返回列表 發帖
支持神曲
網上見到一篇解讀幾中意貼上蒞



//【超譯試當真樂評】《係咁先啦》:離開同留低嘅人 彼此都失語


(備註:《係咁先啦》喺試當真試映劇場嘅同名作品,我會視為一個有關聯但獨立嘅作品。呢篇係用超譯Style寫嘅樂評~)


有幸喺呢首歌第一次公開發佈嘅時候就喺現場,可以兩場Unison都去曬真係好好彩,到今日MC $oHo & KidNey出埋MV,成個內容都已經幾完整,好似係時候「超譯」呢首歌了XD


||個派對就係香港,離別就係移民||


成首歌一開始,係一個懷舊Party歌嘅感覺,編曲上用咗非常重複嘅Motif,以及一個非常平均嘅節拍,感覺呢啲編曲只會喺Party度出現,而唔係一般豪腎數白欖同埋一般Pop Song嘅Style。記得當時Unison表演現場用咗紅色燈光,背後大銀幕都係用紫紅色背景,同埋見到一個一望無際嘅大城市,高樓大廈後面係巨大嘅夕陽。當時已經心入面Wow咗出黎——個Feeling係想帶人返去一個舊嘅香港,一堆聯想即刻喺腦海出現:「馬照跑 舞照跳」、「傾城」......似乎呢首歌都係會隱含一種Sadness。睇返依家個MV,其實都有類似嘅Feel,MV 0:09 嘅大哥大、雀籠、黑超、牛龜電視、霓虹燈等等,數之不盡嘅符號,仿佛係一個歌舞昇平嘅年華,有兩個MC同你準備講嘢。


然後一入歌詞,就嚟料喇:


//走先喇係咁先喇 下 次 再 玩 吖        
再見喇係咁先喇 下次見啦吓
走先喇係咁先喇 下 次 再 玩 吖
再見喇下次見啦 有下次嘅話


見大家都飲到咁上下
望下隻錶嘩就嚟無尾班車啦
準備起身 你哋拉住我
話我飲唔夠 好似想同我死過
你哋唔明我幾憎搭 N259
而家唔走 飛的都至少兩舊
要平就要落 旺角轉小巴走
但係呢啲嘢 我點會講出口//


第一首歌,第一粒字,居然就係「走」,個Setting就已經係派對去到咁上下,「我」想走喇。仲要「我」已經暗暗知道呢個告別可能係永遠,否則你都唔會無啦啦講「有下次嘅話」。喺第一次聽未消化到歌詞嘅時候,豪哥就繼續講故事了:「我」想走係因為就無尾班車,但畀Party朋友拉住,唯有心裡嘀咕遲走有幾煩。


呢度實在非常明顯,「走」指嘅嘢就係離開香港。唔係夾硬譯,MV 0:33 - 0:40嘅背景,就係嗰條通向機場嘅快速公路。現場銀幕嘅城市就係香港,夕陽係個心情,而個Party顯然就同呢個「城市」對應,直接咁講,個派對就係香港,離別就係移民。


咁尾班車係啲乜嘢?要指代一樣嘢,夾硬可以話係英國LOTR,又可以話係出境自由,總之就係一個離開嘅好機會。如果唔走嘅話,就要焗搭N259、飛的、或者轉紅Van,總之就要付出更高代價、心力、風險。呢啲嘢你係唔會同仲喺Party玩緊Enjoy緊嘅人講嘅,因為一講就係掃緊興。


||離開嘅決心||


跟住,豪哥繼續用獨白去描述成個場景:


//喂啊 唔係啊 喂 真係要走喇  
唔係啊 喂啊  真係要走喇 喂
喂啊 唔係啊 喂 真係要走喇
唔係啊 喂啊 真係要走喇 喂


係~係兄弟 咁~點吖
唔好玩?好玩!但 都係要走㗎!


(即刻諗藉口唔畀你再挽留
即刻諗藉口唔畀你再挽留)
唔係唔係唔係你聽我講 聽我講 真係要走喇//


經過三節嘅時間,豪哥終於同Party朋友糾纏完。Party就係有一個要合群嘅氣氛,令你好似要喺個Party度存在,離開好似好尷尬咁;大概離開一個地方都係咁,要衝破嘅除咗代價之外,仲有來自留喺度嘅人嘅壓力。你係咪「兄弟」(手足),係你點解要走?依家係咪仲係「好玩」,係你又點解要走?呢啲說話會令到人掙扎同埋尷尬。


//要走就要走 要夠膽講出口
要走就要走 搵呢到嘅出口//


豪哥係一個去意已決嘅人,「要走就要走」,於是豪哥用佢嘅決心走咗。MV嘅呢段都幾Visualize到面對仲Enjoy緊Party嘅人嘅壓力同眼光,就算Ellen、呀慈、Ern9出埋手阻止(1:26-29),要走都係走到的。


咁個故事係咪完喇?Party係咪結束喇?唔係,而腎就代表咗之後嘅掙扎。


||回望嘅掙扎||


//Fing開啲手 我衝落樓
走嘅時候有 少少內疚
係咪掃咗佢地興 係咪太 不近人情
開始反省 我好似有啲明


Party冇咗我冇咁Fun
就係留住我嘅原因
其實大家高興先係最緊要?
我應該返去陪佢地到聽朝!//


腎仔同豪哥一齊走咗了,但就開始諗,其實呢個地方無咗我,係咪會令成件事無咁好?係咪令到大家無咁高興?好似離開咗呢個地方,先Feel到內疚,好似就算唔係真係Enjoy,為咗彼此,留低會道德上好過啲,無須承受嗰種離開嘅Guilt。


長夜漫漫,「黎明」(聽朝)都唔知幾時來到,自己一走了之好似真係對唔住大家咁。於是掙扎之下,許賢決定「回流」。


||所有嘢都係一廂情願 其實根本無人Care?||


回流咗嘅許賢,本身好興高采烈同朋友Say Hi,點知返到Party嘅佢發覺,啲「朋友」都好似唔係好Care。


//喂 係啊 我返嚟 喇
係啊 喂 有冇掛住我啊
喂 係啊 我地飲杯先啦
吓  咩話?你話轉頭先啊?


吓  佢地頭先唔係 係咁留住我既咩?
點解 而家 個個醉哂 冇人理我嘅?//


呢段獨白嘅層次係非常精彩。


頭幾次聽我都係Feel到許賢嗰種不解同埋憤怒——點解我決定為咗大家返嚟,居然好似無人理我咁嘅?Party啲人一定只係識得沈醉於紙醉金迷,留住大家嘅原因根本就係藉口!根本呢啲人已經好似《千與千尋》嘅爸爸媽媽咁,食食吓飲飲吓,已經唔記得咗自己身份,變成咗港豬!


但聽多幾次,固然呢層意思並無消失到,但諗落,許賢作為一個曾經離開Party一段時間嘅人,已經同呢度嘅人有段時間差,許賢根本唔知道,或者無經歷佢離開咗之後嘅Party。點解個個都飲醉咗?Party發生咗咩事?佢已經無法理解,佢其實只係知道,已經無人理自己了。


當聽眾未消化到呢段嘅時候,Kayan就出現。


||離開與留低嘅 已經係兩個世界||


//來讓我跟你走
回程順路 8折可享有
如唔順路就請放手
無謂尷尬啦好友


來讓我一個走
Sayonara 各位親友
無謂要我找借口
不如誠實吧 你我都玩夠


走先喇係咁先喇 下 次 再 玩 囉(再見囉)     
再見喇係咁先喇 下次見啦吓(Anneyong)
走先喇係咁先喇 下 次 再 玩 吖(Ciao Ciao)   
再見喇下次見啦 有下次嘅話 (byebye)//


(Kayan呢段嘢Auto-tune咗,非常容易上口又極洗腦,而到依家都唔明回程八折其實係咪港鐵同巴士嘅廣告,各大公司可以諗諗佢,洗腦程度完全就係廣告歌Level。)經過Auto-Tune嘅Kayan更加有一種「虛」嘅Feel,就好似唔屬於段片嘅任何角色咁,佢既唔係一齊離開嘅豪腎,又唔係Party入面嘅人,佢嘅角色,似乎係為呢首歌埋一個尾,做一個總結,講一啲戲中人好難講嘅訊息。


令我好深刻嘅有兩句,第一句係「如唔順路就請放手 無謂尷尬啦好友」。呢句說話好似同緊Party入面嘅人講,「放過嗰啲想走嘅人啦」咁樣,但調轉諗其實都係同上一節嘅許賢講:其實既然都唔同路,你就無謂要話人啦。Kayan呢度就好似講緊離開同留低嘅,因為唔同嘅諗法同經歷,已經道不同了,無謂干涉對方嘅抉擇。


第二句係「不如誠實吧 你我都玩夠」,睇落好似係話唔好再留低喺個Party入面,「玩夠喇」;但再聽,我覺得係講緊留低嘅同離開嘅「交集」已經要完結(「玩夠」),無謂強求可以說服或者影響對方。


特別係第二句,越聽越覺得Sad。Sad嘅位其實唔只因為講緊移民嘅無奈同埋離愁別緒,更加係Sad在哀嘆緊一個時代嘅悄然消逝。


還記得幾年前聽完黃子華最後一個棟篤笑,最深嘅感受就係,佢好似代表住最後一個絕大部分香港人都會聽嘅Narrative,而2018年嘅佢,已經覺得佢無能力再講一個大家都聽得入耳嘅棟篤笑了。因為香港人喺香港,已經失去共識,已經失去交集。亦都因為咁,黃子華同大家講拜拜;而到呢一年,到每一個香港人都同彼此講拜拜喇。最最最Sad嘅位,其實係我哋都因為各種原因,無法好好哋咁同人講再見,好似只係可以好行、好片面咁講「係咁先喇」。Rubberband嘅歌《Ciao》同我哋講嘅再見係好浪漫好深情,林二汶嘅《再聚》同我哋講嘅再見係好重好深刻,但豪腎嘅呢首歌,Somehow更加似現實情況——其實我哋根本就無辦法好好咁講再見。可能係太急,可能係太唔知點講,要離開嘅時候,其實我哋係幾乎完全失語嘅,到頭來講得出嘅就只有「再見喇」、「係咁先喇」。情感去到一個深處,係已經無從梳理,無從講起。


於是我繼續坐住車,喺無人嘅公路上面奔馳,搭去機場。唔知點講,但係......拜拜啦,係咁先啦,或許就係我哋離別嘅寫照。


#超譯試當真 #係咁先啦 #樂評 #移民 #香港 #派對//

TOP

勁洗腦 成個腦都係下次再玩吖
hello12324 發表於 2021-8-6 15:47



   腎仔把聲!

TOP

返回列表