Crooks

My Top Ten:

10. 是有種人
揀呢首歌除左因為有意思，更加係因為欣賞HOCC嗰種超有drive、打不死既人生態度。

9. 小俠
一貫Ivana獨有風格，而身為宮崎駿迷既我，點可能唔愛上個mv？只想講，香港樂壇慶幸有王菀之。

8. 差一點我們會飛
一首出色既主題曲，絕對可以令套戲加分，呢首歌就大大加強左電影想帶出既訊息，係會令人反思同感動既。

7. Superman
Aga's songs always remind me of the good old days, 令我諗起王菲同林億蓮早期既改篇歌，係timeless、永遠唔會out、又聽極唔厭嗰種，Aga真係好有才華。

6. 最幸福的眼淚
唔明點解冇乜人鐘意呢首，亦唔明點解話佢唱得差（Kary不嬲都係呢個style）。Anyway，呢首係我今年少數會loop既歌之一，真係感覺到歌曲想表達嗰種幸福。

5. 小幸運
其實冇特別，只係純粹覺得好聽，聽左一次就停唔到。點解香港就係出唔到呢啲旋律動聽、歌詞簡潔流暢、歌聲悅耳既歌？

4. Children Song
好鐘意個題材。老實，周爸唱歌真係唔好聽，所以我好怕聽佢唱情歌，但唱呢類又真係幾正，佢聲音裏面嗰種真摯係可以彌補到唱功上既不足。

3. 無條件
有人話Eason今年隻碟交行貨，我完全唔同意。啲歌係唔大路，較平淡，年輕一輩亦難有共鳴，但絕對唔覺係冇heart冇誠意，只係今次既嘗試出黎既效果未算好好。而無條件感動到我，好大程度係因為Eason既演釋，佢既功力喺現今樂壇依然無人能及。

其實我都唔知想唔想Eason去頒獎禮，一方面覺得有佢既話件事會好睇同圓滿好多，另一方面又知道佢的確係時候退下火線，好矛盾！

1/2. 回眸一笑/別來無恙
原因只有一個，因為佢係陳柏宇，我最喜愛既歌手，我覺得最好聽既聲音。既然係最愛，就當然要講多啲啦。

今年陳柏宇交出一張高質大碟，雖然比903 ban足半年，雖然比Sony hea足半年，雖然Sony擺喺佢身上既資源三成都唔知有冇，但黎到年尾，仍然有人記得陳柏宇，仍然有唔少人問點解五強冇佢，憑既就係一把能打動人既聲音同用心既演釋，最後即使繼續喺各頒獎禮食白果，都已經對自己有交代。

任何行業，要上位不能夠只靠技能，而係要夠chur，識走位，識埋堆，同唔放過任何表現自己既機會。呢啲特質都係陳柏宇冇既，所以唔會大紅大紫好正常，佢都有自知之明，但唔aggressive唔代表就要忍受長期被不公平對待。佢話2017結婚後可能唔再唱，set個限期比自己都係正確既，假如兩年後都仲係得唔到應有回報，的確應該另覓出路。作為fans雖然唔捨得，但都希望偶像可以開開心心過自己想過既生活。而家只希望2016年陳柏宇可以出到一隻概念完整、曲詞比Escape更有水準既大碟。