- 積分
- 3347
- 貢獻
- 202
- 參與
- 3105
|
係Facebook同blog post左,都係度 share 下:
呢幾日係集會現場或其他地方同唔同既人傾計,了解過佢地既睇法同擔憂,尚且係度分享下,再集思廣益,尋求一個大多數人可以接受又能夠讓運動達致一定程度成果既出路:
共同一致既係要譴責暴力,亦明白梁振英下台絕非是次訴求重點,政改先係主菜。但到底要用咩策略,爭到去咩位就各有意見。
有一類 [暫且叫為A餐],認為冇可能係冇任何讓步情況下退場,經歷過反國教反高鐵撐港視運動後,每一次都只得所謂「階段性勝利」,實則咩都爭取唔到 (國教有成果與否至今仍有爭議); 今次點可以又一次「比D掌聲自己」然後散水?
於是政改方案上既取態一直堅持「公民提名」同「取消功能組別」。冇呢兩樣承諾就要行動升級,至於點升級就各司各法,暫時當然以衝擊或佔領政府部門為暫時叫得最響最具體既升級行動。但幾時升級亦有唔同,等談判定唔等呢? 究竟而家係咪仲有談判空間? 但一旦呢一次都改變唔到任何野,將來民主進程就會更絕望。
有一類 [暫且叫為B餐],認為目前「遮打革命」也好,「佔中」亦好,已經係贏左,國際輿論一致讚好,催淚彈同滋事群眾已充分曝露梁振英政權的邪惡本質,連日來的「愛與和平」亦已讓香港人睇到公民質素既體現,最重要係一班本身唔關心政治既普通市民,有左政治覺醒。
所以,要知所進退,係時候搵個機會全面撤退,當然反佔中而家暴力橫行,此時此刻不能示弱。不過,再支持耐d,民氣會散,始終返工返學既人要長期留守有難度,同埋的而且確部分人既生意受到一定影響,埋怨會逐漸累積造成反彈。特區政府既談判只係下台階,人大框架已定,冇改變既空間。咁整個公民抗命只係宣示姿態,而並無得到實質政改上既讓步。
我並唔知道學聯而家諗緊咩,但根據我既觀察,圍繞住或最接近學聯既係B餐。咁當然唔代表學聯一定同佢地立場一樣,不過呢一種諗法應該會較多傳到學聯耳中,從而達致影響力。
我所寫出既係兩邊既大方向,亦因此長遠而言就一定會出現分歧 (其實唔需要長遠,呢兩三日矛盾已經加劇緊)。就我所觀察到既,香港人似乎較受落B餐既一套,因為比較實際,認為共產黨唔會妥協,害怕再升級只會流血收場。但A餐又認為,咁樣一開始就咩都唔駛做啦,反正都係得個吉,所以A餐眼中,B餐等同「投降派」。
A餐之中,有人認為B餐人長期壟斷社運,冇資格代表人民,所以係呢次自發性抗命不斷強調冇大會,冇人可以代表自己,亦唔信任「糾察」既設立; B餐之中,亦有人認為 A餐只係借學生光環先有聲勢,否則根本唔成氣候,必要時要割蓆。關於據點問題,A餐希望長期抗戰,所以有擴張戰線去流動佔領既主張; B餐就希望集中金鐘,因為太散容易係少人時被逐個撃破。
A餐B餐各自有人認為對方想係現階段收割政治能量,如插旗如揸咪,我唔能夠評論呢樣係咪事實,因為我承認我並無逗留足夠多時間去見到呢種事並判斷其背後動機。傳聞謠言係網上滿天飛,有時唔係親眼見未必可以輕易相信。只係我都認為呢一刻唔應該擺出任何「自己係代表」既姿態。談判對出窗口需要有,在於兩邊,我覺得學聯目前都係唯一最有說服力可以出黎講野同做談判代表既組織,呢個時候亦只能表示信任同鼓勵,而唔係猜疑。當然學聯歸邊既嫌疑一定存在,但係咪一定只有兩個餐揀? 唔係A就係B?
A餐B餐各自亦有人認為對方可能係間諜,旨在維穩與分化。我認為咁樣講並唔公平,我都親眼見證過屬於A餐既人,係最關鍵既上星期日,學生被拘留時,有親身參與堵馬路; 同時 B餐所講亦唔係完全冇道理,因為出面既人點睇,確需顧及,唔想輸左民心。冇錯,A餐B餐以外,街外中間個堆先係大多數。
我可能仍然未寫出點解兩個餐既代表人物,明明本身都係話爭民主,點解偏偏唔能夠團結? 關鍵係 A餐對B餐 爭取既目標冇信心,認為佢地未嘗試先宣揚失敗。B餐就認為A餐過激,普遍市民唔支持,亦對大局無補於事。
面對呢個難解既困局,我希望學聯唔好背棄任何一方,若然真係會有對話,請務必先要堅守兩大原則:「行政長官選舉要有公民提名」同「立法會選舉要取消功能組別」。談判唔係一朝一夕立即達成,所以一定要叫價最高,然後桌上拋方案再傾。亦盡可能要公開透明,因為上次民主黨密室傾政改已有前科。特區政府一定要跟人大框架既話,就要考慮兩個大原則既細節有冇討論餘地,例如選委會組成既元素,可唔可以係立法會直選議員? 立法會選舉取消功能組別,即使唔係黎緊呢一屆,咁有冇可能有時間表? 可以逐步減少功能組別數目嗎? 要傾其實真係好多野都可以綑綁一齊傾,就睇邊樣野對政府係次要而對人民係優先?
如果咩都冇而叫群眾撤離,實在太耗損士氣,亦絕對會影響下一次再有公民運動既參與度。但如果企太硬又會造成僵局,AB餐進一步分化,民怨加深就會自動搞散。我真係希望香港會有曙光,政改會有突破,所以學聯千祈唔好揮霍信任同辜負期望。佔中三子同泛民言論已經唔太對路,希望學聯撐得住,加油。
[在此將幾種不同論調大體上歸納為A餐B餐,其實只係方便討論。實際上,每個人有唔同既諗法,AB餐對於個別細節上既睇法都可能同上述概括既印象不符,如果有講錯,希望唔好介意並加以更正。] |
|