返回列表 發帖

吳業坤扭計唔唱K歌放風搵大水喉

歌手吳業坤相隔兩年半再踏紅館舞台,邁向人生另一高峰之際,卻被傳人望更高處,向唱片公司「扭計」拖續約,又親身敲國際唱片公司門另覓大水喉,可是坤坤主動出擊半年,暫時都得個「等」字。

「人氣王」坤坤將於本月19號假紅館舉行一場個唱,和近萬歌迷補祝其18號的29歲生日,他曾表示:「明年就30歲,有強烈感覺開始踏入人生另一個階段,不論在音樂上、演藝事業上都應該邁向新方向!」故把今個騷命名為「小句號」。原來「小句號」並非只是名號,有傳他密謀轉會,欲離開捧紅他成「新人王」及得「我最喜愛的男歌手」的星娛樂唱片!

有指坤坤為物色擁更強勁資金的唱片「後台」,助事業再上一層樓,其無綫經理人過去半年密密接觸多間國際性及大規模的唱片公司,坤坤又親自四出放風,甚至現身馬場捧「朋友場」博成事。只是由於其經理人合約是屬於無綫一方,坤坤只能賣歌手約,未能全權主導坤坤的「行使權」,令各大唱片公司在商業考慮下,至今仍未給他「好消息」。

索求更多自由度

據聞坤坤有意離開四年來合作無間的唱片公司,皆因其心態有變,近年幾,唱片公司屢勸他再唱如《原來他不夠愛我》這類大熱K歌,可是他嫌商業味濃而另有意見;加上他自覺音樂創作上應獲更大資源及更多創新嘗試,故即使去年唱片公司以開第二次紅館騷及優厚條件作利誘,坤坤至今仍拖足半年未動筆續約,甚至演唱會開騷在即亦未改初衷,情況罕見!據聞星娛樂作最後努力,縱使未簽約仍落力為坤坤搞演唱會,以十足誠意作挽留。

坤坤接受電話訪問時,被問到與唱片公司的合約是否快屆滿?以往有問必答的他,支吾以對說:「嗯……唔方便透露。(做得唔開心?)冇,大家都好努力為我搞今次演唱會。(傳經理人物色新公司?)我呢排Focus喺演唱會,冇去溝通,每日都排舞、練歌、做Gym、練跑,仲有拍劇,體力上辛苦,但心態決定一切,冇乜事。(傳你向其他唱片公司放聲氣?)我冇呢方面Contact,我係無綫Management會難啲。」至於和星娛樂續約成數,他說:「如果冇乜大問題都會留低, 因為好多Friend喺度。」說到是否不想再唱K歌?他沒否認:「想試唔同類型嘅歌,想知市場反應,無奈大家都係鍾意啲情歌。」

認有意見分歧

至於星娛樂執行董事Tommy Chu,昨日受訪時承認坤坤尚未續約:「坤坤就好似中學生咁,如果佢想去外國升學,公司都會繼續支持佢。」又指坤坤的合約在今年內才屆滿,有共識待完了演唱會再傾。他則未聞坤坤及其經理人接觸其他公司,不過就算有接觸行內人亦屬正常。至於和坤坤的關係會否名副其實畫上「小句號」? 他則說:「有信心同佢續約,雖然大家曾有『小意見』,但都係小事。」

東方日報C1:https://hk.on.cc/hk/bkn/cnt/entertainment/20190414/bkn-20190414032331978-0414_00862_001.html?eventsection=hk_entertainment&eventid=402883474d9a0d4e014dabf4d2342526
-----------------------------------------------------------------

令大家失望了,我不是大家期待的威廉會員
評心而論,星娛樂都算係咁,要hit歌就俾hit歌你,要演唱會就俾紅館你,要獎就俾幾萬張電話卡你
當年唔係星娛樂嘅話牙坤仍然係TVB嘅一個路人甲乙丙,更何況我唔覺佢唱咗好多K歌(傷心到變形)?
更何況肥佬唔鐘意佢、環球反面、華納Sony旗下已經有上位男歌手、英皇簽外援只會簽一線

返回列表