返回列表 發帖

【相隔兩年幾】謝安琪再入錄音室冇壓力:可能我餓咗好耐

蘋果日報

今次獻唱電影《打死不離歌星夢》主題曲《歌星如初》係謝安琪(Kay)相隔兩年幾,再走進錄音室,佢原以為會好大壓力:「我以為要時間適應,但又好神奇,可能我『餓』咗好耐,兩三年冇入過錄音室錄歌,冇緊張,因為件事好有意思,好想參與介紹畀大家呢套觸動人心嘅電影。」
戲中女孩薩伊拉華森(Zaira Wasim)獻唱印度版歌曲,歌聲一鳴驚人,同Kay有冇共通點呢?Kay話:「我接受呢個電影主題曲心態係每個人對自己阿媽都充滿感情,無論幾多都係媽媽孩子,佢聲音係細路仔,電影公司邀請我唔係想搵一個把聲相同嘅人,只係想搵嗰種感動,我為人都好感性,我同媽咪關係好好,唱呢首歌好容易投入。」Kay透露會將呢首歌送俾媽咪。

原來Kay係阿米爾汗(Aamir Khan)影迷,激讚對方係不一樣嘅好演員,每一套戲有強烈訊息,對社會有好多觀察,每次電影都好鼓勵人心。因為咁,我去搜尋對方資料,知道阿米爾汗係了不起演員,對社會好有承擔。Kay認為阿米爾汗對社會有正面影響:「好大影響,未必只係電影,知道佢有上清談節目,以演員身份討論社會實況,真係促成印度立新例,例如非法墮胎修改法例等,佢好犀利,可以運用自己公眾人物影響力。」Kay又指好榮幸今次接受呢個工作邀請。




【打死不離歌星夢】印度女性遭遇 謝安琪:女仔得到機會比較少

自古以來印度女性地位卑微,受盡社會壓迫,在國內過住屈辱生活,但隨著年代及社會風氣影響,印度女性被受關注,佢哋勇敢發聲,反映女權,希望改善生活。

印度影星阿米爾汗(Aamir Khan)作品就係以電影橋段作縮影,講出印度女性遭遇,去年主演《打死不離3父女》全球賣座,即將推出新作《打死不離歌星夢》,夥拍少女新演員薩伊拉華森(Zaira Wasim),演一套笑中有淚溫情電影,主要講述母女情及印度女性喺文族影響下遭逢變化,薩伊拉華森喺戲中演欣兒,當上幪面歌手追夢,一夜喺網絡爆紅,之後卻受到女性地位制肘,箇中艱辛嘅經歷,幸得演母親嘅梅夏維雅(Meet Vij)支持追夢。

電影廣東話版主題曲《歌星如初》由人母謝安琪(Kay)主唱,Kay睇過電影後,感動到淚崩,最能觸動佢心,就係有一幕講小女孩一路想幫媽咪掙脫屋企,好嬲媽咪點解咁懦弱,唔可以勇敢啲,覺得媽咪連累自己人生要跟住呢個軌跡,之後得知媽咪喺阿女未出世前發現胎兒係女仔,當時所有人都叫佢落咗個B,媽媽逃走生咗個女出嚟,先再抱佢返屋企,Kay聽到背後故事好感人即淚崩:「媽媽喺個女未出世前已做咗咁多嘢。呢個係印度幾嚴重問題,印度社會男女未去到平等,女仔得到機會比較少,好多屋企人發現係陀女都會墮胎。雖然係電影情節,但又係事實,每日發生真實社會問題 。」

諗起自己做歌手嘅熱情,Kay話:「潛藏最大訊息未必係歌手夢,反而係戲中小女孩好勇敢追尋夢想,帶出好多人生面對嘅困難,例如屋企資源不足,講出咗家庭環境,有重男輕女問題,好多微細描述,令我覺得感動。呢個世界有好多人追夢,香港資源唔夠之下,追夢都好辛苦,有啲人想創業、買樓都會經歷好艱辛,呢個就係人生經歷意義。」Kay有一對小朋友,年紀尚輕,若果日後要面對仔女追夢嘅問題,Kay坦言:「暫時未諗呢樣,我諗每一位父母一樣,小朋友有夢想都會畀機會。」

Kay又分享同媽咪之間嘅母女情,憶起最初做歌手,入行時年紀好大,Kay笑言:「28歲先無端端轉做歌手、做音樂,佢都擘大個口「吓」!媽咪冇栽培我呢個夢想,當時媽咪比較平靜,諗我會唔會俾星探呃,入咗一個局,當媽咪了解之後就放心。點解我咁想做音樂,我想我嘅音樂為現時香港留下歷史印記。」

Kay慶幸獲得媽咪體諒,艱苦時得到媽咪無聲支持,佢話:「香港近十年音樂行業比較艱難,屋企人唔出聲已經好好,唔好成日問做緊乜?夠唔夠錢使?唔問已經好好,我好慶幸媽咪從來冇俾壓力我,我係屋企獨女,屋企唔需要我好多支持,我好幸福,有自己空間追夢 。」

TOP

本帖最後由 myrichardac 於 2018-4-4 18:24 編輯

TOP

仲未錄?!
上年實牙實齒話留咗歌,希望好快有派台
4月都未開錄 倒不如出年先 ...
liebe 發表於 2018-4-4 19:20


謝安琪就話,已決定今年回歸樂壇。「最近忙於跟填詞人同製作人開會,一開就6小時。我就諗住5月閉關趕工,希望年底可推出新專輯。

TOP

本帖最後由 myrichardac 於 2018-4-4 19:42 編輯

反正年頭派又好年尾派又好,細公司都係拎唔到女金嫁啦!
倒不如年尾派首主打谷最女好過啦!

TOP

903好似播左 但係咪同YouTube 版本一樣?製作班底係?
jonlam2 發表於 2018-4-4 19:42


曲amit trivedi 詞 馮穎琪

TOP

東方好落力幫謝大媽宣傳,D留言笑死

https://www.facebook.com/onccnews/posts/10155911968712655 ...
Laichu 發表於 2018-4-8 03:51

10幾條友就係度自high

TOP

返回列表