- 積分
- 10116
- 貢獻
- 781
- 參與
- 9331
|
#CMMetacritic Vol 1
泳兒《Fever》
評分:26/100
我一直理解唔到泳兒對Hi-fi市場嘅吸引力。聽完呢隻碟之後,我更加理解唔到。
無可否認,呢隻碟嘅製作水準唔差,而且特意揾咗日本編曲人。不過,泳兒嘅演繹相當普通,唔少位唱到無氣咁。《晚風》最好聽係泳兒唔唱歌嘅時候,因為可以專心聽山田貴子編嘅弦樂。
另外,泳兒嘅咬字都好麻麻,比如《忘了忘不了》中嘅「緊」、「更」不分。當中又有懶音,例如喺派台歌《愛後餘生》將「光」唱成「乾」。
歌曲用上Hi-fi碟最常見嘅「Jazz」編曲。雖然前半唔少歌編法有明顯唔同,未至於太倒模,但部份編曲同旋律唔夾,而且亦無嘗試畀歌曲新感覺。後半更係愈黎愈悶,每首歌基本上聽咗半分鐘已經想飛,然後發現首歌仲有三分三十秒、三分二十五秒、三分二十秒、三分十五秒……
電影主題曲呢個名目係幾好聽,但其實只係一堆沉悶嘅抒情歌。最少其他Hi-fi歌手會願意用Hi-fi規格做新歌或者嘗試推介新一輩 (其實泳兒都出道好多年) 嘅歌畀大家聽。
同埋,泳兒練歌好嗎?
推介歌曲:薰衣草 (陳慧琳)
蔡健雅《Cherished》
評分:35/100
無諗過Tanya入環球第一隻出嘅碟竟然係一隻翻唱碟。雖然我理解到環球想幫佢保持下人氣,但實在有為做而做嘅感覺。
Tanya輕易演繹好自己創作嘅歌,但以佢嘅音樂才華黎講,竟然接受類似Hi-fi碟嘅「簡約」編曲,可見佢無用心做呢隻碟。
再加上之前推出嘅《紫》,實在好擔心佢嘅音樂事業會一沉不起。
推介歌曲:無
AGA《Luna》
評分:57/100
AGA喺呢隻碟嘗試用single collection嘅方式去做概念碟。
其實我好鍾意隻碟嘅concept,但部份歌曲感覺唔夠扣題。
AGA呢隻碟嘅演繹成熟咗,而且對編曲多咗諗法,製作水平上喺香港樂壇中相當高。
不過旋律水準唔平均。《3AM》同《孤雛》明顯好過《無期》同《Nights Without You》。
而收錄Gin Lee陷害「好姊妹」嘅《獨一無二》亦拖低咗歌曲平均質素。
AGA一如以往收錄一堆Remix同Demo,不但無驚喜而且質素唔高。
Olivia Dawn嘅《3AM》Remix古怪得黎唔過癮。重新編曲嘅Demo反而更加展示到旋律嘅魅力。
《朋友》比原版好聽,但國語咬字好奇怪。其他Remix同Demo都係可有可無。
用心製作歌曲係需要時間,但呢隻single collection唔算上乘。
希望你有日會有真‧side track啦。
推介歌曲:3AM、3AM (Demo Version)、孤雛 |
|