返回列表 發帖

2016 埋數 同 2017 期許。

今年都係個人幾滿意既一年。少左個人既享受,但理解更多旁人既世界。

首先睇下2016既支票兌現左幾多先。

講左三年啦,年尾真係希望嫁得出啦。否則唔駛生嫁啦。-
2017年3月做人妻,其實心理準備左好耐,但得到老爺首肯,正式籌備係10月先開始。
而家雖則都做左好多野,不過係仲未有屋企既,婚紗相係未拍既,婚紗係未試既。
大禮都係下星期先過,Anyway,呢件事係教導我要俾信心同耐性,
同埋成日以為自己都好有責任心,但其實真係大件事既時候先知道未夠。



想在小組度帶敬拜,所以要重拾書包上堂。
講左開心既事之後,就要講今年最唔開心既事。
上堂係有既(無論在音樂上/書籍上),但最後既目的竟然係自己個專頁喪數自己間舊教會(即我而家身處既地方對面)。

返左呢間教會都有7年,轉左兩個小組,但係最唔開心既係,你係帶住學習、共融等期望入去既時候,
到最後你會收到既係變質、冷嘲熱諷、負成長同不被尊重。希望2017年會搵到一間適合既教會返,同埋未來三年想讀多張有關既High Dip。



想趁天氣凍寫返多點茶Blog,唔好由佢發毛。
Blog就寫少左好多喇,但係IG就經常更新,兼且在因緣際會之下整左個社區實驗,自己要落Site,
電視報紙訪問,佈置......屋企個茶櫃係不停擴展,2017精敗甚至戒買好啦,而家一個宜家大膠箱都唔知放唔放得晒。
不過有諗過進修(長遠計劃囉@@")就真既。


同埋在公司度乖乖做晒成個Contract
呢個成功找數。其實上司都俾左唔少機會我學做Senior,同埋同同事工作都算愉快。
雖然都發生過唔愉快既事情,曾經在年初想Quit,但係最後都真係做晒份約先走;
原本唔係做而家份工,只不過之前份工太痴線,啲老海鮮搞到我每日發晒癲落晒型,
最後唔知點解做左呢份本來冇諗住請我既工,勁開心同埋遇上超級好上司同掃把,
雖然人工差成15%,但開心同滿足感、自由度已經賺晒(說實話,我係第一次個櫃係裝零食既)。


改/作多D真係有內容既歌
唱作唔多,但起碼有三兩首,至於改詞都係冇咩進步,繼續大量唔合音同唔知自己寫緊乜。
想真係寫一啲同自己生活冇關既歌,不過有時間寫至算。


繼續瘦,可以的話行多少少郊外,同練返跑機/樓梯機
有行既,玩Pokemon Go既時候囉,郊外嘛,今年又係少左。跑機一樣少。
但係飲薏仁水同返男家食飯Regular左,而且新公司行200步去一次Toliet,郁動一定多少少既。


煮多D午餐返工食,慳錢同改進煮食技巧
結果係唔夠十次煮有心機既正餐,碟頭意粉就唔少既,去左Cooking Studio上堂,但係最終都係飲茶多過煮飯。
同埋依然中菜盲,西餐日餐都OK既,同埋去多左食材店、超市買調味料,對食物既認識的確係有進步左少少既@@"
今年的確係少左出外食飯(特別係最近兩三個月),不過經濟依然......係申請多左津貼、得閒做問卷、賣下書導致好似多左少少收入咁囉。



更加外向,去多D講座,同多返少少院牧探訪
同#3差唔多,去左一啲同興趣有關既堂,但探訪少到俾人Del個Profile (一來係忙,二來係接受到漸離地既傳福音方針)。


嘗試完成一年查經旅程
四月時已經撻左Q,不過未來未必再用呢個方法迫自己去每日做,可能會用另一個教材去Run呢個靈修生活。


希望聚到更多朋友去做有意義既野,例如野餐,打波,行山,做義工
基本上找左數,特別係擴闊左社交圈子,多左會面自然有唔同既活動,除左茶會/咖啡會,仲有Boardgame、義工,
希望第日有新居既活動更多元化。

展望一陣食完飯先再寫。
寒樂欣選2023 已開波,視乎幾時得閒就更新。
IG: lyric.alligraphy

返回列表