曾遭鍾嘉欣吳若希鄭俊弘「蹺起」 何哲圖入馬會欷歔扯煙
http://hk.apple.nextmedia.com/enews/realtime/20170414/56560675
身為唱片公司老闆嘅何哲圖,佢個名最近不時出現喺娛樂新聞,點解?之唔係因為佢旗下嘅阿Fred鄭俊弘被指一腳踏兩船,撻着上緊位被力棒嘅何雁詩。
上周三(5日)事件曝光後,何哲圖傍實愛將阿Fred現身回應否認同何雁詩撻着,第二日何哲圖出席活動仲堅稱阿Fred同何雁詩二人係朋友相處,佢仲自信滿滿咁話:「如果佢哋拍拖會同我講!」點知,唔夠半日阿Fred拖實何雁詩現身機場公開認愛,真係兜巴摑落老闆度!(相關新聞: http://bit.ly/2oEyeOi )
何哲圖畀愛將一嘢蹺起都唔係第一次,之前仲有:鍾嘉欣閃婚兼生B、吳若希閃電復合兼有喜、有傳許廷鏗約滿離巢,加埋今次阿Fred同何雁詩事件,都咪話唔hurt!畀至親嘅愛將們蹺起,身心飽受摧毀嘅何哲圖日前就畀《蘋果》讀者Karen發起一個人好欷歔咁遊旺角。
讀者Karen憶述:「見到佢嗰陣佢拎住個環保袋喺信和行出嚟,個樣好憔悴,之後行咗去隔籬馬會,出嚟嗰陣見佢邊行邊望住馬路,但又唔係想截車,唔知佢想點。」當時何哲圖企咗大約兩分鐘,就過對面馬路,再企喺嗰垃圾桶隔籬扯煙,Karen說:「佢好似好唔自在咁,扯咗兩啖就急急腳走人,去咗超市唔知買咩。」
唉……見到何哲圖,真係想同佢講:「在心中!」
|