|
 
- 積分
- 8127
- 貢獻
- 318
- 參與
- 3555
|
居然可以係網上社交平台睇到前兩日堅姐一圈圈訪問文字版本
堅=堅姐 主=主持人
旁白 香港樂壇歷史上有唔少成功過江龍 台灣嘅葉蒨文 又或者北京土生土長嘅王菲 都先後過江在港成名 被譽為天后級人馬 近年一位準天后亦係公認唱功夠堅嘅過江龍 七年嚟佢憑藉堅持同堅毅 終於打響名堂 今年更成功首度殺上紅館殿堂
堅:大家好 我係李幸倪 星光背後有我
播很堅強
旁白 很堅強係來自大馬有堅Lee之稱嘅李幸倪2018第一首叱咤冠軍 自從兩年前轉投環球之後 Gin Lee音樂事業穩步上揚 走上一線女歌手階梯 佢先後推出嘅begin同live in the moment除咗大賣 亦連續兩年係叱咤樂壇頒獎典禮獲得女歌手銀獎 短短七年 已經累積八首叱咤冠軍 由唔識講廣東話 到今年六月開處女紅館個唱 呢位堅Lee的確夠堅
主:2018年首先要恭喜我身邊嘅李幸倪 因為很堅強成功獲得叱咤冠軍
堅:多謝
主:另一樣要恭喜你嘅 就係嚟緊六月廿三號將會第一次企上紅館舞台係嗎
堅:係嘎 好興奮
主:我想問 八年前你係香港出道 有無一個目標 我要有一日企上紅館舞台開自己個人演唱會
堅:其實係有嘅 要講返好耐好耐以前 點解我會想做歌手 其中一個好大原因係因為細個睇到啲巨星企係大舞台 有靚嘅燈光 靚衫
主:你睇嘅係香港演唱會?
堅:香港 台灣 外國 我好中意睇concert DVD 就好羨慕 覺得如果有一日我都可以企咁大舞台唱歌 好多人嚟睇我 有尖叫聲掌聲 就好啦 就係一個咁嘅渴望 慢慢走上呢個音樂旅程 到嚟到香港時候 可能係啲頒獎典禮見到啲歌手上台攞獎 心裏都會諗 唔知幾時先會到我攞到女歌手獎呢 跟住就係 唔知幾時先會開到紅館show呢 咁就係唔同時候許下唔同願望啦
主:應該係舊年申請檔期啦 當你知道真係批咗個期俾我去到呢個香港樂壇最高殿堂 果一刻嘅感受係點?
堅:第一下係興奮嘅 之後就好緊張啦 有壓力啦
主:點解 你表演咁多錢
堅:籌備咯 期望好高 好想將第一次做得好好 第一下係終於攞到期啦 第二下係諗我個show要點樣做 即刻好嚴肅啦 諗有乜嘢想做嘅 有乜嘢歌好想唱嘅 就已經去咗籌備mode
主:演唱會title係first of all 即係最初啦 點解會定呢個名呢?
堅:呢個名其實係我諗嘅 都諗咗一堆名 開頭 我好想個名係同第一次有關 類似first one呢啲 first可以係咩呢 first of all好好 好中意呢種感覺 你知道 好似致辭嘅時候好多人中意講first of all I'd like to乜乜乜咁樣 係一個好好開頭 仲有睇個字呢 係好多場嘅第一次 所以我好希望係一個好開頭 之後有好多好多其它演唱會咯
主:但呢個演唱會海報好shocking pink顏色 頭髮 未試過係咪
堅:未試過 第一次 想耳目一新 希望俾大家感覺係 哇 邊個 就係想要呢一下效果 想catch到大家嘅attention 如果你都覺得有呢個效果 咁就應該成功咗
主:咁係咪依家已經需要練氣修身 需唔需要好辛苦做gym或者weight training
堅:跟trainer去做gym 除咗跑步 做體能work out咁樣 仲有排舞 本身已經即刻就瘦
主:以前好小見你載歌載舞 今次係咪想突破 有一part或幾part又唱又跳
堅:會有一part勁歌熱舞嘅 因為其實雖然我係大家面前好小又跳又唱 但我自己係好中意跳唱
主:但好辛苦 以前無試過唱live跳唱十幾分鐘?
堅:無 一兩首就有 十幾分鐘係第一次 依家度緊呢part
主:擔唔擔心體能同氣
堅:其實有啲難度 好似果日presscon 準備五分鐘表演 一小part跳唱 都已經喘氣 所以我知道要下好多苦功 我會好俾心機練好氣 又要跳得靚又要唱得好
主:堅Lee把聲係堅 身材都幾堅嘅 今次舞台服裝係咪特別搵人設計
堅:今次係搵xx(唔識乜水)特別設計嘅 其實係第一次同佢合作 佢幫開sandy嘅 我都好中意sandy style 有一日我問佢有無咩人可以介紹 佢話不如你試下搵xx啦 所以今次係第一次合作 我相信都會有啲突破嘅
主:講到第一次演唱會 通常可能有好多嘉賓撐場 頭先你搵sandy 佢同你合作過中國之聲 做你嘅推薦人 你有無鬥膽邀請佢做嘉賓呢
堅:其實我就未講嘅 但我已經check過期 佢ok嘅 同埋我都邀請咗佢嚟睇show 好耐之前當我知道有期 第一時間就同佢講 希望佢嚟睇 但其實我係想請佢做嘉賓嘅 呢個我會遲啲講
主:之前你講過想係演唱會唱王菲同sandy嘅歌 係咪呢兩個女歌手影響你好大呢
堅:係嘎 細個中意王菲嘅 因為我家姐好中意佢 買曬佢cassette帶 係屋企成日播 播到我都識唱 受佢影響 sandy反而係大個啲開始自己唱歌 聽到佢演繹 覺得佢係自己心目中真正歌者嘅目標同風範吖 認識咗佢之後更加中意佢嘅人同音樂咯
主:佢又跳又唱好勁 你有無問佢技巧呢
堅:無吖 我見佢 同佢合作都係抒情歌為主 未有機會問到跳舞果part
主:你本身今次演唱會揀歌都會好頭痛啦 你出過五張香港專輯 要編排得好有心機先得 係咪多數會以環球時代為主 定係早期bma作品都會有
堅:兩個都會有 啱啱推出咗精選碟 就係我bma時代 11到13年嘅精選啦
主:裏面好多歌都好多人中意啵
堅:係吖 就係知道好多fans都想聽 例如玫瑰的故事 十年如當日 Falling 今天終於一人回家 所以推出咗呢隻碟大家可以一齊溫習啦 因為到時舊歌新歌都會唱
主:即係又會唱人地嘅歌 又會唱自己嘅歌係咪 但編排都好頭痛 係自己編排定係交俾監製
堅:我自己編 然後再同監製去度 呢part搞好耐 因為發現其實有好多歌都好想唱 但一個show最多唱30首歌 度下度下就無嘎啦 咁就真係shortlist咗啲特別有意義 特別受歡迎嘅歌
主:ok 以下呢首歌一定會係演唱會出現 因為係你轉投環球第一首唱到街知巷聞嘅歌
播雙雙
旁白 13年玫瑰的故事 雖然係Gin Lee係bma時代舊歌 但呢首歌亦係唔小歌迷心目中嘅摯愛三甲之一 今日嘅Gin Lee係一朵殺上紅館殿堂嘅鏗鏘玫瑰 但係玫瑰盛放之前 係大馬土生土長嘅李幸倪 已經備受音樂栽培
主:我睇資料 你出生於大馬新山柔佛州 成長大部分時間都係果度
堅:到中學係 大學就去咗吉隆坡
主:果度係咪近郊啲
堅:果邊係星加坡隔離 都係馬來西亞第二大城市
主:同香港係咪好唔同
堅:其實都好唔同 節奏慢好多 空間大好多 人少啲 講嘅語言多數係華語啦
主:即係國語係嗎
堅:係 同埋我地接收到媒體 多數係星加坡電視電台 一係英語一係國語
主:你嘅廣東話點學
堅:我上嚟香港先學嘅 11年先學嘅
主:唱功叻 語言天分特別好
堅:係嘎 我都覺得係 對音係sensitive啲
主:你成長於音樂世家 爸爸係鼓手 媽媽係主唱 係咪因為佢地影響到你中意音樂
堅:一定係 其實我屋企有兩樣嘢氣氛好濃厚 一係音樂 二係運動 因為父母又係運動員又係音樂人 佢地相識都係因為音樂 由細到大除咗音樂 爸爸又有踢足球 我細個會係屋企 車上唱歌咯 玩樂器
主:爸爸有無搵你夾band 教你唱歌
堅:有 小學開始代表班級比賽 班主任成日揀我去參加嘅 唔知點解 我就會問媽媽唱咩歌呢 佢陪我去補習嘅時候 係車程中記歌詞 教我唱歌
主:唱歌嘅技巧係邊度學返嚟
堅:再大啲嘅時候 夾band就係十六歲 真係正式表演嘅 就係同爸爸一齊 細個係媽媽教點唱 十六歲開始夾band係同爸爸夾 佢搵咗家姐同我唱歌 再搵其他朋友一齊 排練咗半年先出去演出 果次係我真正體會到做一個專業表演者要做嘅嘢咯
主:你中意唱歌 但據我所知你曾經兩次推過唱片公司簽約邀請 點解呢
堅:我係一個演出做嘉賓 唱咗自己作曲填詞嘅一首歌
主:你十七歲已經自己作曲填詞
堅:十六歲
主:邊個教你嘎
堅:自己咯 好奇怪 自己就識咁樣咯 當時唱完歌 落到嚟有唱片公司負責人同我講 你唱歌好聽 有無興趣簽約 但我當時要考試 好似香港會考咁嘅 覺得係咪唔係咁好 因為始終想完成學業先 所以擱置咗係一邊 呢啲嘢等等下就無嘎啦 但我都無後悔 因為我覺得學業係好重要嘅 每個人嘅qualification好重要
主:跟住你係大學讀音樂 但廿一歲參加大馬環球搞嘅唱歌比賽攞冠軍 又搵你簽約 你又唔簽 點解呢
堅:因為又係未讀完大學 呢個我唔知係咪關處女座事啦 啲嘢好想完成曬先去下一步咁咯 果時候心諗 讀音樂已經好辛苦 成日喊 因為每四個禮拜交一次project 我地要作曲監製一首歌 錄音 做好多嘢啦 每個月都有應付唔到嘅功課 已經handle唔到 仲要做歌手? 所以都係諗等我搞掂所有學業先 但到我覺得自己ready時候 再搵返人 又無消息啦
主:09年你係大馬出過一張專輯 叫做one and only 呢個機緣又係點嘅呢
堅:讀完大學之後 不停搵人幫我出碟
主:人地當初搵你你又唔肯
堅:係啦 到我去搵人嘅時候 原來咁難 真係唔理我嘎 試咗好多次 都係俾人拒絕 甚至聽好harsh comment 話你都係唔得嘎啦 都係唱返啲商演算 唔好做歌手呢啲好難聽嘅說話 但我唔服輸 點解我未做你就話我唔得呢 果時遇到一個好朋友 既係樂手又係監製 佢嘅夢想係佢嘅作品被publish 我嘅夢想係好想俾人認識 好啦 我地一齊work on album咁咯 一齊用咗好長時間自資做一隻碟 當中90%歌詞係我自己填埋 有啲歌係我自己作埋 另外就係果位朋友作啦
主:一出嚟就好受歡迎 攞到幾個獎
堅:又唔係好受歡迎 叫做攞到幾個新人獎
主:回唔回到本呢
堅:回唔到 印咗好小數量 唔知 無再計返 過程就係咁 純粹好想出一隻碟 靠自己嘅力量出咗第一隻碟咯
主:之後你俾人認識係參加台灣超級偶像踢館 或者係嚟香港參加超級巨星踢館 呢個係邊個安排 定係你自己搵機會呢
堅:呢個係我出碟之後去到一個樽頸位 馬來西亞華人好小 去到一個位 點樣可以再做得好啲 幫自己搵一個更好舞台呢 係呢個時候我表姐符瓊音 佢係幾屆之前超級偶像參賽者 當時佢地周圍搵人踢館 佢就問我有無興趣 我當時出完碟 覺得去做下宣傳都好 所以就上去試下咯 因為唔去都無其他地方去 跟住之後都好順利 兩場踢館都贏咗 有啲迴響咁 台灣完咗之後 香港果期都好興踢館 問我有無興趣去埋 我心諗 都唔爭在啦
主:當時你係台灣踢館之後有無諗係台灣發展
堅:其實有嘎 完咗踢館賽之後見過唔同唱片公司 但都傾唔埋嘅
主:唔係你idea合作方式
堅:兩邊都覺得唔係最適合咯 係等待階段就嚟咗香港 其實我嚟香港嘅時候完全係無expection嘅 完全唔知會有咩收穫迴響 唔知道嘅 點知一唱完 個迴響簡直係爆咗咁 所以到依家我都好多謝fans 因為係佢地俾咗我勇氣嚟 因為如果無咁大迴響 我係無勇氣嘅 人生路不熟 又唔識廣東話 無一個朋友係呢度 就自己嚟發展係呢度生活
主:但當時最後果集你係輸咗俾林欣彤 爭小小 會唔會唔抵
堅:唔緊要 呢啲節目效果 贏輸嘅嘢
主:有無內定一定要俾林欣彤贏
堅:呢樣我就唔知啦 但我覺得輸贏唔緊要 最緊要有個舞台可以俾大家認識 最後我得到機會嚟呢度 呢個係更重要
播今天終於一人回家
旁白 巨星踢館成名之後 Gin Lee簽約羅傑承嘅bma出道 約滿之後 佢分別參加中國好聲音同中國之聲兩個歌唱比賽節目 參加中國之聲第一次以天黑黑參賽嘅時候 唱完呢首歌即時激動到淚灑當場 Gin Lee的音樂路的確夠堅 但也隱藏唔小淚水
主:頭先講到你參加超級巨星 一夜成名 點解會選擇簽約bma呢
堅:踢館之後都有幾間公司搵我傾 傾過之後就覺得好想同bma嘗試合作
主:羅傑承親自搵你?
堅:唔係 佢地經理人搵咗我馬來西亞經理人傾
主:好大勇氣 一個人嚟呢度
堅:係吖 我用咗一個月時間考慮 其實心裏面的答案係好想嚟嘅 因為我覺得我係一個願意接受挑戰嘅人 唔試真係唔知
主:當時開始學廣東話係咪 點學
堅:一嚟就學 好艱辛嘅過程 基本上我用咗三個月時間 我又無朋友 無一個識嘅人
主:住係公司宿舍定自己租
堅:自己租間好細嘅屋仔咁咯 樓仔嘅一部份 總之好細嘅一個空間
主:使唔使自己俾租金
堅:自己俾 所以吃力嘎 公司有allowance 所以用嚟俾咁咯 果段時間工作未係好多 要籌備專輯 未識講廣東話就要識唱廣東歌 諗起都唔知點做
主:唱國語歌發聲比較容易啲
堅:好唔同 廣東話其實係好難嘅一個語言 好多唔同位置發音 咁我點樣學呢 就係一路煲劇 由朝到晚都係煲劇 總之好睇唔好睇嘅我都睇 唔係真係想睇 而係為咗睇人地點講嘢 然後睇字幕 知道原來係咁樣表達嘅 睇完仲要睇埋新聞哦 係正音點讀 正確發音 生活化點講 正式點講
主:當年好多人話你簽咗間細公司 有啲浪費咗 你自己睇返果幾年呢
堅:其實我一路相信每個人嘅路係好唔同嘅 我自己屬於踏實嘅慢慢嚟嘅模式咯
主:但係咁 聞說你係離開bma嘅一段日子係好迷惘嘅 迷惘在咩
堅:離開之後 簽新公司之前 因為無去向
主:係你自己想離開
堅:完咗約 其實未完約之前都有傾 有同羅生傾之後點繼續 但bma已經唔再發展唱片部 無辦法 要搵新唱片公司 你知道等待嘅時間係好漫長嘅 我確定要離開bma嘅時候已經有發放消息 welcome anyone嚟傾 期望有同唔同公司傾過 但傾唔成 好低落 應該點算呢 無公司無收入 但要交租 好現實嘅事情 一個月一個月咁等 唔知等到幾時 當時嘅我唔會知道會有環球嘅出現 其實去到一個位 下個月無得交租的話我就真係要走嘎啦
主:但未接觸環球之前 有一段時間你俾人感覺係想打開內地市場 去咗參加中國好聲音 呢個機緣係點嚟嘅呢
堅:呢個就係我最迷惘嘅時候 一日之內有八個人同我講 不如你去試下啦 其實佢嘅節目組每一年都搵我 但係我唔使考慮就即刻turn down 其實我唔中意比賽唱歌 雖然我係踢館出身 我覺得我係好享受表演 但係要俾分 就會令成個表演好唔自然 所以我一路都唔係咁中意 但去到果個位呢 我都無嘢做啦 I'm nothing to lose 如果唔去我都係又繼續等 係度喊 不如去試下啦 唔理中唔中意 總之要踏出去搵個機會啦 我就係咁樣同自己講 所以就去啦
主:自己一個人去 無人幫你 無助手?
堅:無吖 去到係素人一個
主:難怪你果個妝
堅:其實都係節目效果 如果俾我自己揀 我一定唔會咁樣 會著靚啲 但佢地想成個過程睇到人嘅變化蛻變
主:我覺得你揀嘅歌唔係好似其他人咁要爆 要好叫咁 係咪你嘅選擇
堅:呢個係我嘅選擇 我自己想咁嘅
主:最後就咁樣輸咗 你唔覺咩
堅:我當時嘅狀態係唔想爆咯 依家諗返有幾個原因嘅 自己做咗歌手 所以心態上已經唔係以前果個戰鬥格 以前踢館就係呢個戰鬥格 因為無人識吖嘛 你做咗幾年歌手之後心態會轉變 覺得想追求嘅嘢又唔同咗 又唔想下下去到好似要曬冷咁 反而想追求有一首好感人嘅歌 已經足夠 我首歌會擺上網嘅 如果十年後廿年後你聽返都覺得好正 咁我已經成功咗 其實我想要呢樣嘢啫
主:參加咗呢個節目幫唔幫到你
堅:一定幫到 我再返嚟嘅時候出咗雙雙係好受歡迎 我覺得唔多唔小都係有之前呢啲比賽幫助
主:你係中國好聲音係周杰倫隊 中國之聲係同林憶蓮 接觸過呢兩個巨星 邊個對你影響大啲呢
堅:我覺得係sandy 其實我係呢個節目認識佢嘅 我收到電話嘅時候非常忐忑 因為真係咁橋 完咗中國好聲音 係北京嘅機場要返嚟嘅時候 我歎一口氣仲同自己講 終於完啦 我要返去做自己嘅音樂啦 行多兩步就收到節目組電話啦 話林憶蓮推薦咗你 想你參加我地節目 當時心情係 又嚟? 但另一方面係sandy哦 我無得say no 跟住就都諗咗一個禮拜 因為當時時間都好緊急下 要即刻決定去唔去 唉 死就死啦 再挨埋佢咁啦
主:我見到片段 你每唱一首歌 佢有都同你傾 接觸係比較周杰倫為多係嗎
堅:多好多 聽佢歌藝已經知道佢一定要求好高 中國好聲音係設計好曬嘅 中國之聲雖然有推薦人 但佢會搵我同我傾想唱咩歌 甚至遇到難題 唔知想唱咩歌 跟住佢話how about yourself 你自己想唱咩就唱咩 俾到呢啲指點我 我覺得係好重要 所以揀咗天黑黑 佢仲同我coview點樣演繹 我錄俾佢聽 聽完之後佢會俾意見 例如 不如呢度編曲咁改 可以幫到你起伏 不如呢度你試下咁唱 佢係好俾心機好用心同我交流
主:雖然呢個比賽無話要鬥到最後 但都留低好多好嘅嘢俾你 呢個機會好難得 講到呢度要休息一陣 轉頭見
播和每天講再見
旁白 Gin Lee唱過唔小感動過人嘅情歌 為咗唱歌同音樂理想 佢選擇離鄉別井 一個人係香港生活 除咗犧牲唔小同家人朋友相處嘅時間 原來佢亦都犧牲咗一段青梅竹馬嘅戀情
主:其實Gin Lee係大陸打響名堂之後 你其實有無諗過 不如繼續留低係大陸 可能賺多啲錢 或者華語市場更適合你 點解係都要返嚟廣東話市場呢
堅:呃 因為我中意香港咯
主:但係環球搵你之前 你唔會覺得係有一個難度咩
堅:因為我11年開始已經係度生活 建立咗幾年嘅嘢如果我又走 又要重新適應返 其實我好想留係呢度再繼續發展嘅
主:你咁諗真係好堅啵
堅:係吖 很堅強 我心目中就係希望紮根呢度 跟住可以同時去第二度嘎嘛 就唔會話住係北京或者住係上海 得閑先返嚟 我反而想住係香港 可以去第二度做嘢 即係個base一定要係香港
主:譬如你頭先講到唱天黑黑 一定係諗返起係大馬嘅屋企人 唱到喊曬 佢地有無擔心你
堅:擔心與唔擔心之間啦 唔擔心就係因為佢地知道我好懂事好tough好識照顧自己 擔心的話係媽媽擔心多啲咯 令我印象好深刻嘅係第一次佢地嚟探我嘅時候 當時我仲住係一個好細嘅地方 你知道大馬屋好大 求求其其幾千尺 但我當時住百幾二百尺 好細 佢地一嚟睇我媽媽已經喊 心痛原來我女係住咁細地方 果個地方一個end行到一個end係三步路 細到咁 佢地無睇過咁細嘅住嘅空間 但我唔知 係之後媽媽同我講返 當時佢仲要唔俾我睇到 遮遮掩掩
主:會唔會覺得自己點解要鬥氣 要咁tough留係香港 令屋企人咁擔心呢
堅:其實我開頭係完全完全無呢種感覺嘅 我會覺得後生就係咁嘎啦 要闖要拼 你唔受啲苦點成大器呢 我直情覺得人係一定要經歷啲難關嘅 但我會唔會有啲負面時候呢 有嘅 去到迷惘期嘅時候 between環球同bma嘅時候 果陣係我最黑暗嘅時候 我嘅負面情緒不停湧現不停出嚟不停問我自己 點解你要咁傻 點解你要嚟呢度受呢啲苦 點解你要係呢度喊 呢度又無人無物 好多呢啲負面說話出現啦 係咁叫我放棄 係咁叫我返屋企
主:阿媽有無開口叫你返屋企
堅:其實果段時間無人知 我屋企人都唔知 得我一個知
主:但你經濟上都要支持嘎 會唔會需要你屋企人幫你
堅:無吖 完全無叫過佢地幫手 完全無提過自己好辛苦 無講過任何嘢 我係完咗所有唔好嘅嘢 簽咗新公司 一切都光明啦 我先講
主:就係環球登勤搵你
堅:係啦 其實都唔係直接同佢地講 而係透過啲訪問講出嚟 咁佢地先知咯 喊曬問我點解唔講 點解要自己撐 跟住我返大馬講返同佢地攬住一齊喊
主:16年你第一次上叱咤舞台攞獎 會唔會有個心態係努力真係有回報呢 好似begin賣得咁好 證實挨得有回報咁
堅:係 呢個係我深信嘅嘢 我一路都相信只要你ready 裝備好自己 加點耐性 你一定會有你嘅機會 一定會成功嘅 其實做歌手我最大得著之一係磨練到我耐性 一路睇返 我由未出道到依家 好多都係我耐心等待返嚟嘅嘢 所以我係好相信努力係會有回報嘅
主:但係為咗音樂理想 要放棄同家人朋友相處 睇返轉頭你覺得值唔值
堅:對我嚟講家人係最重要嘅 依家我可以為佢地做嘅嘢其實多咗 因為做咗歌手 我成日會去唔同地方做show 可以帶埋佢地去
主:得嘎?
堅:得 say behind 好似我上年去咗歐洲商演 覺得係好機會 就請埋父母一齊去 就做到family trip咁 我經常有呢啲trip可以一齊去玩咯 其實我係好爭取呢啲時間嘅 因為佢地唔係成日係身邊 我一有時間就會返去或者同佢地去第二度玩 或者佢地一有時間就飛過嚟 其實我地見面幾多 啱啱農曆新年假期就同佢地相處咗成個月 去咗澳洲 我會爭取呢啲時間同佢相處咯 反而係我嘅小學中學同學好小機會見 我會覺得有小小可惜嘅 六月佢地會組團上嚟嘎啦 佢地好好 已經買曬機票
主:我想問 你為理想為音樂為唱歌 可以咁大勇氣咁堅強係香港八年 但自己感情生活有無諗過呢 有無初戀男朋友係大馬 嚟香港之前有無男朋友係大馬
堅:有 嚟咗香港分咗手咯 long啲係唔work嘎 唔係無諗 而係無將focus擺係果度 唔係第一咯 依家係衝事業嘅時候 但又唔係話完全唔接受嘅
主:咁唔會覺得可惜咩 嚟咗香港就分咗手
堅:果個時候係覺可惜嘅 都會喊 同埋我同佢係由細到大到識 青梅竹馬果啲 好好朋友嘅 到依家都可以做好朋友果啲 由細識到大 唔會話斬就斬嘅 佢當時話我都會祝福你嘅 會默默支持你 咁就分咗手
主:梗係啦 你嚟咗香港八年 唔通要人等你八年咩
堅:其實我依家雖然唔係話有好大成就 但可以踏上紅館都係一件好開心好驕傲嘅事 我都會諗返呢啲成就咗我嘅人咯 都會多謝佢地
主:嚟緊六月紅館演唱會 會唔會請埋佢嚟睇
堅:有請嘅 但佢話驚太感動會喊 有啲唔想嚟 我話你自己諗啦 我就好想你嚟嘅 可以嚟就嚟啦咁
主:大家了解到Gin Lee呢位夠堅嘅女歌手啦 好堅強 多謝你同我地分享啦 送你最新冠軍歌很堅強俾大家 預祝你堅強地成功good show
堅:多謝
播很堅強
旁白 大馬過江龍李幸倪中學時期係一位短跑運動員 佢嘅星光背後亦隱藏運動員從唔認輸嘅體育精神 佢話俾我地知 只要唔放棄 努力付出一定有回報 或者唔小人覺得佢行咗唔小冤枉路 但佢學識等待 從來唔會後悔 一直相信自己所行嘅路 事實亦證明只要你肯付出 世上係無懷才不遇呢回事 今日星光背後嘅內容 大家可以去到881903視電台聲畫同步重溫
完 |
|
發表於 2018-3-24 09:21
| 
