返回列表 發帖

CSEETheseVVords (2020 vol.01)

本帖最後由 seeseetv 於 2020-3-13 10:09 編輯

iSee [2017#01]
RubberBand – 呢度 (2017)

曲目上榜記錄@ C. SeeTV Chart (上榜週次 / 最高位置)
1.山河故人 (未派台)
2.老人與海 (2017week04-present / 12*)
3.飛天   (2016week49-2017week01 / 02)
  對於RubberBand呢隻碟,每一篇報導每一個訪問都會用佢地今年組成咗自己一個品牌嚟開頭。噉樣係因為要離開舊有嘅安全區域,要佢地四個人自己一手一腳出錢出力去製造一隻唱片,喺呢個時代其在係十分困難。如果根據森美喺一六年度叱吒樂壇流行榜頒獎典禮裡面噉講,出一隻唱片係要賣幾千隻先可以回到本。喺拎起RubberBand呢隻唱片嘅時候,有人望住個價錢,再望一望Tracklist,再同我講三首歌咋喎。我話但係佢地係RubberBand喎。
  佢地自己都講過三隻歌分別係講緊佢地三個唔同嘅階段,關於隻碟嘅介紹,搵翻佢地啲訪問,佢地自己應該都講過好多次,所以主要都係講翻我對呢隻碟嘅感覺啦。企喺一個會主動拎歌嚟聽嘅人嘅角度嚟講,一隻碟三首歌好似太少;但係對於餓咗好耐RubberBand碟嘅Fans嚟講,都可以幫佢地止住渴先…掛。
  三隻歌第一隻派台嘅係最後一Track—《飛天》,比較有節奏嘅作品,一句非常嗆耳嘅“Brand New Day”貫穿咗成首歌。我有一個習慣,就係會嘗試喺歌曲裡面搵個鼓嘅Pattern,所以呢首正中下懷,正!可以跟住佢地一齊跳跳跳飛上天。
  跟住派台嘅《山河故人》要講嘅係一段已經斷絕關係嘅友誼。唔似飛天,要講嘅唔係個鼓點打,而係會將焦點放喺歌詞度,歌詞嘅頭一段已經帶出咗主角嘅矛盾,一方面想修補同朋友嘅友誼,但係當真係見到面嘅時候,你會識得應對嗎?好嘞,就算呢兩個人可以好得翻,中間嗰條刺當然仲會喺度。當仍然唏噓嘅時候,Music Break已經完結,進入C3嘅6號用激昂嘅聲線將你拉翻嚟現實。就算你幾想繼續同佢一齊昂首闊步暢遊大世界,但係都已經冇可能,唯有將你帶去深山,所抑壓住嘅、想同佢講嘅一次過嗌晒出嚟,噉樣會舒服啲。
  至於仲未派台,又或者唔會派台嘅《老人與海》,一切回歸簡樸。如果我係呢三首歌嘅主角,我會將《飛天》擺第一;《山河故人》放第二,最後係《老人與海》擺最後。年少時好高騖遠四處闖蕩,先發現到同摯友喺價值觀上有分歧,但係經過年月嘅沖刷後,喺某一個時候突然之釋懷咗。釋懷咗望翻自己而家,有兒有孫,孫都長大,過咗只係好簡樸嘅生活。如果要喺Cantopop呢個Pool裡面揀一首同佢做朋友仔,我會揀謝安琪嘅《神奇女俠的退休生活》。
  好耐冇寫過嘢,想寫開箱文好耐,但係一直都的唔起心肝寫,今晚瞓唔著開個Word出嚟寫,寫下寫下,竟然寫好咗。

支持cccccccccctv

TOP

本帖最後由 chanchan0909 於 2017-2-3 20:06 編輯

全力支持 cctv
如果放埋天光了落去我諗大家都未必覺得貴掛
我嘅排名 : 山河故人 > 飛天 > 老人與海 , 不過 3 首都好正架

喺到歡迎大家多 D 發表多 D 好文喺呢個區
如果大家寫得好 , 我地都會放上去我地個 page 到比班歌手睇架
共和頒獎禮之後就開始

TOP

全力支持 cctv
如果放埋天光了落去我諗大家都未必覺得貴掛
我嘅排名 : 山河故人 > 飛天 > 山河故人 , 不過 3 首都好正架
chanchan0909 發表於 2017-2-3 18:41
山河故人的確正過山河故人
Btw 支持美背

TOP

山河故人的確正過山河故人  
Btw 支持美背
nicholashin 發表於 2017-2-3 19:59
copy 錯野姐
總之就 3 首都好好聽啦 真係好期待黎緊 H 大碟會係咩題材

TOP

iSee [2017#02]

難得一遇的林奕匡 與 林奕匡的難得一遇

曲目上榜記錄@ C. SeeTV Chart (上榜週次 / 最高位置)
難得一遇 (2017 Week05 - Present / 03*)

  喺你嘅人生裡面,有啲咩係你真係好鐘意嘅,你唔會介意做呢件事係唔會知道個結果係點、個收獲係點,甚至傾家蕩產去做嘅呢?佢出道嘅時候係二零零九年,輾轉地一直唔太為人熟悉,兜兜轉轉之下,最大最大嘅轉捩點一定係一四年嘅《高山低谷》。數數手指,由零九去到一四,大大話話都五年,未計正式出道前嘅等待,試問要一個有幾有恒心嘅人先可以維持上面講嗰個情況五年?相信喺《高山低谷》出現之前嘅佢都未必會想像到呢個狀況。

當你從來沒怨 能捱這麼久
  我信架,我信話如果一個人經歷緊大病、貧苦、危疾等等,當佢好翻嘅過程裡面仍然不離不棄嘅,嗰個一定會係好好嘅朋友,甚至情人。

當一半加一半會變成一 當一半係另一半嘅唯一 有愛我唔會再感到迷失 有愛你唔會再受到委屈
  由A1開始睇,第一句嘅「萬萬對情侶,避不過巨輪」,雖然我到而家,仍然覺得「敵不過」好似好過「避不過」少少,作為冧情歌嚟講,改一改呢個字對個Mood唔會有太大影響。「仍然我帶領前進」同「全憑你帶領我回轉」,兩個人互相帶領。當一個人冇信心嘅時候,另一方話「跟我行丫」;當另一方唔開心嘅時候,又自然有人拖佢出陰霾。人有開心唔開心好自然架啫,兩個人能夠互相扶持,所以咪可以去到另一個階段囉。

發誓一世也照料你 又哪及張開手臂做你我的窩
  去到Pre-Chrous尾段,「准我用一生挽著你手 直衝開最難過關口」,亦都係我覺得全首歌嘅精華。嗱係我呢就袋實呢十八個字,一搵到個覺得啱嘅,就對住佢去啦。喺呢個時候,聽多一次Chorus就落Ending,將貫穿成首歌嘅三個字一一「挽著手」用一種淡淡然嘅語氣唱多一次。雖然唔激昂,但呢種細水長流先係最令人所嚮往。

我們 荒山野嶺 得到倚靠 倍覺幸運
  去到另一個階段,除咗恭喜,真係唔適宜再講太多。佢地覺得開心咪得囉。要反思就嘅只係你第時會唔會對佢好、你值唔值得佢對你咁好,同埋你應該點樣對佢好。
  林奕匡先生,就算你去到人生另一個階段,都唔好唔記得繼續作Sweet歌正能量歌,因為喺廣東歌樂壇裡面,你已經擔起咗其中一個範疇,而呢個範疇,Carry緊嘅人少之有少。

伴你走 路會更康莊 戴白髮遊遠方
  無論今日係二月十四日又好,二月十三日又好;熱戀到日日都好似情人節噉,又抑或係慶祝到諗唔到點慶祝都好,都祝你可以身體健康,快快樂樂。

#不止一次我士氣很低落幸運在你決不走遠
#當你從來沒怨能捱這麼久如何會放得低你你現在太屈就
#終生不渝天塌下來只須挽著手
#林奕匡
#難得一遇
#其實我Backup緊嘢未瞓得住Back下Back下寫咗差唔多一千字都未Back好
#謝謝你

TOP

本帖最後由 seeseetv 於 2017-2-27 13:04 編輯

iSee [2017#03]

語無倫次地說羽毛鱗刺

        喜歡Dear Jane嘅人一致上可以分為三批。有啲人比較鐘意佢地啲抒情慢歌;有啲人鐘意佢地玩一啲嘈啲嘅歌;又有啲人見到Dear Jane有歌,唔理係以上邊一種,都會好鐘意。我屬於邊種?問得呢個問題,你已經將放入咗「喜歡Dear Jane嘅人」呢個pool裡面。
「係邊個將我放入呢個世界 咁變態」

一定要我揀嘅話,我會揀第二種。原因係,佢地啲情歌似到會撈亂,同埋原創派台嘅情歌十首有八首*圍繞嘅主題都係偏向慘嘅。另外嗰兩首唔屬於上述主題嘅就係《約翰與洋子》同埋《哪裡只得我共你》。

        廢話講完,返翻嚟首歌度先,呢首應該係計《七百萬種樂與怒》之後比較有翻啲節奏嘅歌曲,如果你係屬於上面講嘅第二種喜歡Dear Jane嘅聽歌人,應該都同我一樣等得好心急,2016年最盼望嘅就係七字歌嘅三部曲之後嘅呢類型曲風,但係止唔止到渴實在係因人而異。但係就我而言,可以止到一部份嘅,唯獨是個MV隔咗好耐先出,而同期亦都有其他亦都值得聽嘅作品,所以整體嚟講都叫做不過不失啦。再聽下後面組鼓,尤其是喺入chrous「慶幸還尚有」之前,Nice哥哥對手真係不得了。啲鼓真係密到唔畀時間你再諗得太多太透。

  「替失意找生天可再次遇險」嘅「生天」係咩嚟呢?搵過查過用自己嘅文字講出嚟,我會解做「將失意埋葬然後重新出發去冒險」。年輕人同成年人,分別唔係在於年齡,最重要嘅係你覺得你應該要過一個點樣嘅人生,老套啲講句「活到老,學到老」,一日仲有動力,一日都仲可以搵到新嘢學,淨係語言,有十世都不必可以學得晒。去郊外遊走嘅時候,見到好多叔叔姨姨,退咗休之後既然無所事事,噉咪約埋一班人一齊去行下。好多時候啲叔叔姨姨見到我自己一個平日都去郊遊都覺得好驚訝,我就會答「係啊,趁仲有時間仲未有包袱,咪出嚟行下,而家唔行唔知幾時先有得再行lu」,然後佢地就會好同意我嘅講法,而再跟住,傾完偈我就繼續孤身完成旅程。

        「因緣際遇」係每一個人生裡面都會遇到嘅嘢,打個譬如,就同每個人喺香港都要讀小學中學噉。而同讀書成績一樣,基本上可以分做「好」同埋「唔好」。細細個一定會有人同你講過讀書好同讀書唔好嘅分別,但係慢慢就會發現,讀書好叻,但係際遇麻麻,生活都唔一定過得好。


*十首選取歌曲為Dear Jane轉投華納唱片公司後派台歌曲,分別是《慣》、《Goodbye》、《無可避免》、《不許你注定一人》、《一去不返》、《約翰與洋子》、《最後一次》、《哪裡只得我共你》、《只知感覺失了蹤》及《經過一些秋與冬》。

Dear Jane 派台曲目上榜記錄@ C. SeeTV Chart (上榜週次 / 最高位置)
(只列出曾上榜歌曲)
慣 (2011 Week49 – 2012 Week03 / 01)
逼 (2012 Week04 – Week13 / 01)
Yellow Fever (2012 Week14 – Week20 , Week22 – Week24 / 02)
Let's Just Do It (2012 Week27 – Week35 / 02)
Goodbye (2012 Week37 – Week46 / 01)
無可避免 (2013 Week26 – Week31 / 02)
不許你注定一人 (2013 Week45 – Week48 / 03)
Stand Up (2014 Week16 – Week20 / 03)
一去不返 (2014 Week27 – Week31 / 14)
約翰與洋子 (2014 Week45 – Week48 / 15)
咖啡因眼淚 (2015 Week24 – Week29 / 04)
遠征 (2015 Week37 – Week44 / 01)
七百萬種樂與怒 (2015 Week51 – 2016 Week01 / 01)
哪裡只得我共你 (2016 Week 17– Week 23 / 01)
只知感覺失了蹤 (2016 Week 31 – Week33 / 18)
羽毛鱗刺 (2017 Week04 – Present / 05*)

TOP

羽毛鱗刺 真係好L正

TOP

本帖最後由 seeseetv 於 2017-2-27 13:03 編輯

iSee [2017#04]

鄧小巧 – The Strength of Weakness

曲目上榜記錄@ #CSeeTVChart (上榜週次 / 最高位置)
雅俗   (2016Week03-09 / 01)
煩可寧  (2016Week19-23 /05)
荒唐   (2016Week51-2017Week03 / 01)
強弱   (2016Week37-44 / 01)
不藥而癒 (2017Week04-Present / 02*)

  嘩神碟啊神碟啊!講真架,你話我係打手都係噉話嘞,呢隻碟雖然得五首歌,但係五隻都派晒五隻都好聽,要我揀一首最好聽嘅,我諗你要畀一日時間我。好,入正題,既然五首都派晒,噉就又第一首派台嘅開始講起啦。其實第一首喺2015年12月已經派咗,嗰陣勁驚因為年尾出碟,如果各大媒體都當咗佢係2015年嘅新人嘅話,噉就輸晒,好彩嘅係冇,佢係2016年新人啊!全碟五首歌嘅歌詞都係出自藍奕邦先生筆下,要睇嘅Credit就自然地轉移咗去曲嗰方面。呢隻碟嘅五首歌,我會將佢分做三個部分。

  第一個部份,就係全碟第一、二隻派台《雅俗》成首歌可以配上一個「型」字,你睇佢個編曲正到呢。作《雅俗》嘅呢個人,相信坊間仲未太熟悉佢,但係如果有留意《志明與春嬌》系列嘅Original Sound Track,你會見過佢;如果你係有留意多少少Cantopop呢個市場,你都係會見過佢個名,佢叫做李拾壹。作為第一首派台歌,驚喜分係滿分,因為係有好清晰嘅拍子貫穿咗成首聽。除咗李拾壹同埋好清楚嘅拍子之外,仲要留意副歌第一句嘅「大家來」。點解要留意呢,因為佢係唱到好似「大家樂」。亮點當然唔只得咁多啦,聽下喺鄧小巧後面,幫手woo-oh-oh嘅就係李拾壹本人喇。筆鋒一轉,冷靜落嚟,嚟到《煩可寧》,係一首迷幻得嚟可以靜靜地攤喺度聽嘅歌曲。「煩可寧」原本係一種安眠藥。依賴得安眠藥,病情都絕對唔輕。我只係失眠,距離嚴重到要食藥仲有一段距離,所以呢個感覺對我嚟講唔太強烈。「就算可得到 一晚半晚裡可安寧 但我知過後 只會還原沉溺本性」,雖然明知到食完藥可以瞓到覺,但係一發現瞓醒之後,所有事情仍然係咁崩壞,就會想繼續食藥,尋求安樂嘅感覺,造成一個惡性循環。

  《強弱》嘅A1,「忙著來為同伴設想 從未提及曾受過傷」,越聽越有《給最開心的人》嘅感覺,就好似《給最開心的人》嗰個最開心的人就係《強弱》講嘅嗰一個人。暫且先將呢兩首歌嘅「開心的人」當係同一個先。《給最開心的人》嘅故事順序落去,「開心的人」失咗蹤,論述故事嘅人先開始意識到呢個人喺生命裡面嘅重要,淺白啲講即係「失去咗先識珍惜」。「開心的人」唔見咗或者係因為佢都要去幫自己療傷,「如若悲哀 肆然悲哀 你無需多交代 從沒人代你去感慨」。又,如果「開心的人」唔想有其他人擔心佢,噉鄧小巧係扮演緊咩角色呢?答案可以喺「願你記得軟弱沒有錯」呢句到搵到。「你」字嘅出現,代表鄧小巧係同「開心的人」傾緊偈,但係喺「開心的人」自己抦埋咗療傷,噉邊個會同佢傾偈呢,當然就係「開心的人」嘅心聲。不過噉樣講,就搞到「開心的人」有情緒病噉,又但係,喺呢個城市,有邊個夠膽講自己真係冇情緒病呢?「強大因你 不怕赤裸裸」,放心啦,相信鄧小巧可以開解到「開心的人」,林一峰、梁詠琪、欣宜唔使驚,「開心的人」會以唔同姿態再出現,當「開心的人」再出現嘅時候,嘗試下去珍惜佢啦。:)

  我有一個習慣,會喺聽完《荒唐》之後順便聽埋《不藥而癒》。即係全碟最後一隻派台歌。亦都好慶幸佢有派到呢首歌,如果唔係,呢首歌只會成為一首遺珠。講下點解鐘意聽《荒唐》先。有時候返工返學好攰,返到屋企就會唔想郁,個腦就會有「好想拉低窗紗關掉電話自閉在這地牢」呢一句,Loop下loop下就會決定成首聽一次。雖然《荒唐》同《不藥而癒》係兩種唔同風格嘅歌,但係喺聲嘶力竭荒唐地崩潰之後,沉澱落嚟就需要《不藥而癒》嘅呢種節奏,就算從中未必能夠得到一啲啟發,不過聽完之後,最少我可以拎翻起部iPad打下機,成晚唔會就噉就完結咗。望下作曲嗰欄先,作《不藥而癒》嘅係阿Bert,即係作《瑕疵》嗰個啊,即係Supper Moment客串彈Keyboard嗰個啊。佢作嘅二部對唱相信喺《瑕疵》出現嘅時候已經領略過。嗱不過噉,今次個和唱部份,即係「仙丹打不開你的心窗」同「天使不懂得俗世的傷」呢句。個頭係幾好,但係句子最尾嗰幾個字如果唱翻慢少少,令到兩句中間段空隙短翻少少,可能會緊湊啲。喺每一次聽《不藥而癒》嘅過程中,都係由唔同嘅歌詞click中咗我,當中成個Chorus都曾經Click中過我。至於每一句係最中,相信每個人都有唔同嘅睇法,又或,可以試下分享下你地最鐘意邊句啦。

  第一首就Click中咗我。嗰陣,講緊嘅係一年前嘅大約呢個時候,就已經留咗2016年嘅新人金獎畀佢。喺2017年,鄧小巧小姐,祝你身體健康、青春常駐、工作順利,繼續做一啲估你唔到嘅歌畀我地聽。

TOP

iSee [2017#03]

語無倫次地說羽毛鱗刺

        喜歡Dear Jane嘅人一致上可以分為三批。有啲人比較鐘意佢 ...
seeseetv 發表於 2017/2/20 20:44


希望羽毛鱗刺有冠

TOP

支持steve喲
幾時得閒寫下NWB~
我們的總和

TOP

本帖最後由 seeseetv 於 2017-3-7 10:14 編輯

iSee [2017 #05]
一模一樣中的獨特模特兒
  人生被公式化,讀好書考好公開試成績然後入大學嘅正科,一畢業好彩嘅可以入到大公司做嘢,就算由低做起都好,你張履歷表寫出嚟就會好靚,至少有跳糟嘅想法,都會得到其他公司嘅青睞。公司嘅規模大定細唔重要,但係至少薪金方面會向上調整。生活喺一個噉樣嘅社會,上面條公式,唔止一個人同我講過,而身邊亦都有成功嘅例子。
  一次嘅唔小心,未可以如期畢業,暫時仲未需要真正地投身社會搵一份自己想做嘅Full-time Job。覺得慶幸係源於自己仲未清楚前路,未使因為壓力而夾硬做一份自己冇乜興趣嘅工作。噉樣其實係一種逃避,成日希望自己可以跳出安全地帶,去搵多啲唔同嘅範疇,順便搵下自己鐘意做嘅係乜嘢。講就話跳出咗好多個框框,可惜嘅係,喺跳出框框嘅同時,我仲係圍住上面條公式跳,跳下跳下隨時跳翻去原地。
  呢條公式逼到好多人都好緊,所以引伸出有好多人一方面返工,一方面喺網絡上面用文字創作出一個又一個唔同種類嘅故事,然後將自身對烏托邦嘅冀盼同現實社會嘅不滿寫出嚟,成為一個情感嘅發洩。
 每個人對烏托邦嘅想像都唔一樣,有人嘅烏托邦係好天馬行空嘅、有啲係好簡單嘅,例如自己可以擁有無限嘅財富;例如親人朋友永遠陪住自己,永遠唔會離棄對…呢啲看似係好簡單嘅願望,喺呢個社會好似有啲難實現。對年嘅作品,好似許廷鏗嘅《我的志願》同埋農夫嘅《你的志願》都邀請咗好多人講述佢地嘅夢想以及憧憬嘅生活。而舊年以區雪兒、周耀輝同馮穎琪為首嘅計劃《剎那的烏托邦》公演之後,喺冇幾耐之前再re-run多一次,遺憾嘅係,我冇得睇啊!似乎都miss咗幾多嘢。
  上面嘅呢堆字,係嚟自同好朋友行嘅十零分鐘路程嘅對話,加我由彩虹搭翻長沙灣嘅地鐵,無懼電話冇電造成嘅災難寫出嚟。由此可見,朋友仔你都影響得我幾深,而且我真係有聽你講嘢。入翻正題,揀《模》嘅原因係因為首歌好跳跳紮,好開心好想跟住郁。試過唔小心聽到一句,嗰一句就喺腦裡面成日,揮之不去,可見呢首歌嘅威力。副歌短短哋,講嘅只係得一個題目,用林夕畀糖妹嘅歌詞嚟睇,就係「青春這一個實驗 再不去瘋癲 怕只有悼念」。耐不耐都有廣東流行曲問你究竟你有冇因為呢個制度令到滿身稜角嘅你變得圓滑,由二零零六年開始嘅《給十年後的我》,到二零一六年周國賢嘅《Children Song》嘅提醒,你仲記唔記得細個嘅你,青春嘅你有啲咩抱負,有幾多不切實際嘅想法?「個個個個個 樣樣樣樣樣 處處也是這些 並沒第二樣 就是大時尚」,落到A2終於寫出重點,被灌輸公式嘅人越嚟越多,原來周圍嘅人都係朝住同一個方向前進,到最後,「我」都只不過係呢個「大時尚」裡面其中一個唔起眼嘅會員。
  既然包袱仲未係太重,既然仍然自由仍然青春,等我繼續傳承突然笑突然喊突然唱忽然生忽然死嘅意識畀下一代,如果佢地可以乖乖哋做完功課之後,聽下佢地亂噏,聽下佢地嘅幻想。又喺我仲有時間識得跑跑跳跳,諗到啲咩就寫啲咩嘅時候,就畀我繼續發下夢叫下苦啦。同首歌一樣,以「趁我們還會識得這樣」作結尾,記得二零一七年嘅自己做過啲咩對社會其實冇乜貢獻嘅自High事情,再多謝睇到呢度嘅你、《剎那的烏托邦》臺前幕後,如果冇《剎》,就冇一群少女、冇《模》,就唔會有呢篇文章。

#一群少女
#模
#剎那的烏托邦
#Youtube係咪唔會有full version架喇

TOP

iSee [2017 #05]
一模一樣中的獨特模特兒
  人生被公式化,讀好書考好公開試成績然後入大學嘅正科,一畢 ...
seeseetv 發表於 2017-3-5 00:44
正 有用呢首黎寫
不過實驗青春嗰句歌詞 , 個實字未打好

TOP

iSee [2017 #06]

鐵樹對蘭的自白 (上)

  話晒係人生裡面第一隻Metal碟,要喺一個特別嘅時候打佢篇評論。今日係二零一七年三月八日,而家我身處喺香港往沖繩嘅客機上面,夠晒特別。飛機上面冇wifi,所以特登帶咗碟嘅歌詞上機,一齊研究下歌詞, 一齊諗下究竟係控訴緊啲咩,就睇下我一程機可以寫到幾多字。唔好同我講「乜做Band一定要講政治架咩?」,現實就係,就算你首歌係講緊愛情都好,係要扭曲係要曲解嘅,都可以將歌詞扭轉到有控訴社會嘅意思。

  曲目一《陰天裡劃彩虹》係純音樂嚟嘅,冇歌詞純粹做一個Opening。之後嗰首就十到今年開show前plug咗去各大媒體嘅《凡人對抗命運》。望住個歌名,就知道好嬲啦,就望下點先可以對抗到命運。歌詞簿將呢首歌嘅歌詞分開咗兩邊,望清楚啲,兩邊歌詞係一樣嘅。「軌道 填滿 失落的人」、「潮流內 被軟禁 死因 莫問」兩句係屬於兩個verse嘅頭一句,關於而家社會嘅「大潮流」同「軌道」嘅終於,可以參閱上一篇《一模一樣中的獨特模特兒》,被大勢困住嘅人比比皆是,嗰啲被填滿被塞落喺路軌嘅失落的人多不勝數,其中被逼到走上絕路嘅人都唔少。唔單止係大人,你望下前排新聞,新年之後有幾多個小孩子情願做天台飛人,都唔想再承受讀書考試爸爸媽媽等多方面嘅壓力。噉嗰啲卑躬屈膝,為五斗米折腰嘅,你問下佢地有幾渴望可以有人指引一條新嘅道路等佢地可以脫貧,從此唔再需要做奴隸。可惜,「神與平凡人的對話 卻永未被連結」。「想我都好想可以中咗頭獎 有嘢唔使做 老細又吹我唔漲」,有神佑嘅人咪可以獲得呢個厚待囉;其他人想要人指出路,想要一個放鬆嘅地方都冇,所以咪個個去旅行囉。你睇機票越嚟越平,個個有兩三日假都可以去一個短trip,去到台北隨手執十個人都已經有一個講廣東話嘅。咦…寫到呢度,對唔住,原來我都係,去旅行喪食喪買,只不過尋求永生嘅其中一個方法,買唔到樓咪買唔到樓囉,活著為求甚麼?都係想開開心心噉就過一日啫。

  繼續聽落去,開始諗究竟聽鐵樹蘭嘅歌應唔應該著重歌詞,定係聽下有幾啃算呢?睇下《告別完再聚》嘅結構先,ABCABCDDDC,我諗D應該好重要所以連續重複咗三次,亦都可以令聽眾知道講緊嘅一段已經變質嘅愛情,「你我他」嘅出現更加將範圍收窄至三角關係,甚至係一段同前度分開之後希望繼續發生有性冇愛嘅關係,最偏鋒嘅係,「他」都知道同默許呢件事。快啲拉走我,都係聽完算,唔可以沉溺喺「我」嘅感覺,畢竟我本人同「我」對呢類事情嘅睇法都有幾大分別。

後記:其實返咗香港都幾日,但係呢幾日完全冇心機做任何事情,琴日執執下嘢發現,我係時候要做埋份2500字嘅assignment先,所以個(下),可能要等下。不便之處,敬請原諒。

TOP

#CSEETheseVVords [2020 vol.01]

@niliu_official #逆流 - #異人

#想言道我輩太瘋
近年有一種說法,
係鼓勵大家做翻自己,
唔需要百分之百噉按照已經編制好嘅成長說明書去行,
做唔到醫生律師等等嘅專業唔緊要,
你都可以有你發光嘅一面…

喺香港,
如果你去問下醫生律師呢啲高薪職業…
佢地或者都會同你講,
佢地其實都好多洗費,例如供車供樓等等,
分分鐘到佢地退休嗰一刻佢地都仲供緊。

星期一去上堂嘅時候,
講師講緊香港嘅歷史同文化,
佢問「如果有一日你嘅仔仔女女同你講
『我想去學搭棚』、『我想去學雕麻雀』,
你地會有咩睇法?」 又睇翻近年嘅小學概覽裏面,
好多學校都唔再標榜每個學期只靠測試考試成績分班,甚至會盡力去發掘一啲有特殊潛能嘅學生,加強栽培佢地唔同方面嘅才能,包括音樂、美術、體操、田徑,款式包羅萬有。
雖然小學將呢一類嘅拔尖包裝得冠冕堂皇,但係當佢地畢業之後,又係咪真係可以繼續發展呢一種才能呢?
縱觀其實現時冇太多實質嘅援助畀到做運動員、藝術家等等以才華維生嘅職業。
到最後,可能佢地都係要妥協,循翻住嗰一本成長說明書去行佢地嘅路。
#庸庸碌碌地過乾脆半死不生

希望當有一日,
我輩又或者係下一代成長到有能力去編制下一個時代嘅成長說明書嘅時候,
可以記得自己曾經有過機會發夢,蘛將發夢呢個權力薪火相傳落去,令到所有人都可以嘗試發夢,甚至試到「夢想成真」嘅滋味
#異人總像野馬脫韁 #別妄想圈養

TOP

嘩,有更新!  追下先

TOP

#CSEETheseVVords [2020 vol.02]

#如若迷失請謹記回家
就算你有多不想回家

聽到陳蕾喺2020年嘅呢首全新派台作品,
或者會聯想起上年呢個時候嘅一首派台 一 《當我迷失時聽著的歌》。
《不想回家》講嘅係現代城市人放咗工之後,去到居酒屋嘅一個片段。
情願揀留喺居酒屋搵附近的人傾訴,
都唔想返屋企。

相信「經過屋企樓下都唔想返屋企」呢個情況唔多唔少都有遇過,舉幾個情境睇下有冇一個係曾經嘅你:

①  「#還未成功不敢說回家要再打拼一下」
你對自己有啲要求,甚至家人對你嘅期望都係相當高。但係呢一刻嘅你,同你心目中想要嘅地位同權力仍然有一段距離。唔想返屋企,唔想展示到你落魄嘅一面畀屋企人見到,驚佢地見到你唔太夠朝氣擔心你。盡量減少同屋企人嘅交流,唔返屋企。

② 「老竇打個電話叫我唔好咁夜返
  我話『老竇我好忙人在江湖我冇得揀』
  其實仲未諗到去邊只係一早已習慣
  大城市空虛  夜太黑  人太累 」
對「屋企」呢個概念開始模糊,同家人嘅關係亦變得疏離。返咗成日工,喺繁囂嘅地方生活咗一日,希望返到屋企有一個比較安靜嘅環境去整理一下自己嘅思緒,預備聽日再重新出發。但係太多人屈喺屋企,彷彿連自己嘅私人空間都冇。就算好攰,想自己靜一靜,其實唔知可以去邊,但係都唔太情願返屋企。

③ 「#熟睡到晚上獨對四面牆」
一個人住喺一個只係夠伸腳而冇其他娛樂嘅空間。搬出嚟住嘅原因有好多,而且各式各樣,可以係因為父母,因為工作。可能因為意見不合,逼住每個月儲少一嚿錢都要出嚟住;可能因為想喺返工之前可以瞓耐少少,所以搬近啲公司。雖然你有能力擁有屬於自己嘅空間,但係其實你唔甘心只有自己擁有呢啲空間,所以唔想返屋企。

喺呢個時勢,各界都呼籲大家為人為己,冇咩事都盡量留翻喺屋企。正所謂「個個都返屋企,唔通個個都想返屋企咩」。再延伸落去,就會變咗更深入去探討土地問題等等。如果真係逼不得已要出街,都記住保護自己,祝身體健康。

@pantherchan - #不想回家
#Cantopop #hkmusic
#當我迷失時聽著的歌 #油尖旺金毛玲 #爵士日與夜

TOP

返回列表