|
 
- 積分
- 3500
- 貢獻
- 156
- 參與
- 3344
|
花姐勸睇心理醫生 AK失控噴涙：唔想認自己有病
Anson Kong（江X生）去年開始出solo歌，雖然成績不俗，但最終年尾頒奬禮未能奪得恨攞多時的《叱咤》生力軍獎，失望之下木無表情的AK，被外界指黑面冇風度狂插。早前他推出新歌《黑之呼吸》接受訪問，重提事件突然壓力爆煲流下男兒淚，他承認怕家人擔心而情緒低落，試過鎖自己在廁所幾個鐘，花姐曾勸他睇心理醫生，但他不想承認自己有病，亦想專心應付演唱會等排山倒海工作。不過他承諾會以健康的Anson走落好，希望可以快啲見番活潑開朗的AK啦！
AK坦承創作新歌《黑之呼吸》，確實跟叱咤頒奬禮當晚事件有關，「嗰日我有做得唔好地方，我冇去首先恭喜我隊友，太過沉醉喺自己個黑色世界入面，呢個係我需要改善嘅地方，《黑之呼吸》有講到呢件事，如何去處理自己嘅情緒，就係唔好傷害到別人先，我覺得我冇傷害到兩個兄弟，反而我傷害咗自己啫！呢個係我喺呢個頒獎禮上咗好大嘅一課，對我點樣面對自己情緒。」
提到對《叱咤》的情意結，AK竟然講到喊，「我哋11月出道，隔咗兩個月開演唱會跟住上《叱咤》，我好記得去完《叱咤》會有個會章同埋場刊，我哋第一次去只係喺個台度行出嚟，唔叫參與過，但大家好開心，自己都有份，我仲好記得返到屋企落妝未沖涼，坐喺廁所望住個章望咗10幾分鐘，終於去到啦！（喊）等咗咁多年終於去到，嗰陣時好開心。」
AK認為新人奬一世人只得一次，對獎項的渴望和野心，一直是他進步的原動力，因自知天份不及其他人，更承認過程給了自己不少壓力，「做得未夠好，點樣可以做得再好啲，一路形成呢種壓力，內心有呢啲情緒，唔知道點樣消化，特別入行後，呢一行忽然間唔係好容許藝人有情緒抒發，（眼濕濕）藝人就應該係廿四小時都positive，好攰㗎喎！藝人都會有收工時候，我哋出個post，打嘅嘢唔開心少少又會影響到好多人，開始會慢慢收埋自己情緒，有啲唔好嘅情緒都唔敢同人講，唔敢同屋企人講，最down嘅時候開始負面，又知道自己唔可以咁樣喎！開始搵其他嘢去做，瘋狂咁樣練嘢，但練嘢知道好多嘢唔夠，又畀咗好多壓力自己，呢個係一個好差嘅循環嚟。」
AK的情緒問題連花姐也替他擔心，「上年年尾到今年年頭，花姐都有叫我睇醫生，因為有段時間我唔敢面對屋企人，成日坐喺廁所度坐幾個鐘唔敢出嚟，我同花姐講呢件事，佢話應該要去睇吓醫生。（有冇睇？）暫時未，因為我唔想承認自己係有病，我覺得可以解決得到，又準備開騷比較忙，冇乜時間去處理呢啲嘢，我OK嘅，我會以一個健康嘅Anson走落去。上年係學習點樣去釋放自己壓力好重要一年，其實經歷過1月1號同埋呢幾個月之後，我自己係好咗嘅，亦都搵到個方法去令自己舒服啲，唔好畀咁大壓力自己。」
Link
個人意見：生生加油，今年組個新組合角逐新人獎第3次。有病記住睇醫生。
討論重點：Come on hater |
|
發表於 2021-4-14 04:15
| 
