Board logo

標題: Edan爆紅MV女主角 經理人「三顧草廬」說服入行 [打印本頁]

作者: losyes    時間: 2021-2-22 08:39     標題: Edan爆紅MV女主角 經理人「三顧草廬」說服入行

Edan呂爵安@MIRROR的新歌《E先生連環不幸事件》在YouTube上載未夠1個月,已有超過130萬人次瀏覽,亮麗成績有目共睹,連帶MV中的女主角譚旻萱(Mandy)亦備受網民注目。



今年20歲的Mandy,擁有深邃眼睛、高挺鼻樑,在MV中紮起馬尾穿上校服,久違了的清新臉孔令人為之醒神,難怪出道僅半年已火速成為廣告界新寵兒。更難得的是,她做寶礦力紮紮跳少女又得,塗濃妝走高檔路線亦得,可塑性非一般的高。

經理人「三顧草廬」說服譚爸爸
日前,Mandy接受《蘋果》訪問,談到初入行經過,本身是家中獨女的她,最棘手原來是要過爸爸一關,最終要靠經理人「三顧草廬」,才能成功說服到譚爸爸。Mandy說:「其實嗰時係經理人喺IG聯絡我,不過爸爸對呢行唔熟悉,所以唔想我入行,反而媽咪就鼓勵我試。當時我要考DSE,結果就先放低咗,不過經理人一直有同我爸爸聯絡,解釋呢一行嘅運作,經過年半時間嘅溝通,爸爸終於肯應承。」

當初經理人在茫茫人海中,憑一張IG相,斷定Mandy是可造之材,但內裏底蘊原來是膽博膽。Mandy的經理人笑說:「當初喺IG見佢身形好大份,但奇在五官又好靚,過咗一排仲記住嗰張相,所以先approach佢,之後見佢啲IG相越嚟越瘦,就覺得無論如何要搵佢上嚟傾吓。當見到真人先知有成177cm咁高,都有啲驚㗎,肥有得減,高冇得搞嘛,不過慢慢了解佢性格之後,覺得佢都係適合做呢行嘅。」

天使面孔加青春本錢再加model高䠷身材,不用P圖不用美顏不用就角度,Mandy影的硬照已可直接出街,奈何Mandy天生是易肥體質,喜歡食澱粉質又愛吃雪糕甜品,結果數度減肥好快又翻脹,中學時代曾被同學嘲似「坦克」,媽咪更試過半夜夢到阿女打回原形而嚇到喊,Mandy笑言:「媽咪好唔鍾意我肥,成日同我講,話做女仔唔一定要標青,但唔好糟蹋自己,勸我食唔晒唔好夾硬嚟,但食物係我真愛,試過最誇張一餐食兩碗譚仔,可能我有潛質做大胃王。」現時Mandy由「重型坦克車」變「流線型跑車」,相信最開心莫過於譚媽媽。

日打8粒鐘籃球
Mandy在中學時代是籃球活躍分子,訪問中一提到籃球,Mandy不期然流露bling bling眼。她在中三由零開始,打到現時可以在不同位置都輕易「穿針」入波,但原來背後下了不少苦功:「嗰時喺街見人打,自己心血來潮買咗個籃球去練,試過一個人喺每個位射100球去練,每日一放學衝落去球場打足8個鐘。當初我都有成日問點解女仔唔可以學『插花』,點解啲人覺得男仔先打得型?」Mandy認為若想提高技術,最好是和男仔比賽,更希望對方不要就住就住:「因為男仔唔就住你打,先係對你一個認可同尊重,咁你射到一球先叫有價值。」

因為演出了Edan的MV,令原本只屬於廣告硬照範疇的Mandy,搖身變成音樂短片女主角,亦因為這個校園三角戀MV,令不少網民對這位清純美少女留下印象,除了帶挈IG人數激增,亦令Mandy多了兩位好友。「之前我唔識Edan同Locker(林家熙),但唔知點解我哋3個好夾,個MV拍拍吓好似變成自己嘅回憶,對佢兩個嘅感覺亦越嚟越重要,所以最後拍喊嗰場戲,我係發自內心,真係好唔捨得佢哋,會覺得點解段關係咁就完呢,我諗就係大家講嘅抽離唔到。」Mandy坦言早已聽聞MIRROR fans的威力,最初亦有少許擔心,但想不到他們反過來慰問Mandy擔心她辛苦,令她消除顧慮。

MV迴響大,更成為二次創作對象,為補完Locker與Edan的HeHe線,出現了一條「走女版」MV,將Mandy所有戲份剪走,變成兩個男人的愛情故事。處女作被惡搞,Mandy當然都有睇過,但她完全不介意,更形容走女版「好好笑!」接受能力非常高。

最愛BTS Suga
Mandy過去常被指似韓星朴敏英,又有人說她似本土女神代表「香香」岑麗香,而Mandy透露自己女神是陳法拉,純因對方很有知性美:「其實佢哋3個都有樣貌有內涵,你問我,我唔覺得自己係女神,始終未有佢哋嘅歷練。喺我眼中要成為女神,係要用腦成日去諗唔同嘅嘢,因為而家有太多資訊,你唔去過濾只會隨波逐流。」Mandy中學時偶像原來是韓星,最愛BTS的Suga,其中一個原因是對方的故事和自己有點相似:「佢又係當初唔俾人睇好,成日俾人嘲笑,不過佢冇放棄到,到而家有好好成績,佢嘅故事話畀我聽,只要唔放棄,一定可以成功。」


今年20歲的Mandy,憑清新脫俗的樣貌,成為廣告界新寵。


Mandy經理人指自己就是看了這張相,對Mandy一直念念不忘。(IG圖片)


在這張相中,Mandy比之前清減了,因此經理人決定要見見對方,這亦成為Mandy入行的契機。(IG圖片)

https://hk.appledaily.com/entertainment/20210303/XIOCYJ5VYBECTLUID6XSYRIXWU/

原來Mandy得20歲
睇完又想返去loop多幾次E先生個MV
作者: edwardngwy    時間: 2021-2-22 09:36

Loop走女版同阿正版
作者: mrshadowll    時間: 2021-2-22 09:53

下次揾d靚仔(好似Jeffery)拍mv 中意仔多d
作者: losyes    時間: 2021-2-22 09:56

下次揾d靚仔(好似Jeffery)拍mv 中意仔多d
mrshadowll 發表於 2021-2-22 09:53


香港樂壇俾你地搞彎哂
作者: mrshadowll    時間: 2021-2-22 10:02

香港樂壇俾你地搞彎哂
losyes 發表於 2021-2-22 09:56


係娛樂圈唔係樂壇
作者: gocrazy    時間: 2021-2-22 10:47

下次揾d靚仔(好似Jeffery)拍mv 中意仔多d
mrshadowll 發表於 2021-2-22 09:53


呢個提議幾好
最好係登神或者jerdan拍
作者: choix    時間: 2021-2-22 10:52

其實我鐘意Locker多啲
作者: losyes    時間: 2021-2-22 11:04

其實我鐘意Locker多啲
choix 發表於 2021-2-22 10:52


兒登後宮太多人
作者: WZA111    時間: 2021-2-22 11:21

支持SUGA
作者: michael344    時間: 2021-2-22 14:18

支持走女版 支持on9 仔 Locker
條女邊忽靚?
作者: NelsonWu    時間: 2021-2-22 15:15

『對Mandy一直念念不忘』

    成件事好creepy
作者: xteve    時間: 2021-2-22 16:25

香港樂壇俾你地搞彎哂
losyes 發表於 2021-2-22 09:56



都怪全民造星提供大量男新人。。搞到樂壇陽勝陰衰
作者: Frankiekiekie    時間: 2021-2-22 20:09

識睇一定睇LA Girls ver.




歡迎光臨 Cool Music Forum (http://www.cmusichart.com/discuz/) Powered by Discuz! 7.2