新一代男金女金

新一代男金女金

如無意外2020年嘅男金、女金將會由兩個未攞過男金、女金嘅歌手攞，所以特意寫低對兩位歌手成長之路嘅睇法。（如果有時間就寫埋aga)

男金許廷鏗

2009年第一屆超級巨聲，許廷鏗只係一個平平無奇嘅參賽者。冠軍？亞軍？季軍？nonono。許廷鏗排第十一咋。連鄧小巧果時名次都高過佢。不過許廷鏗無比果時嘅排名限制咗佢。我的離開也是愛係許廷鏗第一隻派台作品，之後仲幫許廷鏗攞咗tvb嘅「新人薦場飆星獎」。果時tvb嘅劇歌未算係好流行，許廷鏗係有好多空間做自己既歌。作品包括出走三部曲、Blue藍調、長大。入面好多嘅歌都唔係劇歌，唔需要跟足一式一樣嘅劇本做，音樂上有頗大嘅自由。其中2013年嘅青春頌令好多身邊嘅人開始認識許廷鏗，發掘許廷鏗嘅音樂才能。可惜之後幾年，tvb開始要求旗下歌手唱劇歌，作品包括：護航、枷鎖、真相、迷宮、歲月無悔、記住忘記我等等，tvb／月巴亦都好識做，冠咗好多tvb製作嘅劇歌，記住忘記我甚至有兩周冠。2014年－2016年許廷鏗嘅中心偏向tvb，派台歌嘅成績係商台就麻麻地；甚至商台會唔上劇歌。不過許廷鏗冇淨係因為得到tvb嘅寵幸而放棄其他台嘅發展機會。2014年rthk嘅project留下士多邀請許廷鏗唱主題曲約誓，成功冧掂rthk黃天頤。而最有印象係2015年，當許廷鏗派郵輪去rthk、新城、tvb嘅時候，偏偏plug另外一首阿樂去903。雖然最後係無十大，但係903年尾播阿樂去到好似攞十大咁。佢亦都做世界仔，趁呢段時間befriend 唔同嘅dj。許廷鏗刻意營造出佢唔甘心淨係唱劇歌，佢想出d有個性嘅歌。到最後佢意識到tvb只會限制著佢嘅發展。如果要歌唱事業更上一層樓，佢必須要出去闖闖。2017年佢趁同tvb完約，就簽咗華納。

華納出名咩？marketing揼本，識得揀歌、大公司有能力力捧。許廷鏗係聰明仔，佢揀華納係啱嘅。可惜2016年佢嘅歌好多都係陳腔濫調，講佢幾感因tvb，幾多謝佢舊老細嘅照顧。之後華納都知道許廷鏗係一個好抵捧嘅人。周柏豪走咗之後，就係許廷鏗上位嘅時候。音樂上華納係揼咗好多資源比許廷鏗。用咗好多唔同嘅監製、作曲人、甚至當林夕逐漸減產嘅時候，都仍然搵到林夕寫詞比許廷鏗。2017年－2020年出咗4唱大碟，神奇之旅、許廷鏗 Alfred Hui、拾、Negative。可惜，我自己覺得許廷鏗仲係搵緊有咩係適合佢，好多歌佢都唔係拿捏得好好，華納時代嘅派台歌5分數目偏低，甚至有部分1分多過5分。而佢自己個人又未建立到自己嘅特色；我最喜愛男歌手2017、2018年都唔入五甲。相比同期嘅周柏豪有兵歌；馮允謙賣創作；張敬軒、陳柏宇都有自己特色（雖然兩者嘅特色亦漸漸模糊）；許廷鏗硬係差一d嘢。不過作為華納力捧嘅男歌手，派台歌嘅成績唔會太差，2018年rthk有5冠；2017至到2020年叱咤都有獎攞／會有獎攞。希望許廷鏗當2020年攞咗男金之後，2021年會搵到自己嘅特色。

2011年度叱咤樂壇流行榜頒獎典禮 - 叱咤樂壇生力軍金獎
2013年度叱咤樂壇流行榜頒獎典禮 - 專業推介叱吒十大第三位《青春頌》
2013年度叱咤樂壇流行榜頒獎典禮 - 叱咤樂壇男歌手銅獎
2016年度叱咤樂壇流行榜頒獎典禮 - 叱咤樂壇男歌手銅獎
2017年度叱咤樂壇流行榜頒獎典禮 - 專業推介叱吒十大第二位《神奇之旅》
2018年度叱咤樂壇流行榜頒獎典禮 - 叱咤樂壇男歌手銀獎
2019年度叱咤樂壇流行榜頒獎典禮 - 專業推介叱吒十大第七位《我們與愛的距離》
2019年度叱咤樂壇流行榜頒獎典禮 - 叱咤樂壇男歌手銅獎

華納時代嘅派台歌／5分數目／5分比例
停半分鐘聽一闋歌 102 70.34%
四書五經六欲七竅 35 70.00%
大雄胖虎綜合症 48 67.61%
偽人 58 66.67%
我們與愛的距離 82 66.13%
無力感 75 65.79%
荒廢之綠洲 53 65.43%
你可能未必不喜歡我 44 63.77%
單數 59 58.42%
慌 39 52.00%
強逼症進行曲 18 50.00%
藍血人 66 49.25%
白紙 47 48.96%
Negative 62 46.97%
體操 63 45.99%
根 63 43.75%
痛 24 42.86%
神奇之旅 47 37.01%
恐怖情人 48 36.92%
恨 37 35.24%
演員的自我修養 33 33.67%

～