|
  
- 積分
- 10116
- 貢獻
- 781
- 參與
- 9331
|
本帖最後由 nicholashin 於 2018-9-23 16:28 編輯
#CMMetacritic Vol 15
神奇膠《香港熱》
評分：52/100
《香港熱》係神奇膠第二張大碟。為《熱血時報》主持節目嘅神奇膠從熱血青年角度以歌曲記錄社會議題，但亦有樂壇常見嘅情歌同青春歌曲。專輯音樂唔特別，但亦算順耳，神奇膠看待事物角度亦幾有趣。
神奇膠歌曲關注嘅社會議題廣泛，由「贏在起跑線」到「食花生」都有所涵蓋。以「上車」為題嘅《妞樓樂》無直接討論唔合理地辛酸嘅過程，反而集中描述成功「上車」嘅喜悅，係較少人觸及嘅角度。雖然歌曲早於2014年已經曝光，但副歌最後一句恰巧呼應咗游蕙禎嘅一段言論。《絲打與貓》以劇情迂迴嘅愛情故事傳達「捕捉、絕育、放回」嘅訊息，當中亞視暗星擔任欺騙「巴打」感情嘅女主角相當貼切。唯一電子曲風嘅《花生將》歌詞大量reference網絡文化，描寫仔細，可視為對網絡世界嘅「地圖炮」，Bridge加入經典花生廣告對白有劃龍點睛之效。
神奇膠喺專輯中段呈現較深情一面，效果更為討好。《做你男人我》以「大時代」顯示愛情嘅「勇武」並唔新鮮，但歌曲氣質與主音聲線相當匹配，弦樂亦唔會太煽情。同樣較「大格局」嘅《若按掣能重返中一面對多次》表面上只係傳統「What if...?」套路，但其實歌曲對「青春」嘅見解相當特別——青春唔係「搏盡無悔」，而係由恐懼、孤單、苦悶、悲傷、失望、脆弱、殘酷等構成，又唔係以此反襯更正面之處，反而認為係僥倖熬過嘅人忘記其負面本質。Bridge嘅合唱將氣氛推至高潮，如給聽眾思考空間，唯完結較草草了事。
《香港熱》又收錄咗兩首主題曲，曲風同其他歌曲有啲唔同。《守武者夢翔》為同名本地原創英雄主題曲，歌曲同英雄名字一樣有向日本動漫取經，但同Nowhere Boys嘅改編超人歌《光の序曲》相比，《守武者夢翔》嘅演繹同編曲都唔夠強。《同擔日月天》原本係熱血時報節目《古惑仔俱樂部》主題曲，由倫裕國主唱。神奇膠將編曲改得更勁，並加入Big Sammy嘅featuring，令歌曲立體咗好多。
《香港熱》專輯談唔上非常完整，歌曲並非特別突出，製作及演繹弱點唔少。不過，專輯題材廣泛，又以較獨特角度切入，與其他音樂單位合作效果亦唔錯。雖然神奇膠唔打算由「地下」走到「主流」，但都希望佢哋嘅音樂可以吸引更多人，唔洗喺專輯封面強調「一隊組成超過十年的樂隊」。
推介歌曲：若按掣能重返中一面對多次、做你男人我
陳慧琳《Watch Me》
評分：58/100
隨著雷頌德音樂表現愈見遜色，重用佢嘅陳慧琳近年音樂亦無乜特別。《Watch Me》減少使用Mark Lui嘅作品，令平均歌曲質素有所提升，雖然仍有唔少不足之處，但已算係Kelly近年比較出色嘅專輯。
專輯以韓國人製作嘅兩首廣東歌打頭陣，質素都好唔錯，亦非常配合Kelly嘅氣質同形象。《尾站天國》頗為搶耳，整體流暢有力，相當loopable。《花見小路》比較慢熱，但藉著一句句「I'll stand by you」不斷推進，帶來非常深刻嘅情感。
緊接嘅三首歌由雷頌德主理，但都被明顯比下去。《Be With You》娘爆嘅結他伴奏同Kelly嘅「嗚嗚嗚」都聽得不寒而慄。三拍子嘅《冷淡》曲詞唔突出，但Kelly能演繹出歌曲嘅起承轉合，弦樂亦有效營造歌曲氣氛，算係比較對板嘅一首。不斷「打自己」嘅《打字機》由歌曲主題、演繹、歌詞到編曲都相當尷尬，亦與專輯格格不入。
驚嚇過後，最後三首國語歌其實都幾順耳，當中以伍仲衡作曲嘅《答應你會幸福的》最動人，連副歌嘅「了」、「的」、「得」也被Kelly演繹得充滿感情。《做自己的太陽》歌曲走向可聯想到謝芊彤自己偏向acoustic嘅作品，但Alex Fung嘅編曲頗為沉悶，Kelly演繹副歌亦顯得造作。擅長寫K歌嘅黃安弘喺《也許我一直不懂愛情》中發揮一般，整體有啲似台灣流水作業製作嘅劇集歌曲。
《Watch Me》大部份歌都係慢板情歌，曲風談唔上特別，內容又有啲無病呻吟，但喺適當排序下不致沉悶，Kelly嘅演繹亦有唔少驚喜。呢張專輯未必為Kelly開拓嶄新音樂路線，但都係一次做得唔錯嘅comeback。
推介歌曲：花見小路、尾站天國、答應你會幸福的 |
|
發表於 2018-9-23 00:28
| 
