吳若希親證有左3個月

本帖最後由表妹保莉於 2016-11-18 20:40 編輯

（新增內容）吳若希同澳門闊少男友何兆鴻（Alex）快合快離，九月Jinny喺ig宣佈同男友分手，之後唔夠一個月佢又喺ig話要暫別娛圈。咁佢又去咗邊呢？之唔係去咗澳門搵闊少囉！有唔少報道拍Jinny同Alex已經復合，仲有傳佢有喜三個月兼獲男友送900幾萬何文田新樓，不過佢亦都好快咁喺ig否認仲話：「Well，有左3個月會通知大家，結婚通知大家，應承你！」

而Jinny睇嚟都係有口齒嘅人，事關佢繼續喺ig開post，今日下午兩點幾突然喺ig post留言話有喜訊：「幸福的事要發生了！」仲hashtag埋「#自然光」同「#臉瘦了」，不過就冇講明係咩喜訊。其實喜事都不外呼做人妻者或係做人母，總之恭喜定就實冇錯啦！

《蘋果》收到消息，據知Jinny同老闆何哲圖都認咗大肚，至於前經理人Simon表示剛跟吳若希通電，她稱：「一路以嚟我同Jinny都有聯絡，見好耐冇聯絡，打畀佢問下佢最近點，佢就好不經意咁話有咗三個月，我都好愕然，但好高興嘅。佢同我講有好消息啊，有咗三個月喇！」《蘋果》致電Jinny道賀，Jinny未有回覆。

曾幫吳若希同Alex夾八字嘅陳定幫就說：「佢未通知我大肚，亦冇搵我擇日子結婚，本身好早之前話過佢哋最好2018年結婚，今年好似太快，不過佢今年有喜慶星，代表生仔結婚，如果今年結婚都冇問題，只係18年更加好。」

吳若希閨蜜Kellyjackie短訊回覆：「幸福嘅事可以有好多嘅，我知道佢飛咗去旅行，可能係呢一個開心事啦！我唔清楚，亦無八卦，不過如果係任何開心事，我相信佢自然會同大家分享的。」

問到最近有冇見Jinny? Kellyjackie表示：「早幾日有同佢食飯。」問到喺香港定澳門？Jinny最近好嘛？係咪計劃結婚搵你做伴娘？佢話：「香港食啊，佢OK啊，無講到呢個topic。我哋一齊食飯，佢講番上次來睇我舞台劇演出後的感覺，講下電影、食嘢、打機，我有叫佢食多啲野，因為同之前一樣咁瘦。」

------------------------------

其實大家都估到佢有左，唔係點會無啦啦放假？
不過佢連最受歡迎女歌星都未攞就收山會唔會太快？