- 積分
- 40420
- 貢獻
- 4789
- 參與
- 31107
|
本帖最後由 chanchan0909 於 2024-6-8 17:15 編輯
01 混合雙打 鄭思維 / 黃雅瓊 [1] VS Dechapol / Sapsiree [6]
好強勁嘅攻防對決 ! 德沙 今次好亮眼嘅一點係佢地輪轉本身唔錯之外,仲加強左網前嘅捉球,令到 雅思 嘅防守一度處於被動狀態。雅思 喺自己有進攻嘅球都主動求變,因為 德沙 輪轉好嘅關係,大多嘅應對球都以 前場收吊 同 高球壓後場,目的都係要 德沙 失去重心。兩邊都做得幾成功,但 雅思 兩局 21:19 險勝贏在失誤比 德沙 少而已。呢場比賽好睇 !
02 女子單打 安洗瑩 [1] VS 王祉怡 [6]
小安 嘅跟隨球能力真係不得了,對手已經佔據主動嘅情況下佢依然可以透過自己嘅跟隨能力轉危為機。王祉怡 就無 小安 咁強嘅跟隨能力,但佢唔差嘅四方角同連貫能力都拎到階段性嘅連續得分,亦都執行得好好,只要堅持到多板來回嘅調動,小安 都會有失誤。只係自己領先嘅 21:20 放左一個 小安 嘅接發界內球,浪費左前面嘅努力。但 小安 成場比賽所展示嘅韌勁實在好強,而且最難得係又強又有質量 ! 小安 賽後主動同 王祉怡 交換 頭帶,有強者風範同埋有體育精神 !
03 混合雙打 蔣振邦 / 魏雅欣 [5] VS 陳健銘 / 賴沛君
呢場比賽喺賽前懸念最細,但以比分黎講都未係咁一面倒,表演黎講 陳賴 好放得開,蔣魏 略嫌有些少緊張,有啲動作變形都比較確定呢一點。始終 大馬 無論自由人定國家隊嘅訓練都唔夠細膩,所以女選手係比較容易針對。因此後場守唔到快男選手,前場又唔夠女選手快。蔣魏 其實都搭檔左一年半,喺世界第五有一段時間,加埋高級賽一直有好成績,同埋 東渡 受傷病困擾狀態低迷,好幾個比賽高積分都陸續到期,世界前四指日可待 !
04 女子單打 陳雨菲 [2] VS Marin [3]
前兩局各打一局好球,兩局輸嘅嗰方都係失誤多,唔知係咪順風區容易失誤。第三局前面其實仍然係平分秋色,休息過後本來領先兩分嘅 Marin 突然比 雨菲 打左個 12:2,兩邊都想喺對方反手區做突破,但 雨菲 捉 Marin 嘅反手位捉得更好 |
|