【#pickachill】《史上最遠離家出走》 - 政治，好攰

【#pickachill】噚日已經透露咗少少玄機，今日會講呢一首歌係Wyman 填詞。老實講，用字我係覺得有啲un耳，不過瑕不掩瑜，成首歌嘅效果係幾中社會氛圍，亦都係我最鍾意嘅迷幻風。

雖然呢首《史上最遠離家出走》係押韻偏少，聽落un耳，但係內容直白，突兀亦正正符合首歌回應而家呢個社會環境。而家嘅香港，無論係最唔政治嘅社會事件，定係最政治嘅政治事件，到最後矛頭都係指向政府施政失效，令到唔少人睇唔順眼，甚至感到厭倦，移民與否已經成為唔少八九十後討論嘅話題，就連wyman 自己都話，過去年幾寫過唔止一首呢類歌。

其實過去shine 年代，wyman 都已經喺佢哋部分嘅歌套上咗一套世界觀，反思唔同問題，好似燕尾蝶、曼谷瑪利亞等等，而天佑自從轉嚟寰亞之後，幾乎首首都係回應緊社會，之前嘅密陽講自殺，就算街口有落只係電影主題曲，都係問緊社會變得陌生，係咪要走。

另一點值得留意嘅係，天佑自從去咗寰亞之後，幾乎首首歌都係自己作返曲，絕對唔係部分業餘創作歌手交行貨，今次寫迷幻嘢，仲要係呢十幾年喺主流歌手side track 都少見（印象中已經係1999年嘅陳奕迅我的世界末日同2003年何韻詩嘅鬼）。演繹上面，天佑本身聲底偏高，係配合到音域，當然技巧仲有得進步；但講最大功勞，當然係編曲veegay，就算有天佑本身嘅旋律，都要有veegay 塑造都氛圍先有呢個效果。既然之前街口有落同而家史上最遠離家出走都有火花，唔知之後合作有乜嘢新chemistry呢？

https://m.facebook.com/story.php?story_fbid=973699712699352&substory_index=0&id=947186585350665

1 評分人數