囡囡只係識講爸爸謝安琪：敵不過前世情人

蘋果日報
謝安琪(Kay)今日喺尖沙嘴出席「The One ·Pochacco新春行運樂團圓」揭幕禮，Kay現場同Fans玩遊戲，又唱咗首《勢不兩立》，同現場Fans握手兼自拍，場面熱鬧。

新年將至，Kay就話要準備幫囡囡搜羅新年裝，要同哥哥襯番套兄妹裝，Kay話：「佢o依家9公斤，細粒啲，所以要搵啲細啲嘅中國衫，都可以自己做，因為我媽咪針黹好叻。」Kay仲話老公張繼聰要拍劇，安排唔到旅行，但就話想勇敢啲一家去行花市。

Kay就爆囡囡牙牙學語，雖然暫時只係識講爸爸，但係個女好搞笑，又識o氹人開心，屋企充滿歡笑氣氛，Kay話：「好遺憾，我湊得佢最多，佢只係識叫爸爸，敵不過前世情人。」問到老公係咪好囂張？Kay就話：「佢唔敢，知我辛苦湊，不過應該心裏暗爽。」

現場唱完歌，Kay不停標汗，原來因為狂做運動，令體質好咗，佢話：「今日好緊張，不過體質真係好咗，做多咗運動，今朝7點跑步做gym舉鐵，以前我好怕凍，o依家我係好老婆，冬暖夏涼。」佢仲話冬天老公一凍就攬攬，好有感覺。但佢就話老公好忙，好多時都要就佢時間，佢話：「都好，我可以精簡工作。」Kay就話等老闆Juno公幹完返嚟就開始錄製大碟，因為今年計劃出嘅新碟係佢哋一齊監製，Kay身邊嘅男人都好忙喎？佢笑話：「我好旺，希望繼續啦。」