|
 
- 積分
- 5606
- 貢獻
- 118
- 參與
- 5488
|
本帖最後由 阻住 於 2017-1-4 19:11 編輯
生果即時新聞
今年3月容祖兒將會喺演藝學院舉行10場《容祖兒. My Secret . Live》，因為場地座位有限，只係得一萬張飛，所以預計喺1月23日公開發售會即時賣完，祖兒直言最唔想係黃牛買晒啲飛：「好想可以一張身份證只可以買兩張，但問過係唔得，所以我0依家有一場係特別做俾歌迷會。等佢哋一定買到飛。至於其他冇入歌迷會歌迷，如果真係買唔到，就唔好幫襯黃牛喇，我寧願開騷見到啲位吉咗，都唔想聽到有人話，炒貴幾百咁入場囉！」
其實唔只啲演唱會飛出現秒殺嘅情況，早前祖兒搵咗林海峰(Jan)擔任海報創作總監，雖然佢哋係首度合作，但係前後只係用咗半個鐘就影完一張海報就收工！本來喺拍攝當日，祖兒買咗大量新衫去影海報，阿Jan準備咗大量不同品種鮮花，祖兒話：「阿Jan一直唔講想點樣影，影影吓又問我可唔可以大露背拍攝，於是第二張我幾乎係喺冇乜著衫之下影，原來佢想將花同我個人混埋一齊，出嚟嘅效果又真係好靚呀！」
祖兒好搞笑話好彩0依家買衫有退貨服務，阿Jan就話：「其實我一早諗定係咁，但好難一早同你講，萬一唔得都可以有衫影，如果我叫你唔好帶衫，你『退咗』我個人咁點算？」
講到今次喺演藝學院開騷，祖兒就話：「其實已經期待咗六年，我一直好想開一個騷，唱啲自己好有感覺嘅歌，同埋一啲大家覺得係滄海遺珠嘅作品，可能喺好多歌手立場，覺得我傻咗呀？喺細場做十場，等於做一場紅館咁上下，但自己就要多出十倍力，但係我覺得唔同場有唔同感受，希望可以舒舒服服同歌迷喺近距離一齊嘆歌，唯一係有啲把聲會唔會太攰，其他商業上考慮真係冇諗咁多。」 |
|
發表於 2017-1-3 15:20
| 
