kaytse

呢半年已經因為反送中關係 好少上黎留言, 都係睇完ap就算. 但每年一度既十大最愛就都要留一留. 同埋亦都因為社會事件, 令到我上半年既歌會放輕左比重. 為左唔想太偏心, 決定每位歌手單位只揀一首.

排名分先後 [係我榜既成績]
1. 肥媽有話兒 - 肥媽 [四星期冠軍] 我既年度總結仲未諗計唔計社會歌曲, 如果計, 必定拎我既年度金曲, 最輕鬆地但又好到肉咁樣鬧爆黑警, 亦都全城hit爆, 家傳戶曉街知巷聞, 加上曲詞同製作都非常出色, 絕對係今年年度大作!

2. 忘記和記 - 麥浚龍 / 黎明 [兩星期冠軍] 如果唔係反送中, 將會係我年度最喜愛既作品之一, 非常有驚喜, gimmick滿分, 黎天王一出聲即刻殺晒, 掂!

3. 亂世情侶 - 古巨基 [兩星期冠軍] 年度大作, 可惜係年頭, 流行榜又冇成績, 絕對係今年最可惜既作品之一, 亦都係我今年最喜愛作品之一, 千禧年熱爆曲式, 放係2019年真係晒左

4. 我們的基因 - 謝安琪 [一星期冠軍] Kay 今年既歌實在太出色, 如果唔係反送中應該會再上神枱, 不過食得咸魚抵得渴, 相信kay揀得呢條路亦都會預左會有咩後果, 但點都好, 我都投左票比佢, 只希望佢既然已經決定唔再為社會發聲, 就繼續製作呢兩年以來既高質素歌曲, 用實力話比大家聽咩叫天后. 可惜因為咁, 大家對佢今年既音樂既注視降低左好多, 今年佢好多歌都好可惜, 包括我好中意既偷情的禮儀.

5. 人話 - 方皓玟 [一星期冠軍] 小明今年既三部曲: 願、望、人話, 我就幾likey後兩首, 人話一出, 的確殺晒, 冇辦法, 唔講社會因素, 只計歌曲質素都非常出彩, 好難唔將佢擺入十大. 今年最女應該都非佢莫屬.

6. 二零一九 - LMF [兩星期冠軍] 唔使講野, 又係另一首質素上乘既社會作品, 冇辦法, 今年我個人既最喜愛機制係會有調整, 但要入榜都要過到質素檢定呢一部份, 亦都唔需多講. LMF好日唔出歌, 一出即刻話比大家知, 佢地既金獎唔係浪得虛名, 同埋展現樂隊應有既一面.

7. Everyday - AGA [一星期冠軍] 有人話AGA開始技窮, 點解我又唔覺呢, 除左個別既歌之外, AGA既歌都仲係好有辨識性, 而且一聽就知係佢, 但又唔會話首首都差唔多咁款 (同某林姓三金歌手相比可以話高下立見). Everyday 係今年我最喜愛既AGA作品, 雖然三首都中意, 但要揀一首就揀首旋律最好聽架啦, 還掂聽親AGA都唔係點聽歌詞. 3AM劣質詞咪一樣成為神作.

8. 白雲會告訴我 - 雷同二友 [兩星期冠軍] 下半年聽返上半年既歌開始冇乜Feel, 但最終都決定擺呢首入黎, 不過始終係年頭小品式, 當時會覺得輕輕鬆鬆幾好, 亦都可以話係當用一首歌總結上半年既心情 (未有反送中之前既港豬式生活) 輕鬆過每一天, 開心仔.

9. 逃生門 (門外版) - 周國賢 / JW [一星期冠軍] 我中意腎仔版本多D, 唔知點解, 覺得感情上更加到肉, JW以featuring形式加入反而更加清新, 可能因為對腎仔有bias啦, 繼上年錢七之後今年再入選我既十大, 唔同既係今次腎仔用自己既旋律入. 腎仔加油啦!

10. 我們都是這樣長大的 - 鄭秀文 [一星期冠軍] 呢個位實在太多選擇, 但Sammi既呢首叱咤至尊歌始終都係以質素同流行度上秤先, 其他包括13樓, alfred, on仔, 信仰, 陳蕾, 山卡啦...都好想揀, 但奈何要揀最喜愛, 冇理由唔計算社會歌. 結果今年比社會歌霸晒 (不過so what, 今年既社會歌質素的確完爆2014年). 但無論旋律, 歌詞, 流行度, 演繹, 九字歌都係今年一線之作.

今年最初覺得要揀十首都難, 同2018年相比, 今年既音樂的確比較遜色. 但當社會歌陸續面世, 又面臨返幸福既煩惱, 絕對係好事!