感情事隨心答 Gin Lee：今日未結婚

HOTMAN

Gin Lee今日同Supper Moment擔任星級嘉賓，接受學員提問。(蘋果日報)

李幸倪（Gin Lee）同Supper Moment今日到港台，出席「太陽計劃2018」活動，擔任星級嘉賓，接受由一眾學員化身嘅記者提問。Gin Lee笑指喺能力範圍內都盡量回答，若果被問及感情事，佢話：「唔知，隨心去答，我都唔知會唔會有一日結婚都唔講，或者未結婚已經講。」咁今日點答？佢話：「今日未結婚。」

被Supper Moment稱呼為「阿堅」嘅Gin Lee，笑指自從2012年已經咁叫，佢好欣賞對方熱血、鬥心同有幽默感，講到好似擇偶條件，Gin Lee笑言：「都係咁上下條件，男仔有幽默感先至唔會悶。」

至於Supper Moment就話2011年參與太陽計劃時，就向港台提議自己首《點滴》適合太陽計劃，點知7年後嘅今日終於願望成真，將其改編為歌曲《分享的勝利》，並與Gin Lee合唱。嚟緊佢哋會去台北舉行首次專場演出，適逢又係主音Sunny生日，Sunny話：「同舊年一樣都係喺台灣工作過。」佢班兄弟暗示今年送上驚喜就係唔為佢慶祝。