hehemamama

十大仲未排好 頭9首都決定咗 最後一首可能唔係銀髮白嚟
今年嘗試用播放率作標準 但因為我無好認真統計過自己聽咗幾多次
所以都半fail 同埋有啲歌聽好多次都唔入圍 (例如四季, 新貴, 緋荔榭‧少年....)

該死的快樂 王菀之
王菀之呢個名已經值得我比十大 無咩好講 好歌一首

雅俗 鄧小巧
小巧啲歌真係好正 雅俗由第一日派台就聽 聽第一次就好喜歡
本來想比十大第一位 諗諗下
原來以往幾年十大嘅第二位先係頒比聽得最多嘅歌
所以就同原來第二位嘅該死的快樂換位

穿花蝴蝶 衛蘭
派台嗰陣讀書好辛苦 每一日都諗好想做好自己
「我展翅 可不可得到認同」實在係心聲

卜卜卜 小塵埃
又係一首第一次聽就上癮嘅歌
佢地上一隻碟無買到 今次呢隻買咗
絕對無令人失望 Jonathan把聲都好好J

山林道 謝安琪
其實自己唔係咁好謝安琪 呢首歌亦都係聽得最少
但都決定比十大第五位 因為歌詞寫得好
作為出道十年嘅紀錄作品 恰到好處

乜青 陳柏宇
陳生無邊首歌係今年特別喜歡 但乜青好hit中自己嘅心聲
呢個世代 呢個社會 好多人同事都不喜歡
但我仍然抱住「乜都信可以最好」嘅心態

不同班同學 張敬軒
雖然大家都唔鍾意張生又拎男金
但今年嘅緋荔榭‧少年、羅賓、不同班同學同風起了我都好喜歡
「明年如碰著 10年的他 有沒有資格令人 既敬佩且驚怕」
嗯，到底我做唔做到呢?

玩家 容祖兒
今年成隻J-POP都係咁聽 聽得最多係K歌新貴 同閃光彈
無邊一首特別突出 但玩家係佢少數黑暗嘅作品
雖然唱得唔好 但編曲好
作為容粉 十大有容姨作品一啲都唔意外啦

多少年 JW
本身對JW呢三部曲無咩好感 但離開香港嗰排 有個frd 日日唱....結果上左癮
個曲其實幾好loop 因為唔係有咩特別原因 真係純粹聽得多 所以排喺第九位

銀髮白 林二汶 / 岑寧兒
(都未決定呢首歌係唔係十大)

仲有好多首其實今年都成日聽但最後決定唔入十大嘅歌 (排名不分先後)
風箏 / 圓 /  這首歌的名字是秘密 / 夢花鏡影 / 浮沙之路 /
光環 / 終於好天氣 / 沙燕之歌 / 四季 / 還不夠遠 /
(無女神.....其實我真係對呢首歌無感覺)

個人獎項：
年度男歌手：
陳柏宇 > 張敬軒 > 周國賢

年度女歌手(未決定 - 五強)：
容祖兒 / JW / Gin Lee / 盧凱彤 / 林二汶

年度組合/樂隊 ：
小塵埃 > Supper Moment > C All Star

年度新人：
鄧小巧

年度唱片：
A Little Louder - 小塵埃