張敬軒患流感引發肺炎入院 澳門個唱改2月27日舉行
張敬軒原本聽日喺澳門威尼斯人金光綜藝館舉行《張敬軒世界巡迴演唱會》,但結果軒仔因為流感引發肺炎入院,聽日演唱會被迫取消。
經理人Mani(霍汶希)回應《蘋果》稱,醫生要軒仔入醫院,因為軒仔患流感,而全屋企啲姐姐都感染,不過軒仔比較嚴重,因為佢引發肺炎,Mani又稱:「聽日嘅演唱會取消,驚啲人提早去澳門,會失望,陣間我哋會出個道歉聲明。」
其後,官方發出聲明,指聽日於澳門舉行嘅個唱,將延期至2016年2月27日(星期六)舉行,而門票持有人士,其門票仍然可於改期之演唱會日使用,而未能於2月27日親臨演唱會嘅已購票人士可以申請退款。
另外,軒仔連日都有Instagram留言指,自己有去睇醫生,以及打hashtag「#咳到就嚟甩肺」,似乎已經病咗幾日!噚日亦喺ig寫道:「有冇人啱使吖,攞去用啦,唔洗唔該。#我不嬲都好錫我啲fan屎嘅 #我又唔覺佢哋肥嘅 #係健壯咗少少jer」佢更貼圖「月」字旁代表正常嘅人體器官,所以「胖」先係正常,而「瘦」係病,得治! |