楊千嬅噚日喺紅館舉行咗佢頭場跨年演唱會《三二一Go!演唱會 2017》，成晚過程好溫馨，好多歌都耳熟能詳，fans可以一齊唱，就好似一切見證千嬅成長咁。
呢啲咁珍貴嘅時光，同睇住小朋友長大差唔多，過咗就冇，所以有人就想影低呢啲片段喇……不過演唱會就有講明：不准攝錄。
但有幾多人都係會忍唔住偷拍呢？你或你身邊朋友總有睇過演唱會，答案不言而喻啦。而噚晚頭場呢位仁兄／小姐，舉高隻手唔使怕醜，ready下千嬅唱歌一刻。
而呢個moment，咁啱就俾大會拍到正，就好似人形蜈蚣咁，你影千嬅，大會影番你影千嬅。講明係大會攝影，咁呢位人士舉機盜錄一刻，成個紅館都睇得見。
寰亞發言人梁小姐接受《蘋果》電話訪問，稱：「其實每次都有一啲人睇演唱會嗰陣用手機拍拍拍拍，所以我哋每次都請大量保安捉人，一見有人拍就勸佢停止，通常一般都聽嘅。影相唔落閃燈尚可接受，但偷拍真係唔好！」
大家點解總係唔可以專心聽歌嘅呢？點解睇騷又要上網又要覆WhatsApp又要打卡又要拍片，唔忙咩？話晒張飛咁辛苦撲番嚟吖！
其實係咪咁岩影到咋 | 
發表於 2017-12-24 13:41
| 
