sohrab_nd

第一位：二零一九 － LMF
因為呢首歌同埋LMF20週年系列而第一次翻開LMF嘅collection嚟聽。二十年走來，始終如一鬧爆無能政府同腐敗制度。第一位，敬LMF。

第二位：雪糕 － 許廷鏗
呢首應該最後都唔會輪到plug佢，但係呢首係我成隻《拾》裹面最愛嘅一首。覺得呢首好適合一個配DustyKid嘅Lyric Video，「不應怪自己／會有轉機／請擁抱自己／別要怕／對你不放不棄」

第三位：雲吞－ 鄧小巧
第三同第五位呢兩首歌喺我年頭一個人生好大嘅低潮比左好多力量比我，真係每日仲有飯食，仍然有生命，已經好好。
「還會有飯吃／大概已不比誰更不幸」「用各種溫情補不幸／是最簡單法印」「如世界並不美／用哪種心態自處／不美但覺得美／難捱亦總可包容至此」

第四位：在錯誤的宇宙尋找愛 － 陳健安
夭心夭肺呀，愛情當中無聲嘅勇氣同無聲嘅痛。「一早已被切去兩翼禁飛走／這樣勇試問你可能夠」「不恨你／恨我的反抗不夠」

第五位：當我迷失時聽着的歌 － 陳蕾
好似上面咁講，呢首歌陪我走過年頭一個好艱難嘅時期。
「如若迷失請謹記回家／迷路不要驚怕／前路難關都給你招架／如像孩子那樣靠著我不怕／好好的放一假／重整理內心積壓／再出發」

第六位：人話 － 方皓玟
唔計話題，本身首歌都好好聽。方皓玟好適合唱EDM。

第七位：失戀的人站起來 － 林欣肜
私心之選，Mag妹出道以嚟真係一波三折，希望Mag妹可以繼續開心唱歌。

第八位：努力奮鬥加油 － 林海峰
上左咁多年cm，一直都唔鍾意林海峰呢個人物，啲歌又唔係特別好，但啲歌又死播爛播，硬係要年尾搶獎，阻住年輕一輩上位。呢首歌真係令我感動兼改觀。香港人呢半年需要嘅只係簡單一句：「努力奮鬥加油」

第九位：我們的基因 － 謝安琪
覺得呢首歌好有一種黑色浪漫感覺，愛呢首比愛勇悍17更甚（上年勇悍17都有入我嘅十大）。好愛好文青嘅「談情甜在沒人證／生命如像胚胎蹦跳無聲」同埋好含蓄嘅「勇悍地發揮／人類原始本領」

第十位：亂世情侶 － 古巨基
仍然比紅到發黑嘅英皇一席十大，只係因為林夕嘅詞，自從728被控暴動嗰對情侶堅持繼續結婚，就覺得呢首歌提升左一個層次，「未相信情懷輸給世道／仍在亂世中開花結果」