返回列表 發帖

究竟《人妻的偽術》 個曲有幾似 Christopher Chak 作?

本帖最後由 just11256 於 2018-8-14 02:07 編輯

「究竟《人妻的偽術》 個曲係咪特登抄 Christopher Chak?」呢個問題自從首歌出咗之後引起呢度一片人嘅討論,我今日晏晝見到 呢個 post 之後又繼續係到諗,又好似係又好似唔係,所以決定將大部分 CC 作嘅歌聽一次,然後分析究竟《人妻》嘅曲係咪特別似 CC 嘅風格。

首先,要鑒定咩叫 CC 風格。我認為 CC 風格有幾個特色:
睇下《鍾無艷》呢個例子,係早期 CC,亦係典型 CC 曲式,單單一句已經包含五樣特色:

1. 連綿:見到一個透氣位都冇
2. 起伏:每一句都係一個山坡,先低,然後推高,再滾落嚟,見到「都」個 C5 係最高音,即刻回落 F3,音域極之廣闊,亦係 CC 嘅曲好聽但難唱之處
3. 遞進:落去係一步步咁落,落完之後會上返嚟少少,感覺好似撳住撳住咁
4. 工整:見到差唔多冇搶拍,冇附點音符,一拍一拍好似機器咁
5. 不靠主音:呢首歌嘅 key 係 D flat major,主音即係 D flat(藍色音符),但見到成句得好少,畀人嘅感覺係不安不穩咁,要後期回落先多啲主音,即係成句一開始未搵到重心,令你有聽落去嘅意欲

必須要聲明,呢幾點係好多流行曲或其他作曲家都會用,呢幾點都唔係定律,例如《一絲不掛》係先高後低,《你們的幸福》比較多主音,但 CC 真係非常偏愛呢種寫法,漸漸變成咗佢嘅個人風格。

咁究竟《人妻的偽術》係咪咁寫?

1. 連綿:都算嘅,雖然有得透氣,但有啲句子都算長,亦都有幾句喺第一拍開始,冇 CC 句與句之間嗰種連貫性
2. 起伏:算,「若有需要做好彼此角色理應親善」都橫跨一個八度
3. 遞進:呢樣麻麻地,啲高音係忽然彈出嚟,例如「『不』要問」、「『不』應講」,冇 CC 推上去嗰種層次感
4. 工整:算,都係冇附點音符,但 CC 鍾意將搶拍(紅圈)擺每一個小節嘅最後嚟製造遞進嘅感覺,《人妻》全部都喺小節中間,即係每個小節第一拍(重拍)都有音,工整得濟有啲悶同罐頭,冇 CC 咁連綿不斷
5. 不靠主音:你見到佢成日回落主音(藍色),畀人感覺係安定,當然同歌詞有關,但畀唔到我 CC 嗰種鍾意喺 minor 同 major 之間遊走嘅不安

所以你話似 Christopher Chak 我覺得係情有可原,亦都真係幾似係特登模仿但模仿唔晒。有另一樣都係我覺得 CC 幾特別嘅地方,係成首歌第一句會有一個好低音嘅 drop,好似要話畀人聽我就係要挑戰歌手音域咁。經典例子:

而《人妻的偽術》:

「探誰」同「黑白」都係相隔五度,倒模咁款。當然,原因係落咗去先可以造就後面爬上嚟。

但上面 link 個 post 有人話 CC 唔寫 bridge 同唔升 key,係咪真?
1. 的確係唔寫 bridge,諗唔到任何一首歌有,通常 CC 嘅 bridge 係最後 chorus 加一句就算,例如「拋開你先識去審美」、「讓我決定我的快樂那需……」,亦有好多係冇,例如《富士山下》、《獨家村》。
2. 升 key 的確好少,《披星戴月》係少數嘅一個例子,而呢首歌除咗作得好好之外,亦有幾樣 CC final chorus 嘅特色:

其他 CC 特色依舊可以搵到,例如紅圈嗰隻搶拍,少主音旋律(有色音符),工整嘅長度等等。要彌補或解決冇 bridge 嘅問題,final chorus 只可以繼續推上去。我特登將普通 chorus「以巴開火」寫下面、final chorus「聽到你拍掌」寫上面,見到普通 chorus 去到「以巴開火」個 F flat 4 就停咗然後落返嚟,但 final chorus 係繼續推上去,去到「不」個 B flat 4,畀人感覺係仲有仲有咁,唔會因為冇 bridge (或其他歌冇升 key)而聽唔出高潮。《獨家村》、《搜神記》、《好得很》都係咁,但都唔係一定,《富士山下》冇升 key、冇 bridge、final chorus 同前面一樣。相比之下,《人妻》個 final chorus 有升 key,但冇再上,都係去到「講真只懂率性」嗰個主音/八度位,比較失色,畀人感覺個 key 為升而升。當然佢有一段好出色(但有啲格格不入)嘅 bridge 搭救,CC 嘅歌係從來唔會咁。

CC 嘅歌嘅結尾幾乎一定會有一句收筆,通常會向高音走,例子多不勝數,例如最新嘅「約定未來要到切爾諾貝爾跟你闖闖,當然心跳冒汗」、經典嘅「任何密友任何伴侶和諧互鬥投緣互信尊敬退縮生疏掛心忽近又遠跟世態搖擺」、最舊嘅「你還嫌不夠,我把這陳年風褸送贈你解咒」,將層層遞進嘅風格寫到最後一個音。《人妻》係冇呢樣。

總括而言,《人妻》有太多同 CC 風格相似嘅地方,所以話佢似 CC 係無可厚非。至於係咪特登抄,應該得雷頌德同 Juno 知,但根據雷頌德以往嘅習慣、歌曲題材、Juno 構思概念、曲風相似度,好難唔令人咁諗。但可以肯定嘅係,CC 唔係話抄就抄,你見有幾樣 CC 特色雷頌德都冇抄/抄得唔好。近年舒文旗下有幾位作曲人都鍾意模仿 CC,結果都唔好得去邊。當然,近年 CC 已經擴闊歌路,寫嘅曲都唔一定符合以上條件。

如果大家鍾意呢種咁技術性嘅討論,可以畀啲題材我,似乎反應再諗。

多口加多兩句:林夕填詞真係好勁,佢有好多 text-painting,例如《鍾無艷》「吻『下』去」係最低音,《人妻》「黑白」用個低音做對比、兩個「不」填高音有指令同否決嘅感覺,《披星》F flat 怪怪地嗰個位填「牽強」。
2

評分人數

  • powerful

  • Tonlo

長知識了!非常高質
一早都知道門已鎖床已翻仍未慣
客廳極黯淡
也許轉身已太晚

TOP

雷仲柒 同 cc 都過氣啦

TOP

好高質..
叱咤樂壇女歌手金獎 謝安琪!!!
至尊唱片大獎 the album
叱咤唯一大滿貫女歌手

TOP

高質post

TOP

寫得好高質 學到好多野 支持支持

TOP

長知識, 好得意呢D文章
支持支持~ 以後有機會要寫多D!
D譜都係自己打?

TOP

Good article
barbarbar

TOP

良心好評,CM除左係一個宣傳廣東歌的地方
更加係讓我學識樂理既地方
呢篇文章真係讓我好好咁上一課兩首歌相同和不同之處

總結一句,CC寫的歌真係比你換氣位都唔多.
但係就非常好聽.
一棵樹要成長得茂盛,根一定要札實。無論我去到哪裡,我都會記住,我的母語是廣東話。我只愛廣東歌

TOP

唔識樂理 明唔晒
不過支持學術文

TOP

支持!

TOP

但你睇下下面《披星戴月》都有好多四分音符
不過我都明明地你講乜
理應親善去到我會點嗰個位唔係好 cc,因為 cc 鍾意將每一句係小節中間開始

你講嗰兩首冇聽過
just11256 發表於 2018-8-14 01:29
我唔係想講四分音符多少嘅問題
而係覺得CC係會傾向將唔同長度嘅音group埋一齊 即係一堆四分音符接一堆八分音符 (或者相反) 節奏快慢比較分明
所以覺得中間突然走出一個唔同長度嘅音 節奏變化咁快唔係好似CC style

CC仲有好多作品架 對佢嘅歌有興趣不妨聽多啲

最後再補充返 《不方便的真相》入chorus都有轉key
你d譜係邊度搵留黎架

見到佢地嘈我都有想搵份五線譜睇下 但搵唔到 ...
HOTMAN 發表於 2018-8-14 11:11
應該係自己用Musescore之類嘅程式打

TOP

你d譜係邊度搵留黎架

見到佢地嘈我都有想搵份五線譜睇下 但搵唔到

TOP

Music Forum竟然咁少人識樂理, 有點驚訝

TOP

高質樂評

TOP

好勁wor, 識樂理真係唔同d
樓主係咪都有玩開音樂寫下歌?

TOP

今次真係學到好多野

TOP

好認真既分析!雖然睇完都唔太明

TOP

謝謝分享
很詳盡清晰的教學,
讓我對CC的作曲有更清楚的了解.
平時只係覺得CC嘅歌難彈,
都冇去留意每句melody嘅特色同結構.

TOP

寫得幾用心  
其實我覺得《人妻的偽術》副歌好多句旋律中間加入四分音符唔太似CC style
同埋印象 ...
nicholashin 發表於 2018-8-14 01:10


但你睇下下面《披星戴月》都有好多四分音符
不過我都明明地你講乜
理應親善去到我會點嗰個位唔係好 cc,因為 cc 鍾意將每一句係小節中間開始

你講嗰兩首冇聽過

TOP

寫得幾用心
其實我覺得《人妻的偽術》副歌好多句旋律中間加入四分音符唔太似CC style
同埋印象中《任我行》幾多主音

你會點評價CC作曲嘅陳曉東《時間做證》同覃嘉健作曲嘅沈震軒《約誓》兩段副歌嘅異同之處

TOP

神級技術文
感謝分享

TOP

勁高質!支持

TOP

其實聽到Juno首First Plug訪問話會同Kay做合輯,再聽到Juno First Plug係CC
就會知道原來人妻個曲係特登作到似CC
咁先有呼應架嘛
不過呢篇樂評真心高質

TOP

同意
其實原po兩位主角都冇錯 只係各自放大左既部分唔一樣
所以唔洗咁勞氣既

高質po 學到野{:1_ ...
bagfgfcde 發表於 2018-8-13 23:55


浄係識唱歌
識少少樂理

學到野

想問下你係邊度搵啲譜 google過一啲但好似唔齊成首歌 ...
newguy 發表於 2018-8-14 00:02



    自己打

TOP

學到野

想問下你係邊度搵啲譜 google過一啲但好似唔齊成首歌

TOP

可惜咁樣作曲又真係易作啲 CC寫到嘅旋律都真係唔簡單 仲要唔悶
RVHOCPC 發表於 2018-8-13 23:54



打《人妻》嘅時候係瘋狂 copy and paste,打《披星》係每句都唔同,功力真係好深

TOP

本帖最後由 bagfgfcde 於 2018-8-13 23:57 編輯

同意
其實原po兩位主角都冇錯 只係各自放大左既部分唔一樣
所以唔洗咁勞氣既

高質po 學到野
附點同切分節奏既運用其實真係可以好影響到一首歌俾人既印象
只能講節奏好大程度上令兩位作曲人既作品都變得相似 (1同4)
個style係有雷同 但旋律走向同和弦選用都有差別 (3同5)

樓主係咪有學樂器?
其實我覺得cm應該要開個樂器討論區先係

TOP

唔該
有幾首我都冇聽/唔熟,所以一概而論嘅地方未必準確

另外修正咗一個位,諗多一陣發現紅圈嗰隻搶拍其 ...
just11256 發表於 2018-8-13 23:41



    可惜咁樣作曲又真係易作啲 CC寫到嘅旋律都真係唔簡單 仲要唔悶

TOP

補充翻 不吐不快 有bridge 哲學家 入chorus都有轉key
RVHOCPC 發表於 2018-8-13 23:17


唔該
有幾首我都冇聽/唔熟,所以一概而論嘅地方未必準確

另外修正咗一個位,諗多一陣發現紅圈嗰隻搶拍其實好普遍,但《人妻》特別嘅地方係每一次都係小節入面,即係每次第一拍都有音
咁樣寫歌我覺得比較悶同 hea,好似小學生作曲咁,音樂老師一定會叫你第一拍落重音,但你見 CC 唔係咁嘅

TOP

本帖最後由 kwanie 於 2018-8-13 23:43 編輯

嘩嘩嘩技術野

其實有無人教樂理

TOP

高汁樂評
值得支持
SSN Chart (22 Mar)  冠軍: 三生有幸 - Yan Ting  |  亞軍: 唔明你講乜 - 陳健安

TOP

「究竟《人妻的偽術》 個曲係咪特登抄 Christopher Chak?」呢個問題自從首歌出咗之後引起呢度一片人嘅討論 ...
just11256 發表於 2018-8-13 22:55


雖然係幾學術性,有D位唔係幾睇得明,
但係prefer呢類專業歌評,睇得多就明架啦
真心學到野跪求多D
FIGHT for 陳柏宇

TOP

呢d就係高質樂評啦
唔似得d乜乜page咁 好似個版主寫日記咁 低質到暈

TOP

其實一聽曲式就係似
多謝你提供詳盡資料
抄歌就肯定唔係既 有抄仲唔俾人大炒咩
抄係起碼有八定十粒音一模一樣先算抄(記憶中)
係個style似囉

TOP

本帖最後由 RVHOCPC 於 2018-8-13 23:19 編輯

補充翻 不吐不快 有bridge 哲學家 入chorus都有轉key

TOP

提示: 作者被禁止或刪除 內容自動屏蔽
簽名被屏蔽

TOP

本帖最後由 kayzzz 於 2018-8-13 23:13 編輯

感謝分享

雖然唔係全部認同你既見解 但起碼成篇有你自己既分析

好過d無料評論一句憑感覺就人云亦云話人抄歌

希望cm多d你咁客觀既樂迷

個人認為(3)同(5)唔似cc 已經令成首歌個style同cc有顯著分別

TOP

返回列表