- 積分
- 10116
- 貢獻
- 781
- 參與
- 9331
|
只想愛100分嘅Gin!
#CMMetacritic Vol 10
Gin Lee《Prologue》《信》《Bold and Beautiful》
評分:36 (Prologue)、23 (信)、41 (Bold and Beautiful)
Gin Lee唱功、聲線、外表、身材都唔差,現場表演功力深厚,完全有能力大紅大紫。可惜,佢對音樂觸覺不足,歌曲主題乏味,無論揾幾多個幕後人都做唔出好歌,環球嘅宣傳策略同印象塑造亦難以理解。
今年首先推出嘅專輯《Prologue》主力回顧BMA舊歌。呢個時期嘅Gin Lee形象唔算清晰,但偶然仍能收到歌曲流行度及藝術性兼備嘅作品。唯一收錄嘅「新歌」翻唱歌《天變地變情不變》已經曝光咗好耐,Gin Lee演繹唔錯,整體而言無乜新鮮感,但作為小品尚算稱職。
之後,環球突然為三首派台廣東歌推出國語版,合輯成Digital EP《信》。歌曲感覺underproduced,Gin Lee嘅國語演繹無預期般吸引。《信與不信》歌詞表現仍然遜色,更出現「別問我愛不愛你」呢類明顯唔啱音嘅句子,影響Gin Lee嘅演繹,完全失去原曲嘅吸引力。唯一明顯改動編曲嘅《堅強的動物》俗氣稍減,算係比廣東話版《很堅強》出色。《兩個我》嘅mixing比廣東話版《自我感覺還好》更無法讓人分開兩把聲,而Gin Lee嘅處理亦無咁impressive。其實三首歌原來質素唔高,點改編都好難為Gin Lee開拓市場,完全係浪費資源。
臨近紅館演唱會,廣東EP《Bold and Beautiful》終於推出。Gin Lee一直強調想做出「big hit」,專輯唔再好似《Live in the Moment》咁有concept。不過,Gin Lee顯然希望歌曲有獨特之處,尤其係編曲,結果聽起黎其實無乜大熱格。比起《beGin》嘅大雜燴同《Live in the Moment》以大主題「活在當下」串連歌曲,《Bold and Beautiful》嘅歌曲構成咗一個由對愛情失去信心到最後「抱夢而活」嘅故事 (某程度上亦係Gin Lee真實故事),更完整串連專輯歌曲,亦顯示咗Gin Lee表達專輯主題上嘅進步。
專輯前半表現不過不失,係比較適合做主打嘅歌曲。《信》係專輯中較獨特嘅歌曲。歌曲旋律及編曲格局脫離港式K歌模式 (雖然副歌有啲反高潮),Gin Lee因應歌曲調整唱法,效果比預期好。然而,擅長各種修辭嘅周耀輝嘗試寫得直白,結果歌詞毫無重點可言,更有唔少位唔啱音,係佢其中一份最差嘅歌詞。《很堅強》入碟並無減少歌曲嘅俗,但「很堅強很堅強很堅強很堅強」好啱現時嘅即食文化,總算讓「快餐店駐場歌手」Gin Lee開紅館前有啲noise。《自我感覺還好》Gin Lee分飾兩角「和自己對話」嘅處理令歌詞意義更深刻,可惜製作上呢兩把聲分得唔太開。由六個字hookline第四個字拉長到編曲嘅奇怪聲效,都似自我複製相近班底嘅《和每天講再見》。
專輯後半三首新歌平均質素比前半更低。《人間鬍子》同上隻碟《緣·兩半》一樣係慢板抒情,但同樣只做到催眠,無法打動人心。以暢銷寓言式小說為名嘅《天地一沙鷗》開首嘅低音嚇人得以為「大齡女子」上身,一連串重覆嘅音既帶有鄧小巧《將沙拋給一片海》影子 (有趣嘅係呢首都係周耀輝),又係佢天敵「好姊妹」AGA最愛嘅作曲特色。《抱夢而活》編曲同製作如流水作業,結果歌曲同主題一樣了無新意,只覺老土。
Gin Lee整體實力甚高,又有大公司支持,但歌曲質素同紅館演唱會票價一樣屢創新低。還望紅館show後Gin Lee能做出比較好嘅音樂,吸納更廣泛嘅支持者。
推介歌曲:無 |
|