- 積分
- 13065
- 貢獻
- 217
- 參與
- 12848
|
《蘋果》專訪
http://hk.apple.nextmedia.com/enews/realtime/20150730/54032328
《羅生門》引起嘅共鳴,係源自我哋面對舊愛不捨及執迷,十二年前嘅《耿耿於懷》已經說明若懷內放滿對你的愛,害怕一直也再沒法戀愛,但人總需要勇敢生存,多年後的「他」身旁已經另有愛侶,只是骨子裡仍然放不下那個「她」。
麥浚龍(Juno)噚日接受本報專訪,感謝外界對《羅生門》喜愛,說到由《耿耿於懷》延伸嘅《念念不忘》系列嘅出現:「如果只係做《念念不忘》講返十二年前呢個男仔,吸引唔到我去做,我想好誇張咁做,我好貪心,想知道十二年後呢個男仔更多嘅事,我要做一隻碟去講佢同佢身邊出現嘅人同事,好似角色扮演咁,用一隻碟去知多啲呢個男仔。」
這刻嘅Juno係堅「離地」嘅,離地係因為佢「導演」身份,喺新碟《Addendum》裡面,除咗演唱者,亦係一個說故事的人。Juno表示:「拍完電影,習慣咗講故事嘅模式,如果我哋將呢個男仔嘅故事變成電影,咁就唔可能只係得佢一個角色。到正式同阿Y(黃偉文)開動呢件事,我就同佢通電話話《念念不忘》、《瑕疵》同《羅生門》係必須有嘅。有得呢個十二年前嘅男仔,就會想知十二年前嗰個女仔,即係Kay(謝安琪)嘅相反視點,同埋呢個男仔十二年後嘅現任伴侶點睇,即係Karen(莫文蔚)。」
提到「聲演」前度嘅Kay與「聲演」現任嘅Karen,Juno直言自構思「他」的故事開始,已經意屬兩人:「我要知道呢兩個女仔處於咩心態、狀態。我同Karen識咗好多年,而透過Karen嘅形象,有種淡然感覺,好快觀眾就會接受到呢個淡然味嘅角色。而我從Kay嘅歌,聽到佢好叻運用把聲,佢有種不捨,兩個都係我第一人選,於是我即刻打畀佢哋邀約。」
至於《瑕疵》及《念念不忘》合唱比例,Juno表示係刻意佔較少部分,佢話由於冇受過正統音樂及電影訓練,創作上啲人可能會問「Why」,但佢會問「Why not」,Juno謂:「拍完電影之後,我習慣企後一步去睇,Day 1我要做《瑕疵》同《羅生門》就已經諗住比例係2:8咁樣,因為故事嘅女主角都要有足夠場口去交代,要夠戲份去飾演,點解合唱歌一定要一人一半?」 |
|