超越咗塑做舊嘅氛圍，正因為佢個故事。要懷舊，〈重口味〉等歌都可以做得好徹底，但因為《The Album》有故事，我哋知道《The Album》嘅懷舊歌唔係出於模仿、致敬，而係真正想將你帶翻去八、九十年代。《The Album》嘅懷舊歌特別在於，懷舊只係佢嘅手法，唔係佢嘅目的，佢嘅目的係要講佢嗰個故事。有咗呢個目的（佢個故事做緊乜唔重要），我哋知道佢係倒退地做緊新嘢，而諷刺嘅係，佢越要成功，就越要懷舊。《The Album》嘅懷舊歌更加涵蓋幾個年代嘅風格，喺時間線上跳嚟跳去，借用時間，塑做畫面。時間，變成麥浚龍手上嘅一個工具，任由操弄，我未見過香港樂壇嘅一個計劃入面有呢個玩法（我會密切期待 Serrini 嘅《Gwendolyn》大碟）。

[YouTube]ZIKBQH3ZIMc[/YouTube]

4. 第四個解讀方向：虛構性（Fictionality）
講咗咁多嘢，最終都係推向《The Album》嘅核核核心：虛實交替。正如第一論點所講，音樂始終唔係電影，佢冇能力做到電影嘅真實性（verisimilitude）。佢只可以企喺真實同虛構之間，而麥浚龍利用咗呢個特點，作出搖擺。例如忽然出現嘅林憶蓮同黎明。例如既 2019 又 1990 嘅時間。例如〈合唱歌〉內有「合唱歌」。甚至古天樂（有幾多人真係知藍定凌係乜水？我哋係為咗古天樂而嚟）。麥浚龍邀請嘅大部份聲音演員，都係有好強烈嘅形象（persona），而呢啲真實世界嘅形象好多時候取代咗虛構世界入面嘅人物。

《The Album》最特別、最令人興奮、最有無限可能性之處，就係佢有幾分虛實，係喺聽眾手上。音樂不同於電影逼你去接受個電影宇宙嘅真實性，聽《The Album》嘅時候，你可以自行判斷你係聽緊謝安琪定浦銘心唱歌。你可以自行決定歌曲嘅時間點。你甚至可以自行排列整個故事。咁講好似好唔尊重作者麥浚龍，但如果作者嘅死活係一個光譜，咁音樂，尤其係香港流行音樂，係偏向死嗰一邊。《The Album》嘅話語權係喺聽眾手上，所有嘅不清、混亂都變成我哋嘅福祉。你可以話，所有歌都係咁，但正因《The Album》畀咗我哋強烈嘅故事性基礎，我哋先可以喺上面自由跳躍。

[YouTube]MwbLHcrFtZU[/YouTube]

結語

你可能覺得，我只係將《The Album》嘅缺點扭曲成優點。我都承認我有少少係咁，但我歡迎你駁論，因為我更想係啟發大家去思考。

我記得麥浚龍一開始公佈《The Album》呢個名嘅時候，我係好反感嘅，覺得好hea，冇意思。但我依家覺得，《The Album》呢個名就好似一個 placeholder 咁，其實係一個《_____》，一個由我哋自己去填嘅空格。What is《The Album》？三十首歌？三隻碟？一隻碟？一個故事？定故事宇宙？呢啲問題，係冇標準答案嘅，係由我哋自己答嘅，and why would you want something as boring as model answers?

作者: kayzzz 時間: 2021-1-8 22:19

寫得最好依段

《The Album》最特別、最令人興奮、最有無限可能性之處，就係佢有幾分虛實，係喺聽眾手上。音樂不同於電影逼你去接受個電影宇宙嘅真實性，聽《The Album》嘅時候，你可以自行判斷你係聽緊謝安琪定浦銘心唱歌。你可以自行決定歌曲嘅時間點。你甚至可以自行排列整個故事。咁講好似好唔尊重作者麥浚龍，但如果作者嘅死活係一個光譜，咁音樂，尤其係香港流行音樂，係偏向死嗰一邊。《The Album》嘅話語權係喺聽眾手上，所有嘅不清、混亂都變成我哋嘅福祉。你可以話，所有歌都係咁，但正因《The Album》畀咗我哋強烈嘅故事性基礎，我哋先可以喺上面自由跳躍。

但其實好多聽眾嘅質素都好似鍾意煲大台劇既師奶咁
分唔清裏面嘅角色同埋真人即係係大台劇飾演第三者嘅角色係街上面就會俾人鬧咁

其實大部分人都當係謝安琪古天樂唱果d歌而唔係浦銘心藍定凌

作者: just11256 時間: 2021-1-8 22:48

本帖最後由 just11256 於 2021-1-8 22:51 編輯

寫得最好依段

但其實好多聽眾嘅質素都好似鍾意煲大台劇既師奶咁
分唔清裏面嘅角色同埋真人即係 ...
kayzzz 發表於 2021-1-8 22:19

多謝支持

我覺得兩種解讀都可以啦
況且對大部份人嚟講，「董折」、「浦銘心」呢啲字係冇意思嘅，其實只係signifiers
究竟歌曲入面係咪有歌手真人係一個好複雜嘅議題，我遲啲都想開post講

作者: bagfgfcde 時間: 2021-1-8 23:11

本帖最後由 bagfgfcde 於 2021-1-8 23:13 編輯

寫得幾好
不如我又講下我自己既睇法

我本身都唔係會成日追劇追電影既人
所以由 Part 1 開始已經唔係太想理個故仔發展
對於某部分作用在於推進劇情多過可以獨立成歌既作品毫無興趣

亦都係因為咁相比起個故事入面既角色
我更加有興趣知道歌者本身既 growth
但由 Part 1 去到 Part 3 我都唔係好感受到歌者既進化
（對比2018以前係有，但呢三年都冇乜進展）

而通常我自己鍾意同特別欣賞既音樂人
都會俾到持續進化既感覺我
我覺得自己係幾睇重呢點

作者: just11256 時間: 2021-1-8 23:28

寫得幾好
不如我又講下我自己既睇法

我本身都唔係會成日追劇追電影既人
所以由 Part 1 開始已經唔係太想理 ...
bagfgfcde 發表於 2021-1-8 23:11

kay好明顯有進步嘅
juno我覺得退步緊

但我冇你呢個expectation啦
因爲我覺得香港樂壇嘅歌手捉到鹿已經好難得
所以佢哋就算唔進化，繼續做好自己就已經ok了

作者: 洗衣王國130 時間: 2021-1-8 23:51

我真係為咗呢個故事流眼淚
係愛情一個寫照
幾多痴男怨女為愛情受傷
就算我係hehe 都代入個故事
或者人類永遠輸在感情
所以 773312 呼應the album 整個故事
機械人先可以超脫人類嘅愛人類嘅苦

作者: chanching 時間: 2021-1-9 00:04

寫得最好依段

但其實好多聽眾嘅質素都好似鍾意煲大台劇既師奶咁
分唔清裏面嘅角色同埋真人即係 ...
kayzzz 發表於 2021-1-8 22:19

其實佢地可以去盡d
歌者直接落浦銘心董折
而唔係落謝安琪麥浚龍

作者: SPD 時間: 2021-1-9 00:32

寫得好詳細。

我個人覺得 Juno 寫 the album 呢個故事係由角色出發，重點係講人與人之間嘅情感。個故事係用嚟交待角色背景及解釋性挌上嘅轉變，所以其實唔需要每一個細節都交待。

角色嘅設定其實係想聽眾把歌同歌者抽離，如果唔係無啦啦唱一首關於離婚、偷情嘅歌，其實會幾怪。

至於好多人話離地，我一直都唔認同 the album 個故事係離地，未婚懐孕、太年輕結婚、年青夫婦面對經濟壓力、家暴、離婚、再婚、偷情、離婚後重遇、離世前想完成番年青時嘅承諾，etc，其實全部都係現實世界會發生。不過我估會係討論區留言嘅聽眾普遍比較年輕，可能連婚都未結，咁佢哋代入唔到，我都理解。

音樂質素係保持到，亦都有好多新嘗試。呢度好多人覺得啲唔夠兩分鐘嘅歌係 hea，其實我又唔覺，呢幾首歌用環境聲代替編曲，其實都要心思去做，同埋歌詞精簡得來又要講到嘢，真係少啲功力都唔得。

作者: SPD 時間: 2021-1-9 00:37

kay好明顯有進步嘅
juno我覺得退步緊

但我冇你呢個expectation啦
因爲我覺得香港樂壇嘅歌手捉到鹿已經好 ...
just11256 發表於 2021-1-8 23:28

我係 Juno’s fan
想知道點解你覺得 Juno 退步緊
我唔係想反駁，純粹想知道其他人嘅睇法

作者: chanching 時間: 2021-1-9 00:39

Part 3 改劇情改到唔通
歌詞同文案互相矛盾而非互補
仲要無mv 做唔到跨媒體

作者: just11256 時間: 2021-1-9 00:50

我係 Juno’s fan
想知道點解你覺得 Juno 退步緊
我唔係想反駁，純粹想知道其他人嘅睇法 ...
SPD 發表於 2021-1-9 00:37

我都係呀，我更正返，我覺得佢有啲重覆啫，仲keep到水準嘅
我覺得以前嘅佢音樂上大膽啲，每隻碟亦多啲變化，情感更加到位
例如成個《the album》都搵唔到一首好似〈逆蒼生〉同〈孽〉呢啲去得咁盡嘅歌，甚至〈呻吟〉都冇
搵少啲bert可能會好啲
都幾佩服佢同咁多唔同製作人合作都keep都自己style

作者: ifeinano 時間: 2021-1-9 02:08

我覺得有啲矛盾，開頭話只聽歌唔睇其他文字，但係故事性又分析咁多，只聽歌真係可以get到咁多嘢？

作者: just11256 時間: 2021-1-9 02:56

我覺得有啲矛盾，開頭話只聽歌唔睇其他文字，但係故事性又分析咁多，只聽歌真係可以get到咁多嘢？ ...
ifeinano 發表於 2021-1-9 02:08

請問你覺得係邊part要睇其他媒體先get到？

作者: ifeinano 時間: 2021-1-9 07:45

請問你覺得係邊part要睇其他媒體先get到？
just11256 發表於 2021-1-9 02:56

成個Part 3, 三生一吻同切爾諾貝爾之間完全唔知發生咩事

作者: just11256 時間: 2021-1-9 16:04

成個Part 3, 三生一吻同切爾諾貝爾之間完全唔知發生咩事
ifeinano 發表於 2021-1-9 07:45

係，點解無啦啦去咗切爾諾貝爾係有啲唔清楚（〈不歸〉我完全唔知做緊乜）
但因爲勇悍·17已經提過「約定未來要到切爾諾貝爾跟你闖闖」
我已經可以腦補到個劇情

作者: SPD 時間: 2021-1-9 18:41

係，點解無啦啦去咗切爾諾貝爾係有啲唔清楚（〈不歸〉我完全唔知做緊乜）
但因爲勇悍·17已經提過「約定 ...
just11256 發表於 2021-1-9 16:04

我諗得好簡單，因為要捐眼角膜俾個女，要去一個有得做黑市手術嘅地方，同埋又想係捐眼角膜之前（重睇到嘢）去切爾諾貝爾，了咗年青時嘅心願，所以就去咗。

作者: people 時間: 2021-1-9 21:48

寫得好詳細。

我個人覺得 Juno 寫 the album 呢個故事係由角色出發，重點係講人與人之間嘅情感。 ...角色嘅設定其實係想聽眾把歌同歌者抽離，如果唔係無啦啦唱一首關於離婚、偷情嘅歌，其實會幾怪。
SPD 發表於 2021-1-9 00:32

呢一點又幾好,唔係好似eason 唱無人之境又比人抽水
個project 有幾首係真係好好

作者: NelsonWu 時間: 2021-1-9 23:45

本帖最後由 NelsonWu 於 2021-1-9 23:52 編輯

向好果邊諗就係比空間歌迷諗、向壞果邊諗就係故事唔完整，互相矛盾。好多時歌迷係心水清。

另外，我諗緊就算要比空間歌迷思考，有咩辦法可以提升歌曲之間嘅連貫性呢？之前羅生門拎返耿耿於懷、念念不忘嘅歌詞再創作，令到成件事連貫好多。男浴室同埋女浴室、寂寞就如其實寂寞都做到類似效果。但係去到part 3，旋律再copy and paste 去第二首歌《忐忑》、《不老》、《殊途》嘅時候，如果可以作埋落去，個完整性回高好多。又或者youtube comment 提議可以做《盡處殊途》、《殊途同歸》、《同歸於盡》，每一隻歌扣連返上一隻歌嘅話，成個project會吸引好多。又或者將d 分幾鐘嘅歌放落另外一隻碟，成件事會無咁爛尾。

作者: just11256 時間: 2021-1-9 23:56

向好果邊諗就係比空間歌迷諗、向壞果邊諗就係故事唔完整，互相矛盾。好多時歌迷係心水清。

另外，我諗緊就 ...
NelsonWu 發表於 2021-1-9 23:45

其實你呢個point我已經回應咗
歌曲之間要做幾多互文係好巧妙嘅一個光譜
做得太少會好似你咁覺得到喉唔到肺，但我個人覺得如果佢太 connect the dots、太 everything is connected，咁樣佢宇宙個版圖反而會縮細
同埋 part 3 唔少歌都有用返前兩part啲 keywords
依家個平衡攞得幾好

作者: add 時間: 2021-1-10 08:13

我都係呀，我更正返，我覺得佢有啲重覆啫，仲keep到水準嘅
我覺得以前嘅佢音樂上大膽啲，每隻碟亦多 ...
just11256 發表於 2021-1-9 00:50

我覺得juno 係好刻意型造romance acoustic 多於Electronical 風格
我覺得應該要同番true romance 果類歌曲做類比會適合d

作者: add 時間: 2021-1-10 08:15

我淨係想知如果kay and juno 如果冇鬧翻的話
係咪真係會出番原本抽起果幾首歌曲
睇最後尾彩蛋聽到幾粒音都已經起曬雞皮如果唔做埋真係覺得好曬料
抑或其實係等多幾年後會出番

作者: chanching 時間: 2021-1-10 12:19

我淨係想知如果kay and juno 如果冇鬧翻的話
係咪真係會出番原本抽起果幾首歌曲
睇最後尾彩蛋聽到幾粒音 ...
add 發表於 2021-1-10 08:15

電台訪問就話錄唔切所以cut
Qr code就話錄左都cut
唔知邊樣先真

作者: ifeinano 時間: 2021-1-10 14:45

電台訪問就話錄唔切所以cut
Qr code就話錄左都cut
唔知邊樣先真
chanching 發表於 2021-1-10 12:19

有幾首錄好但因為未知原因cut咗
cut咗之後錄不老殊途個d補位，錄唔切所以得半首

作者: let'sbegin 時間: 2021-2-4 03:34

我淨係想知如果kay and juno 如果冇鬧翻的話
係咪真係會出番原本抽起果幾首歌曲
睇最後尾彩蛋聽到幾粒音 ...
add 發表於 2021-1-10 08:15

錄咗唔出街姐假設佢地已經將抽起咗既歌當the album part 3既bonus
希望juno會考慮當bonus track入KIM dvd＋cd
當然嗰堆歌progress係點係roof cut定錄錄吓唔錄得佢地知
而且kay肯唔肯就算完約都入studio補錄都係未知之數
所以總結嗰堆歌重見天日既機會好微

希望juno最後一次消費kay都好頭好尾唔好再辜負樂迷如果唔係就唔「專業頂尖」

作者: let'sbegin 時間: 2021-2-4 03:37

有幾首錄好但因為未知原因cut咗
cut咗之後錄不老殊途個d補位，錄唔切所以得半首 ...
ifeinano 發表於 2021-1-10 14:45

可能嗰排傾續約唔成功小氣juno損人不利己 plug埋epilogue
或者製作單位好敏感

歡迎光臨 Cool Music Forum (http://www.cmusichart.com/discuz/)