Bluejays

大台已經冇哂年輕觀眾，
後生歌手唱左新歌 都唔會有年輕觀眾聽到，
年長觀眾只會問，係邊個唱緊乜野歌。
如果後生歌手唱懷舊歌，
還可以博得年長觀眾一句，呢個後生仔唱歌都唔錯，
總算叫做令個歌手多左人識。

呢班年長觀眾，唔會買碟，
但去到電器舖見到個歌手賣電器嘅廣告，
可能會望多兩眼甚至買埋。
到仔女扭計要去聽個後生歌手嘅演唱會，
啲父母亦會有更大機會肯出錢甚至陪佢去。

大台已經唔係做 年輕市場 好耐，
想翻轉頭，亦已經冇廣告商去支持佢翻轉頭，
當得翻年長同細路觀眾嘅情況下，
唱懷舊歌係唯一 讓大台觀眾 對後生歌手 有印象嘅方法。

或者你好難想像，有幾多大台觀眾，
年年見 Sony孖寶 上 勁總 都唔認得佢地，係到今年先認得。

我親眼見過唔少 阿媽 陪啲十歲左右 嘅小朋友，
去買 Alfred 啲碟同演唱會飛，
個大嘅肯定唔識啲歌，個細嘅亦肯定聽唔明啲歌，
但你十歲就已經開始聽嘅歌手，你會跟一世的。
呢個就係大台嘅做法，嚴格嚟講，佢係訓練緊再細嘅一代。

Bluejays

The whole thing with 翻唱碟 mostly having jazz arrangement is because it's cheaper to produce, which is really sad...... slowly killing the HK Cantopop music industry
boy4dudes 發表於 2017-2-4 12:33

對年長聽眾嚟講，jazz 係最易入耳的，
因為聽開二三四五十年代歐西流行曲嘅，全部都係 jazz。

仲有就係，人越老越怕嘈，
點支蠟燭，開支紅酒，
就梗係想聽啲 mellow 啲嘅音樂啦。

Jazz，係因應 獨特市場 嘅喜好而做的，唔係合埋眼亂來的。

Bluejays

明既明既，
老人家係有市場，但可唔可以各有各做。
明明以前相安無事，
你唔搞我我唔搞你，做乜而家要迫人 ...
艾石仔 發表於 2017-2-5 01:01

你唔搞我我唔搞你嘅年代，係當兩邊都可以各有各賺錢嘅年代。
當一邊連 唔蝕錢 都做唔到嘅時候，
咪要諗下點樣將 陳慧嫻 盧冠廷 嗰個市場擴大嚟做囉。
所有野都係連鎖反應，問題嘅根源都係一樣。

Bluejays

或者我講得再殘酷啲，
首先係 年輕聽眾 離棄廣東歌，現在係 唱片工業 離棄 年輕聽眾。
佢地唔係迫 年輕聽眾 去聽翻唱碟，而係唔 care 年輕聽眾 聽唔聽。

點解 EEG 明知好危險，都要搏 Hins 上大陸，
唔係淨係想賺大錢咁簡單，
而係根本 Hins 現有嘅市場，爆幾多首 hit歌 出嚟，
都養唔起 EEG 要放喺佢身上嘅開支。

反而 Vincy 靠隻翻唱碟，加上佢開支會細啲，就應該可以養得起。