- 積分
- 10116
- 貢獻
- 781
- 參與
- 9331
|
本帖最後由 nicholashin 於 2018-2-13 12:55 編輯
為咗阻止自己不斷加長《Inner Voice》碟評,都係快啲出post先
希望唔會被圍插
#CMMetacritic Vol 4
許魏洲《時·刻》
評分:52
專輯分做15分鐘的瘋狂、光芒、獨白、異想四部份,分階段推出。呢個宣傳意念幾有趣,可惜用一首《貓》同無入碟嘅獨白表達「獨白」太單薄。四部份之間亦無連接,比較拼湊。
專輯唔算完整,但都涉獵咗唔同風格,尤其係EDM。兩首英文歌曲風上最進取,《Rio》更有大段screaming,但奇怪嘅英文咬字令歌曲扣唔少分。同樣有外國人參與作曲,《迷宮》同《榮耀》唱返普通話已經討好唔少。
呢隻碟顯示咗許魏洲唔希望音樂一成不變,演唱、作曲、填詞能力都可接受,但始終無突出嘅一面。最出眾嘅《橙色天空》其實都好保守。如果佢想音樂有突破,首先要明白內在美嘅重要。
推介歌曲:橙色天空、榮耀、迷宮
鄧小巧《Inner Voice》
評分:42+4 (支持CM會員共和榜) = 46
小巧今隻碟揾到更多幕後人合作。歌曲少咗其他歌手嘅影子,但平均質素差過上一隻碟。專輯頭三首歌撇除演繹都維持到一定水準,當中《可惜你是個人》旋律走向獨特又搶耳,編曲細膩,歌詞精準,絕對係佢出道以黎最好單曲。之後兩首較淡然嘅歌旋律唔錯,比較符合佢嘅歌唱能力,但其他方面都唔突出,拉低咗專輯歌曲平均質素。
專輯主要問題在於小巧嘅演繹。同上隻碟一樣,佢嘅高音虛浮,滑音唱得太機械,亦控制唔到自己用聲嘅力度,演繹唔到歌曲嘅層次。問題最嚴重嘅係《兩溝》同《心靈作家》,後者嘅編排更將小巧嘅瑕疵放大,令人打冷震。《可惜你是個人》嘅心態變化亦唔夠明顯。
小巧可能太常唱高難度歌曲,停留喺「唱啱音」就夠嘅階段,所以演繹音域較窄嘅《和好》同《將沙拋給一片海》亦無辦法將歌曲昇華。
專輯表達概念亦有唔少問題。呢隻碟以溝通做主題,每首歌探討溝通嘅不同層面或方式,但歌曲連接不足,訊息亦唔一致。頭三首歌集中討論「我」同其他人嘅溝通,由《兩溝》、《心靈作家》嘅隔膜到《可惜你是個人》決定排除萬難同人溝通,轉折尚算恰當。不過,之後出現嘅《將沙拋給一片海》將「自我」放大,開始偏離溝通嘅意義,曲風嘅變化亦將專輯分裂成兩部份。最後嘅《和好》更演變成同「內在小孩」對話,完全無視之前希望同其他人溝通嘅意願。小巧模仿作曲人以一首《Children Song》為專輯總結,但歌曲庸俗得似心靈作家最厭倦嘅心靈雞湯。「世界有美好 只要擁抱 你便看懂」此等華而不實、空洞無物嘅歌詞,不但與前面歌曲訊息格格不入,更將專輯推至極尷尬位置。專輯歌曲未能做到環環緊扣,虎頭蛇尾,有欠完整。
另外,呢隻碟表達概念時仍然走唔出第一隻碟《The Strength of Weakness》嘅框架,歌曲編排同訊息都好相近。《兩溝》、《雅俗》都係想破舊立新。《心靈作家》、《煩可寧》係自我麻醉、自欺欺人。《可惜你是個人》、《荒唐》表現一種固執。《將沙拋給一片海》同《強弱》就係接受自身。《和好》、《不藥而癒》就係同自己溝通,積極走出困境。其實歌曲編排唔一定係「起承轉合BBQ」,處理內心問題亦唔係單靠
「自療」。如果小巧從更多角度探索概念專輯嘅可能性,專輯嘅深度同廣度都有望提升。
小巧嘅團隊一直做出一定質素嘅歌,難免令人對佢有較高期望。不過,呢隻碟正正顯示佢嘅音樂出現樽頸位,不但依然駕馭唔到歌曲,而且對概念嘅詮釋流於表面。誠然,EP比大碟較難盛載複雜概念,但呢隻碟絕對可以做得更深入。歌曲欠缺深度正正阻礙佢建立成熟嘅形象。做好音樂唔係單靠揀好歌,更要適當評估自己能力,編曲上揚長避短,否則只會係吃力不討好。
推介歌曲:可惜你是個人 |
|