返回列表 發帖
歌曲提名
歌曲:廣東歌
歌手:林海峰 feat. SENZA A Capella、熊熊兒童合唱團
發行年份:2016年
提名原因:廣東歌種類繁多,但係要搵首歌代表整個廣東樂壇並非易事,《廣東歌》呢首歌可能就係其中之一首潛在歌曲。呢首歌描寫咗廣東歌喺香港人心中嘅地位,生活都離不開廣東歌,表達對廣東歌嘅心愛之情,最後更有兒童合唱團嘅featuring,可以解讀成廣東樂壇嘅傳承。
// I want you 廣東歌 放聲地唱出我係我 唱吧無敵副歌 延續這歌 維港每一個 I want you 廣東歌 就算會有一點肚餓 唱首廣東歌代表我 //

歌曲:今天我
歌手:林海峰
發行年份:2016年
提名原因:《廣東歌》唱出咗廣東歌對香港人有幾重要,而《今天我》呢首歌亦表達類似信息。《今天我》搜集咗幾首喺唔同年代陪伴住香港人嘅代表作,將呢幾首歌串埋一齊,向廣東樂壇致敬。
// 我已踏上這無盡旅途 光輝歲月成長中 繼續理想海闊與天空 //

歌曲:不經不覺
歌手:側田
發行年份:2017年
提名原因:個人嚟講幾鍾意一啲「滄桑」嘅歌曲,《不經不覺》就係個十分典型嘅例子。由細到大,慢慢領悟到悲喜無常、生離死別等等嘅人生哲理、意義,令人感到十分有共鳴。加上編曲營造嘅遞進效果,令首歌「成長」嘅主題更加表達到出嚟。
// 一生人哲理 青春時不羈 刻骨才銘記 //

歌曲:和每天講再見
歌手:李幸倪
發行年份:2017年
提名原因:一首十分有共鳴嘅作品。作爲一個「返工民族」,香港人日日夜夜都要營營役役工作,不覺時間流逝,無聲無息之間失去同心愛嘅人所渡過嘅時日。呢種城市悲歌就從《和每天講再見》嘅歌詞同MV描繪到出嚟,加上Gin淒厲嘅歌聲,呢首歌零舍入心入肺。
// 忙到不知幾點 你共我為何遇見 各有終點 去到終點 何曾活好今天 //

歌曲:你帶著我的青春離去
歌手:王灝兒
發行年份:2017年
提名原因:我揀嘅歌都有唔同類型嘅共鳴,而《你帶著我的青春離去》就係講朋友之間離別嘅感情。兩個朋友,由細玩到大,突然就要分開,除咗會感到不捨、掛念,仲會感到一種「覺得自己老喇」嘅感覺。喺首歌入面,兩個朋友一齊嘅時候就象徵住快樂嘅時光、兩個朋友分開嘅時候就象徵住成長嘅嘆息,正正就係喺呢首歌表露到出嚟。
// 象徵青春的你那些片段 回望太遠 沒法留戀 //

歌曲:大丈夫
歌手:Supper Moment
發行年份:2017年
提名原因:從《小伙子》到《大丈夫》,故事記錄住一個人嘅成長,從追夢嘅年青人變成擔起頭家嘅成年人,從被保護變成保護人,呢種成長嘅轉變記錄喺呢首歌入面,倍感共鳴。
// 大丈夫 擔扛起宇宙離別了呵護 艱苦都也不可以馬虎 //

歌曲:初心
歌手:古巨基
發行年份:2017年
提名原因:成日講「毋忘初心」,究竟初心係點嘅呢?《初心》畀咗我哋一個定義:一種激勵自己、一直堅守住嘅信念就謂之「初心」。同樣係一種疊加式嘅編曲,由柔和嘅共鳴轉化成堅強嘅打氣,正正就係呢首歌作爲一首勵志歌嘅成功之處。
// 咬着牙關過 當初的我創造我 天真會變大器 成就最動聽真實傳奇 無負確信過真理 //

歌曲:Fire
歌手:MastaMic
發行年份:2018年
提名原因:一個字:勁。呢首歌畀一嘅第一印象就係快,快速rap配上密集式歌詞,可以話係種聽覺衝擊。喺歌詞中,MastaMic亦都加入咗佢作爲rapper嘅肺腑之言,爲呢首歌加咗一層意義。
// 加速再加速直到TURBO 我唔會再理到底有無人聽到 總之扭大個馬力谷盡引擎嘅轉數 完美完成其他人眼中嘅不可能任務 //

歌曲:男人背後
歌手:周柏豪
發行年份:2018年
提名原因:一首十分溫馨嘅情歌。不論工作定休息嘅時間,總有一個人緊隨其後,一齊唱情歌、一齊經歷風波,可以話係一段完美之情。
// 想抱緊你任由時間過 輕輕的唱情歌 心境平和 蜚語流言不想聽太多 //

歌曲:七尺之下
歌手:Kolor
發行年份:2018年
提名原因:不時都會出現啲講生離死別嘅情歌,而呢首可以話係一首代表作。歌名就點明「七尺之下」嘅主題,講一段感情中兩個人離開人世之後喺另一個世界重遇,非常浪漫。
// 沒有誰可改變 人到最終七尺下相見 //

歌曲:鄰家的你
歌手:Pandora
發行年份:2018年
提名原因:《鄰家的你》嘅曲風算係少見。呢種曲風令首歌嘅「青春味」十分濃郁,聽起上嚟舒服得嚟入心,係廣東歌情歌之中一首十分不同嘅歌。
// 若有一日轉身看到在窮追的我別要躲 沉溺於幸福的我跟你熱吻直到下世紀 假如未嫌棄 //

歌曲:困獸·28
歌手:麥浚龍
發行年份:2018年
提名原因:《困獸·28》係董折故事線上嘅第二首,講述董折廾八歲時漸現嘅家庭糾紛。同前作《勇悍·17》中年少不羈嘅唱腔唔同,《困獸·28》當中嘅唱腔明顯加咗一層擔憂同疲態。首句「不止心跳冒汗」呼應咗前作末句「當然心跳冒汗」,加強十一年之間董折嘅心理變化,故事感極強。呢首歌用「困獸」形容董浦二人間嘅關係,表達兩人之間彷彿已經由浪漫化成束縛,兩者都十分想要鬆開。
// 奶粉買錯使堅執的你沒趣 堅忍的我再盡責都不妥當 //

歌曲:停半分鐘聽一闋歌
歌手:許廷鏗
發行年份:2018年
提名原因:你對上一次停低聽一首歌又係幾時呢?許廷鏗喺《停半分鐘聽一闋歌》中表達咗自己對廣東歌嘅愛,又令人思考自己勞碌嘅生活,有邊首歌係陪伴住自己渡過難關嘅呢?又有幾多時間真係可以停低半分鐘,聽返闋歌呢?
// 何時起你秒速間奔波 忙著茫然俯首衝過 無暇在閙市裏停半分鐘聽一闋歌 //

歌曲:沐春風
歌手:謝安琪
發行年份:2018年
提名原因:《沐春風》係浦銘心故事線上第三首作品,描繪浦銘心同董折分開後嘅內心世界。從編曲同歌詞之中可以睇得出,呢首歌嘅藝術成份頗高,而歌詞亦可以俾聽眾有唔同嘅interpretation,可能係同藍定凌一齊之後回味同董折嘅愛情,又可能係浦銘心同寒玲之間有點意外嘅愛情,幻想空想頗大。
// 半彎的脊椎和半曲的脊椎會聚 還有半伸的舌尖和半縮的舌尖會催 //

歌曲:暴烈·34
歌手:麥浚龍
發行年份:2018年
提名原因:《暴烈·34》係董折故事線上嘅第三首,講述董折卅四歲時家庭糾紛「爆煲」成家變嘅故事。同前作《困獸·28》嘅唱腔比較,《困獸·34》顯得較爲激烈。僅僅主唱部份就十分浮誇,跨越咗三個八度,表現出壓力爆煲嘅情感,最後返回平靜。加上鋼琴聲穿插全曲,恐怖氣氛倍增。而MV同文案就爲首歌錦上添花,令故事感更強。
// 最初要自由但卻未能自保 玩具熊殘舊縫了再補 婚戒像頑石完好 誰又肯走上陌路 難道成熟得太早 //

歌曲:亂世情侶
歌手:古巨基
發行年份:2018年
提名原因:喺呢個亂世之中,仍然有一個人同自己相依爲命係一件十分浪漫嘅事情。《亂世情侶》呢首歌就表達咗呢種情感,兩個人不離不棄共渡難關,加上古巨基嘅唱腔,令呢首歌變得十分浪漫。
// 當你仍然信我 愛情沒有輓歌 未相信情懷輸給世道 仍在亂世中開花結果 //

專輯提名
專輯:百姓
歌手:吳業坤
發行年份:2016年
提名原因:《百姓》係吳業坤出道以來第二張個人專輯,入面收錄嘅歌除咗各類唔錯嘅情歌之外,重點有十分有共鳴嘅同名歌曲《百姓》以及《演員》。雖然整體唔算得上係十分好嘅編排,但係每首歌都有佢各自嘅故事。
// 憑正面 難症斷 如可以 可不跟稿去賣笑 我背面藏著憾事 //

專輯:神奇之旅
歌手:許廷鏗
發行年份:2017年
提名原因:2017年對許廷鏗嚟講可以話係一場「神奇之旅」,因爲喺呢一年佢第一次轉唱片公司;喺新唱片公司當中佢得到好多機會嘗試,有featuring「2868」(王嘉儀)嘅感謝曲《根》、大玩新曲風嘅《藍血人》、象徵各種精神疾病嘅幾首歌,仲有點題歌曲《神奇之旅》,對許廷鏗嚟講絕對係個新嘗試。
// 大道上走走 別站兩旁 段段路康莊 迎面彷彿有光 慢慢地找到 慢慢會望到希望 別再挑剔過多 //

專輯:Don’t Text Him
歌手:Serrini
發行年份:2017年
提名原因:個人十分喜歡Serrini獨特嘅歌聲,而呢張專輯中亦收錄咗佢所唱過唔同曲風嘅作品,聽開其他廣東歌手嘅人聽落會出現唔少驚喜。
// 假使甚麼都不對 假使甚麼都失去 當一轉身晦暗又佔據心底裏 //

專輯:不停站
歌手:ToNick
發行年份:2018年
提名原因:ToNick喺《長相廝守》成功後開始轉變曲風,由另類變得「大路」,失去咗部份特色,好在都換來幾首幾好聽嘅歌曲。作爲跨越轉變期嘅一張專輯,《不停站》亦收錄咗幾首富有ToNick特色嘅作品,所以呢張專輯可以見到ToNick好唔同嘅兩面。
// 若累了只能停低 受傷不能行駛 站裡休息養傷扭轉劣勢 把眼淚拭乾再盡興發揮 //

專輯:[dal segno]
歌手:Supper Moment
發行年份:2018年
提名原因:《[dal segno]》入面有好多唔同嘅歌曲,有充滿共鳴嘅《大丈夫》、頌讚世界美好嘅《橙海》、紀念逝世經理人嘅《說再見了吧》等等,再一首都有佢嘅特別意義。
// 告別要瀟瀟灑灑不必常回頭吧 星空之中你化作最閃的星懸掛 //

專輯:維多利亞 Victoria One
歌手:古巨基
發行年份:2018年
提名原因:上面提到呢張專輯入面嘅兩首歌,有勵志歌《初心》同情歌《亂世情侶》。除咗呢兩首,仲有同黃子華合作嘅《子華說》、諷刺住屋問題嘅《太空艙》、爲港隊打氣嘅《#香港勁揪》,都係呢張專輯中嘅佳作。
// 全世界等看戲 誰揪出骨氣誰打不死 能夠固執到尾 揪得起勁去爭一口氣 //

專輯:一個人一首歌
歌手:Various Artists
發行年份:2018年
提名原因:十分欣賞《一個人一首歌》嘅宗旨:爲每個人創作一首屬於自己嘅歌曲。喺呢張專輯入面,有一系列歌手唱出十個唔同嘅故事。十分期望呢個「一個人一首歌」嘅主題可以繼續落去。
// 年月裏 要代你 張開眼睛 寫低故事 //

TOP

返回列表