熊貓 - 鄭俊弘

PEACH

歌曲宣傳人員: Discovered

歌曲: 熊貓
主唱: 鄭俊弘

收錄大碟: TBA
推出日期: TBa

派台日期: 31/7



作曲：張家誠
填詞：楊熙
編曲：張家誠
監製：張家誠


情人駱驛為何盡興都別離
仍然念舊就如熊貓般等你
晴或雨　仍然堅守故地　全為你
怕你一天歸來不可抱起

熊貓專一至死　不理如何傷悲
從不轉換口味　但未能換到你
太過簡單如何玩爭逐遊戲
偏等不到誰人救起
熊貓只等鑽禧　不寄望能驚喜
誰可以認真地　願容納這絕種的悽美
無論寄居在何地
叢林的土地　仍然芳香得懷念你


仍然日復日從沒有數日期
無論十月十年熊貓都等你
晴或雨　仍然堅守故地　如果你
怕你一天歸來未可勾起

熊貓專一至死　不理如何傷悲
從不轉換口味　但未能換到你
太過簡單如何玩爭逐遊戲
偏等不到誰人救起
熊貓只等鑽禧　不寄望能驚喜
誰可以認真地　願容納這絕種的悽美
無論寄居在何地
叢林的土地　仍然芳香得懷念你


熊貓專一至死　不理如何傷悲
從不轉換口味　但未能換到你
太過簡單如何玩爭逐遊戲
偏偏根本無人會想起
熊貓只等鑽禧　不渴望全新驚喜
誰可以認真地　願容納這絕世的福氣
無論寄居在何地
叢林的土地　傻傻等的只會為你

discovered

歌詞好感動!

賴爽

zzzzzzzzzzzzz 悶到喊

肥千

編曲好吵

kevinlai1621

好心啦, fred 唔差lol, 但下下都派呢類歌真係好悶, 無謂糟塌一個好歌手la

我聽完第一段已經唔想再聽

bagfgfcde

verse轉chorus轉得好差

hinsfan0927

我俾4分, 因為係張家誠作既曲, 有番咁上下水準!

Crooks

曲、編、唱腔都好老土

Bluejays

時代曲 1996
Angels 1997
愛的根源 1984
If I Fell 1964
Give Me One Reason 1995
青春頌 2012
信任 1998
歲月如歌 2003
Come Together 1969
我應該 1999
Crazy Little Thing Called Love 1980
追 1994

Fred 參賽嘅歌，唔計指定比佢唱嘅 青春頌，最新已經係 歲月如歌。
佢適唔適應到而家廣東歌嘅style，仍然有待證實。

所以佢嘅問題，唔係唱歌比賽唱慣 cover，可唔可以建立自己嘅 style，
而係佢喜歡唱嘅歌，引申左呢個唱腔出嚟先係問題。

另外，呢首歌嘅 phrasing 同埋用 pause 嘅方法，比 無名氏 更變本加厲。
如果呢個係佢想建立嘅特色之一，我覺得係走錯路。

rainbowdash

曲、詞同唱腔仲有冇老土D呀大佬。星夢仲要複製幾多呢類歌？

Bluejays

熊貓 首歌本身，令我諗起 欣宜 嘅 寵物牠，
同樣係一首 曲詞編 都普通嘅慘情 K歌，
單靠歌手本身形象同某種動物有關做 selling point。
咁樣食老本法，絕對只係虛耗緊 Fred 係市場上累積左嘅籌碼。

我本來期待 螞蟻 會搵到個朋友
（同樣係新人年 2nd plug 嘅 動物/昆蟲 兩字歌名歌），
可惜原來只係隻 寵物牠。

sosomusic

螞蟻  遇到 歌手，歌手把歌唱起左，歌手亦因歌曲而多了代號，歌和歌手互配，絕對唔係硬sell 。。。講講下，超想聽螞蟻 ... 哈哈

rubylovessss

好好聽...但係唱腔就扣左1分

ed8671ed

一個字，悶
原因好簡單，因為佢間公司叫做星夢，佢老細叫做why capture image

星勤

2014.08.01 鄭俊弘《熊貓》
sigh... STUPID

首先，我真心佩服呢個 artwork，你以為之前果啲已經好 hea 好醜
星夢話俾大家知咩叫低處未算低之可以再低啲
我諗整 artwork 果個一係其實唔多識用軟件，只識用小畫家
一係就星夢應該無俾錢佢做
其實一首歌，包括放上 youtube 嘅 artwork 或者歌詞版 MV
全部都係一首歌嘅配套，絕對會影響大家對首歌或歌手嘅觀感
寧願好似 EEG 咁 standard，都唔會想好似星夢咁，一次恐怖過一次

聽過幾首鄭俊弘嘅作品，包括劇集主題曲、翻唱歌以及上一首派台《無名氏》
越來越發覺鄭俊弘嘅歌路，以當一個歌手黎講，可以話窄得離奇
《無名氏》表現出佢把聲無柔情，只係硬邦邦地去唱
翻唱《每一個明天》《今日》，表現出佢感情輸出虛弱
到《熊貓》，仍然只覺得佢係張開口唱歌，唔識做高低起伏
一開頭最多叫細聲啲，但仍然係中氣十足咁放把聲出黎
我諗佢要一位歌唱老師，去話佢知點樣先可以放輕放鬆去唱歌
否則，佢真係只合適去做 band 仔，仲要係首首 rock 歌果種

上次都講過，佢響「星夢傳奇」最 charm 最令人眼前一亮嘅時候
係佢拎起結他去演唱嘅時候，睇黎星夢呢間公司靠樂壇救世主都係唔得掂
佢嘅眼光可以話真係咁多大公司入面最差
明明已經算有 budget，有規模，仲有咁大個後台
都可以做到一個歌手完全失去光環，我真心戥簽左入去嘅人慘
星夢如果唔換人話事，我諗都幾難有歌手可以好好發圍

charchau

我覺得<無名氏>引起共鳴大過呢首...太普通

KyleHo

呢首旋律好過無名氏好多,
係Fred 4首單曲最好聽慨一首,
如果係電視劇歌曲應該會hit...反而之前兩首主題曲都好難聽

怪獸一族

成首歌又悶又舊, 零分

Flambeau

點都好聽過第1 PLUG

hiraoka

來到第二plug, 鄭俊弘的新歌仍然毫無起色, 堪稱本年度最雷聲大雨點少的新人.
一睇作曲人是張家誠, 已經知大鑊, 張家誠高峰已過不用爭議, 他近來的歌最多是平穩, 但完全不突出. 這一首, A段轉副歌毫無鋪排, 用編曲格硬推兩拍就去副歌, 相當離譜. 而且張家誠幫TVB寫太多主題曲, 用他的曲根本無可能分得出與一般電視劇主題曲有咩分別, 猶如自殺. 而且究竟成首歌的意念與熊貓有咩關係? sorry, 我唔知道.
而鄭俊弘亦再次證明他唔應該唱K歌, 他用聲用力的方法, 都將成首歌唱得非常老氣, 彈結他唱country music才是他的專長, 星夢娛樂唔可以睇清楚他的特質才造歌呢? 或者, 這已經對星夢娛樂要求太高.

thecool123

來到第二plug, 鄭俊弘的新歌仍然毫無起色, 堪稱本年度最雷聲大雨點少的新人. 一睇作曲人是張家誠, 已經知 ......, 用他的曲根本無可能分得出與一般電視劇主題曲有咩分別, 猶如自殺. 而且究竟成首歌的意念與熊貓有咩關係? sorry, 我唔知道.
hiraoka 發表於 2014-8-4 01:53

非常同意。我亦完全唔明成首歌的意念與熊貓有咩關係。所以我覺得最出事係D詞。平常人諗起熊貓會先諗起佢地係國寶,未必會聯想到佢地點樣痴情。所以歌詞用熊貓做一首情歌嘅主角,感染力上已經打咗個節扣。最差係成首歌內容單一,每句歌詞都系不斷重複熊貓會等愛人返來, 欠缺變化同層次, 亦沒有有趣的比喻, 所以聽完只有一個悶字。

Bluejays

而鄭俊弘亦再次證明他唔應該唱K歌, 他用聲用力的方法, 都將成首歌唱得非常老氣, 彈結他唱country music才是他的專長, 星夢娛樂唔可以睇清楚他的特質才造歌呢? 或者, 這已經對星夢娛樂要求太高.
hiraoka 發表於 2014-8-4 01:53

佢而家最大問題唔係唱緊K歌，而係唱緊比大年紀啲人聽嘅K歌。
即係話佢個 惠康market 主宰緊佢嘅歌路。
本來 惠康audience 都會受彈結他唱country music，
但咁又冇左啲 digital sales，只可以喺電視度做 entertainer。
成也風雲敗也風雲，佢一日甩唔到嗰個 market，都只可能咁樣落去，
但到佢唔再需要靠嗰個 market 嘅時候，佢已經係下一個林峰了。

hiraoka

佢而家最大問題唔係唱緊K歌，而係唱緊比大年紀啲人聽嘅K歌。
即係話佢個 惠康market 主宰緊佢嘅歌路。
本 ...
Bluejays 發表於 2014-8-4 03:24

我覺得個隻唱俾年紀較大的人聽的感覺, 其實源於佢的唱法多過個MELODY, 係佢本身唱呢類歌引發, 佢唔轉歌路, 永遠都死

Akaisha

非常同意上面幾位
可唔可以畀返彈結他個鄭俊弘我
同埋 熊貓份詞 真係幾夾硬 有位知識頗淵博的朋友說熊貓根本不是忠貞的動物⋯

Bluejays

我覺得個隻唱俾年紀較大的人聽的感覺, 其實源於佢的唱法多過個MELODY, 係佢本身唱呢類歌引發, 佢唔轉歌路 ...
hiraoka 發表於 2014-8-4 10:04

我都係講緊佢嘅唱法 ... 一個監製冇阻止嘅唱法。
一個被喜歡佢咁唱嘅聽眾們稱為「聲音清脆 咬字清楚」嘅唱法。
「聲音清脆 咬字清楚」就係年紀大啲嘅聽眾失落多年想搵翻嘅聲音。
我地用緊時下嘅標準去聽，其實係咪抹煞緊佢個市場渴求緊嘅聲音呢？

lemontea1069

我都係講緊佢嘅唱法 ... 一個監製冇阻止嘅唱法。
一個被喜歡佢咁唱嘅聽眾們稱為「聲音清脆 咬字清楚」嘅 ...
Bluejays 發表於 2014-8-4 14:59

聲音清脆 咬字清楚 唔係上一代人先會追求...
聲音清脆 咬字清楚 唔代表冇feel....eason / 巨gay 唱歌咬字都好正確, 佢地都係呢一代
但鄭佢似嗌交

Bluejays

聲音清脆 咬字清楚 唔係上一代人先會追求...
聲音清脆 咬字清楚 唔代表冇feel....eason / 巨gay 唱歌咬 ...
lemontea1069 發表於 2014-8-4 16:02

去到 嗌交 vs 有feel 呢個層面我好同意。
但上面大部份 comment （包括我），都係頂唔順個老土腔，
我諗如果將問題直接指向 嗌交腔 會清楚啲，
即係 星勤 指出嗰個 band仔 問題先係真正嘅問題。

johnsonlau

中規中矩, 不太差, 3分

longtime

聽都唔想聽直接1分，如果可以比0分就直接0分~

hello12324

3分
詞,唱腔各扣一分

CBY0710

2mark
too boring

Flambeau

睇怕佢隻碟=一堆劇集主題曲+一堆K歌(其實兩者都係同類) + 可能包括改編歌

= 唔方可以紅到

twofive

我聽到一個有無限可能的歌手慘被唱片公司生葬, 原可給1分, 但鄭俊弘是值得支持的歌手, 所以給3分!!

Akaisha

巫啓賢在訪問中提及對星梦策略及Fred保守歌路的擔心
部分粉絲順勢微博起義

Bluejays

巫啓賢在訪問中提及對星梦策略及Fred保守歌路的擔心
部分粉絲順勢微博起義 ...
Akaisha 發表於 2014-8-10 00:30

唉，個起義方法係唔好谷到個 digital sales 咁行囉。
呢頭叫佢改，嗰頭又博命買，星夢點會理呢。

Akaisha

唉，個起義方法係唔好谷到個 digital sales 咁行囉。
呢頭叫佢改，嗰頭又博命買，星夢點會理呢。 ...
Bluejays 發表於 2014-8-10 00:58

有d人反起義添啦⋯
唔通真係覺得咁樣落去對F係好 理解不能

Bluejays

有d人反起義添啦⋯
唔通真係覺得咁樣落去對F係好 理解不能
Akaisha 發表於 2014-8-10 01:34

林師傑係唱 rap 嘅，而家扭到自己唱倒 K歌，變左有銷量。
Jay Fung 從來都係唱佢自己 style 嘅歌，有口碑但零銷量。
Alfred 出隻魂遊太虛，網上銷量都死直。
要有心理準備 what we're asking for。

Akaisha

林師傑係唱 rap 嘅，而家扭到自己唱倒 K歌，變左有銷量。
Jay Fung 從來都係唱佢自己 style 嘅歌，有口碑 ...
Bluejays 發表於 2014-8-10 01:45

    而家Fred咁樣 銷量口碑都欠奉wor...

Bluejays

而家Fred咁樣 銷量口碑都欠奉wor...
Akaisha 發表於 2014-8-10 01:48

銷量欠奉? 你睇睇 itunes 啲數。
如果唔係，我都唔會話「嗰頭又博命買」啦。

Akaisha

銷量欠奉? 你睇睇 itunes 啲數。
如果唔係，我都唔會話「嗰頭又博命買」啦。 ...
Bluejays 發表於 2014-8-10 01:53

多幾日根本撐唔住⋯好少街外人買 kkbox都唔算好好成績
林師傑果d真係有路人買架bor 雖然可能只係電視劇效應

Bluejays

多幾日根本撐唔住⋯好少街外人買 kkbox都唔算好好成績
林師傑果d真係有路人買架bor 雖然可能只係電視 ...
Akaisha 發表於 2014-8-10 11:45

我想像緊星夢嘅答案：
唔適合唱 K歌？去學，去調整 直至得為止囉。
冇人嘅過去與現在嘅差別大得過林師傑，佢得個個都得。

仲有一個問題唔好忘記：
佢已經拍落嘅兩部劇都係走乖仔路線，亦係可以令佢再紅啲嘅機會，
如果佢嘅歌路同佢喺劇集嘅形象有太大反差，亦唔見得會被受落。
到肯比佢演啲反叛嘅角色嘅時候，或者有得轉，
但係為左要保護佢啲 惠康 P&G 廣告陸續有嚟，又唔似會比佢咁快轉。
咁當然，拿吉他唱校園民歌嗰隻都得嘅，但咁咪仲唔適合佢把聲？
唉，我已經用緊林峰條路嚟睇件事。
冇法，又拍劇又有接廣告潛力嘅 TVB人，有太多限制了。

chuniiii1020

其實呢首歌佢已經搵老師執過
但係作為一位老師只可以幫到佢有對、錯既問題
例如拍子、音準、歌詞既PHRASING
反而唱腔、STYLE上既問題好難去JUDGE
佢只可以幫手詮釋呢份歌詞既內容
俾個REFERENCE佢點樣拿捏份感情

星勤

其實呢首歌佢已經搵老師執過
但係作為一位老師只可以幫到佢有對、錯既問題
例如拍子、音準、歌詞既PHRASING ...
chuniiii1020 發表於 2014-8-11 14:26

「反而唱腔、STYLE上既問題好難去JUDGE」

呢個係監製嘅功課

chuniiii1020

「反而唱腔、STYLE上既問題好難去JUDGE」

呢個係監製嘅功課
星勤 發表於 2014-8-11 15:19

呢首歌已寫入張家誠既歷史 LOL
監多十首好歌都洗唔走呢粒污點

Bluejays

多幾日根本撐唔住⋯好少街外人買 kkbox都唔算好好成績
林師傑果d真係有路人買架bor 雖然可能只係電視 ...
Akaisha 發表於 2014-8-10 11:45

而家嘈到上 facebook，睇下星夢肯唔肯「放棄」3rd plug，
比 3rd plug 做拿電台 AP 嘅歌喇。
之前 Alfred 同 Hubert 新人年 年尾 嘅時候，
都會出隻合電台口味嘅歌嚟爭新人獎，所以其實都樂觀嘅。
總之佢地一向嘅做法係， 出碟派台歌 就企硬一定要K歌，
但係年尾派台有商量。

講真，sales 嗰邊唔好諗街外人住喇，
班 fans 出乜歌都可以做翻同一個數比佢，出隻電台歌都冇壞嘅。

Bluejays

呢首歌已寫入張家誠既歷史 LOL
監多十首好歌都洗唔走呢粒污點
chuniiii1020 發表於 2014-8-11 15:28

其實我都好想知道點解 張家誠 會比佢用呢個唱腔。
佢睇倒啲乜野係我地睇唔倒嘅呢？

Akaisha

而家嘈到上 facebook，睇下星夢肯唔肯「放棄」3rd plug，
比 3rd plug 做拿電台 AP 嘅歌喇。
之前 Alfred ...
Bluejays 發表於 2014-8-11 20:09

   班 fans 出乜歌都可以做翻同一個數比佢，出隻電台歌都冇壞嘅。   Exactly 其實fans想聽到嘅可能反而係一首電台歌
   講真 星夢想谷但又唔想使錢 成日求救 好肉酸lor

Bluejays

班 fans 出乜歌都可以做翻同一個數比佢，出隻電台歌都冇壞嘅。   Exactly 其實fans想聽到嘅可能反而 ...
Akaisha 發表於 2014-8-11 21:02

唔知隻碟有冇首 電台歌 係唔會趕走 惠康 嘅呢
呢個真係一個好有趣嘅夾縫位

Akaisha

唔知隻碟有冇首 電台歌 係唔會趕走 惠康 嘅呢
呢個真係一個好有趣嘅夾縫位 ...
Bluejays 發表於 2014-8-11 21:06

   其實我唔係好鍾意惠康廣告 主要係因為…  
   反OT: 唔知佢自己作果首仲係唔係度… 聽講張家誠首pop rock叫 投降吧(原名I CANNOT)