- 積分
- 6225
- 貢獻
- 217
- 參與
- 5998
|
Eric Kwok「我最喜愛的 Eric Kwok 音樂會」
supposingly SMARTer
創作人作品展做第一個永遠最好,因為唔駛點諗咩特別野就已經夠好睇
但偏偏第一個係 Wyman,最鍾意搞花臣果個
搞到後面好多作品展其實真係同去睇展覽一樣,悶到乜
終於到左另一個比較多想頭嘅人開作品展,就係 Eric Kwok
林海峰幫佢度左條橋,就係做一個頒獎禮
可惜出到黎個效果係捉到鹿脫唔到角
全場太多無乜意義嘅廢話,正如林海峰尾場所講「本來叫佢學叱咤,點知而家係新城」
我相信當時個 idea 係以頒獎禮去介紹歌曲,而唔係送啲咩野
傾兩句 ok,但傾得耐仲要送埋啲笑唔出嘅禮物就好煞風景同浪費時間
講番呢個演唱會,我睇左第一場,所以以下內容都係講緊第一場
首先主題曲《Iron Man》真係越聽越正,尤其現場就更精彩,可以立即帶動到全場人嘅氣氛
Eric Kwok 掃住結他咁唱,唱完先話自己唔識彈結他,呢個我覺得係全場最佳笑點之一
然後叫左一班歌手排排坐扮頒獎禮,到呢度都 ok,歌手坐響台睇表演都幾特別
一開始係 Eric Kwok 最喜愛歌曲十大
當晚第 10 位係許志安《天下之大》,安仔近年其實把聲唔係好上到高音
要唱一首咁高音嘅歌,睇得出佢真係非常吃力,唱得亦唔好
第 9 位係梁詠琪《荷花》,全曲由 Eric Kwok 鋼琴伴奏
唔知係咪太耐無響香港唱歌,都唱得幾踩鋼線,不過尚算合格
Eason 佔據第 7 第 8 位,分別係《夕陽無陽好》同《最佳損友》
全晚唱得相當差都可以算係呢兩首,唔係話 Eason 自己唱得最差,係接近全個演唱會最差
未開聲又餘仲嚴重爛聲,高音要夾硬唱上去,首歌變得好生硬
全場最唔好後到全場最驚喜,第 6 位有 Gin Lee 代彭羚唱《一枝花》
三晚演出驚艷三萬觀眾嘅一首歌,唱得好好,台上舞蹈編排都有心思
第 5 位係吳雨霏《留不低》,不過不失,無乜走音,但相對唱得太用力
又或者係佢好用力咁唱,以保自己唔走音
第 4 位係 Eric Kwok 作完覺得大熱所以俾左梁漢文嘅《正氣歌》
其實真係唱到 chorus 先記得係邊首歌,同埋聽完從來唔覺得會大熱
不過同朋友討論間,首歌大唔大熱格固然緊要,但 Edmond 仲可唔可以令一首歌大熱呢?
第 3 位係楊千嬅代彭羚唱《給我愛過的男孩們》,第 2 位就係《楊千嬅》
唔知點解千嬅一開聲感覺好唔千嬅,不過呢首佢之前演唱會唱過,保持水準無驚喜
千嬅兩首歌除左有啲歌詞亂左之外,都係預期之內嘅表演
而第 1 位係由蘇永康代謝安琪唱《囍帖街》,首先,Neway 已經有原裝《囍帖街》唱啦
另外,全晚另一個最差表現就係來自蘇永康
對唔住,我從來都覺得你個版本係好難聽,唔好講到自己有份唱紅左首歌
同埋你 chok 聲 chok 到過哂火,首歌要淡然先會好聽
10 首歌曲後有全晚浪費時間兼最無謂嘅「星夢傳奇」環節
第一晚搵左林欣彤唱《洗澡》,唔知做乜一開頭 Mag 完全唱唔到聲,得和音唱咁
後來先慢慢有番聲,再有番功架,最後唱得都唔錯
呢個環球要阿公、Edmond、師兄同 Eason 俾意見個歌手,頭三個廢 up
Eason 想認真講,另外幾個又 stop 佢,咁個環節有乜意義?都唔講果啲無謂唔好笑又唔記得嘅獎項名
Mag 之後到師兄唱《爛命鴛鴦》,其實除左《髒話阿七》,師兄都幾係唱歌機器
無乜特別感情,又唔會點走音或者唱錯,同時都唔會有驚喜
然後蘇永康唱《當這地球沒有花》,首先,沒有 Bra 係唔好笑
二來,呢首係另一首要放輕唱嘅歌,佢就唱到 opera 咁,錯哂
呢首歌順利成為全晚最差最差嘅一首歌,重要當住 Eason 面強姦首歌
唔知當時 Eason 個心諗緊乜野呢?
呢個環節最後一首終於比較可取,係 Edmond 唱《懶音歌》
一首電音一開始得番個鋼琴,然後中間再用番原裝編曲,唔算兀突,又有氣氛
其實《懶音歌》派台時幾唔鍾意,但偶然聽一首,首歌其實好好玩
之後有兩位重量級嘉賓登場,首先有 Eric Kwok 同葉蒨文合唱《傷逝》
呢首歌又係一首 all times favourite,無論任何時間聽都會覺得正
然而,過左幾年,Sally 已經唱唔到呢首歌咁闊嘅 range
結果降 key 後由 Eric Kwok 幫佢唱主歌,Sally 自己唱副歌,呢個安排十分好
令首歌 keep 住個可聽度,又唔會令主唱難堪或者離開左自己最好聽嘅音域
Sally 之後到學友出場,唱左 Eric Kwok 第一首電台榜單冠軍歌《有個人》
事隔 15 年,學友嘅高音的確退步左,要唱一首不停真假音轉換嘅歌其實對佢黎講應該好困難
再加上佢 ear mon 可能有啲歌,佢唱嘅拍子係音樂嘅慢半拍
難得再聽到學友唱呢首歌,呢個結果有啲可惜
之後到左快歌環節,由葉佩雯《死物它》開場,呢首歌又係一個驚喜位
驚喜在唔係佢選左呢首歌唱,而係 Grace 仍然唱得好火,好有勁度
呢首歌之後嘅每一首快歌,Eric Kwok 都會同歌手夾番首歌原本嘅舞步
如果無原本舞蹈,都會有新編嘅舞步去配合,對一個創作人黎講,呢一部分應該花最多時間吧?
王梓軒《跳火坑》Live 聽比 CD 版本好,雖然首歌其實都係偏向怪異
以 Eric Kwok 嘅歌曲黎講,呢首偏向 Swing 嘅風格,只係王梓軒唔算 carry 得好
梁詠琪《我鍾意》到而家都仍然覺得好清新,Edmond《步步高》又係 Live 好聽過 CD
終於等到全晚焦點鄭希怡唱《阿拉伯市場》,Eric Kwok 話佢把聲唔同左,我又其實唔多覺
不過見到佢好落力又唱又跳,無甩,只係到最後有少少唔夠氣,我已經非常收貨 (唔好忘記佢發生過意外,穿過肺)
更加希望 Yumiko 可以再次推出新歌,尤其係快嘅廣東歌
Yumiko 後有 Eason《碌卡》同《重口味》,《碌卡》隻舞其實多人一齊跳係幾好睇
《重口味》永遠都可以一秒搞熱個場,而呢晚亦無例外
然後到「最深愛的人」環節,由媽媽到爸爸到老婆,睇得出 Eric Kwok 好注重家庭
見到佢講屋企人時果種激動,果種開心,果種甜蜜,你就知道佢唔係扮野讀稿
而係好多由心而發嘅感受同感動響當中
呢個環節第一首歌係 Eric Kwok 爸爸第一次讚佢作得好嘅《二人默劇》
Grace 再次登場,今次個氣勢都好強,完全係自己主場咁 (都算半個嘅… 其實)
佢每一下動作都好似同大家講「I'm ready to come back」一樣
或者係我諗多左,哈哈,但係都真心希望佢會再次出番黎唱歌
然後兩口子合唱《幸福摩天輪》,雖然 Grace 有忘詞,但個氣氛已經甜到漏
最後由 Eric Kwok 唱出《那邊見》俾佢去年離開左嘅父親
唱之前佢講到佢爸爸有幾唔好,但當佢唱呢首歌時,你聽得出佢有幾愛佢爸爸
永遠,爸爸同兒子果種關係,真係外人好難明白嘅一種感情
去到演唱會尾段,有 Eric Kwok 我最喜愛女歌手,今晚得獎係梁詠琪
的確,由 Snowman 時期就開始同 Gigi 一齊跑宣傳,又作左幾首好歌
Gigi 唱《煙霧瀰漫》,係佢今晚 3 首歌入面唱得最好嘅一首
而男歌手就係陳奕迅,黎到今晚第 5 首歌,又講左唔少野之後,終於開左聲
《落花流水》有番佢應該有嘅水準,只係把聲爛係避唔到
我諗要佢把聲好番,應該都唔駛旨意啦
唔知點解一開場果十首叫「最喜愛的歌曲」,然後尾又有「我最喜愛的歌曲」,不過都唔考究咁多
幾驚最後唔係《貝多芬與我》,好彩造馬都造到唱《貝多芬與我》
終於可以再聽到 Eason 完全放鬆地去唱完一整首歌嘅感覺,近年好似已經唔會再聽到呢個 Eason
Encore 部分終於到 Swing 出場,《1984》加《大大公司》
其實佢地唱幾多我都無所謂,有得聽已經立即好感動
同埋 Jerald 想反口請隨時反口,我仍然好願意聽到 Swing 重新走番埋一齊
一整晚過去,同其他作品展一樣,好多想聽嘅都聽唔到
但其實以今晚黎講係滿足嘅,只係唔駛送禮物或者講太多廢話的話
至少可以唱多五首歌,同埋最後 Swing 唔會咁趕
整個演唱會係 SMART,但可以做得更加好 |
|