【Hotcha合體二缺一】Regen分身排戲 Crystal搞舞台劇望朋友俾面
今日晏晝到荃灣現身支持,由化妝KOL轉型做歌手嘅女新人林若盈(Mellissa)今日喺荃灣舉行新歌MV發佈活動,獲前組合Hotcha嘅張惠雅(Regen)、張紋嘉(Crystal)現身支持。
自組合拆夥後,Crystal表示過希望能夠主力做舞台劇工作,近年亦主力向呢方面發展嘅佢透露:「o依家計劃緊希望有機會成立自己嘅舞台劇品牌,同步自己亦寫緊劇本。」仲話希望到時Regen同其他朋友會俾面演出。而同樣忙緊舞台劇嘅Regen就話:「o依家同時間綵排緊兩部舞台劇,都係第一次兩部戲一齊排,一部係做大學生,另一部係畢業之後做咗媽媽,兩個角色反差好大,成日好驚排嘅時候會撈亂。」
講番今日主角Mellissa,Regen同Crystal均大讚對方係參加歌唱比賽出身,所以喺唱歌方面具有實力,更特登嚟支持對方。而Mellissa受訪時直言講到首次出席屬於自己嘅活動心情相當緊張,佢話:「頭先播MV嘅時候差啲喊,好彩忍得住。」Mellissa又透露正準備緊新歌:「我好鍾意聖誕節,所以會做一首好有節日氣氛嘅歌,好多謝公司畀咁大自由度我。」 |