2023年尾十大AKA最佳音樂企劃 & 講經時間

深知自己揀十大唔睇時間，但唔知算唔算欣喜既事，

就係唔少資深過我既樂評人都話十月夠歌十大，起碼我都唔算偷步得太早XD

講堅今年既歌質素係好過2022, 但係比起爭崩頭既2021我覺得仲爭少少.....

既然喺呢度出文，個人覺得免責聲明多少都要寫。

首先，呢堆只係我覺得適合自己推俾大家聽既單位，合大量個人意見，

請唔好問「點解冇邊個」，講真我唔係個個單位都走去聽，

以前好捧既，而家可以直入回收桶；另外，應該一啲都唔主流，

聽過，同喜歡，係兩回事。

開波。

第十位真係爭得好崩下，本身有三首歌侯選，<God Save the Queen>、

<塵大師>、<Sensei> 三揀一，GSTQ 個人覺得復古舞曲風同男女對唱幾搶耳，

反而話性別野我就唔算太著眼；而塵大師嗰度，我諗有留意小妹既都會聽過，其實近呢兩年、無論東方宗教思想定西方身心靈題材都多入詞，呢下係一個趨勢但個人覺得只係現象唔需要太著墨。點解最後揀左WinWin? 其實佢既歌路有少少同Marf 撞，都係有自己想法加跳脫之類，你可以話佢成首歌甚至佢既味道好偽日，但係佢呢首歌個曲詞真係立體左，新人入場劵得唔得其實唔理，但喺呢個資訊同數位音樂氾濫既年代，要有未來，最先要個格入腦。

頭先提到Marf，要不是本身J1M3隻碟我入晒血 (下Part企劃會提返)，其實佢三首我都覺得唔錯，有一樣野不得不提，就係佢同Winka 條路唔同、班底唔同，受眾就爭好遠。相比鏡都好固定班底集團，領由「The Bright Side」起真係嘩左聲(喂, Rubberband喎!!!) 之後Marf隻Debut, 藍。奕。邦(!!!!!!!)(一千個眼突) 唯一一個注意位係Marf既作曲人係全外籍 (綻放啲歌我唔計啦下), 走國際線其實都係一個選擇，但第日如果要突破呢個曲風框框吸多Ｄ受眾就要諗下點做…

然後第八嗰度係一篇道歉文，以前會納悶，點解「為何他不夠愛我」呢堆都有最歌投，因為個人覺得「年歌」唔係DJ播得多、Fans夠人齊就說了算，係一年裡面，大家覺得最有共鳴、最有Noise先係路（所以上兩年我係投網絡安全隱患同係咁先啦、小心地滑但好明顯射晒落海），今年，如果你問我投咩，我起碼頭嗰浸會投Dear Myself。其實成首歌係扮惡搞地認真(同「情定唐人街」係孖生兄弟但完全相反)，首先阿檸既寫作背景、尹光既形象係好痴線既反差，今次可以話係一個史詩式突破(Sor, 誇張D咁多)，呢首係Big Ballad到唔恨，但係真係要有返一個年紀你先會明當中既曾經滄海、過盡千帆。

前少少係一個「賭命」既反面示範。其實近呢幾年，我先發現自己係隱性既藍奕邦患者。由熱帶魚、快樂王子開始已經中晒毒，唔好講「無非想快樂」係我人生暫時三大神碟之一。「竇」、「情定唐人街」我會覺得擦邊到唔知想點，但「生」同「命」我係差唔多未派台 (派台無耐) 已經肯定年尾十大見。隻命12:00首播係喺辦公時間偷聽但忍眼淚都要一定能力。諗住「命」有Youtube 可以截數收工，今日仲要派佢幫周國賢隻Fall, 應到媽媽聲!!! （周仔係上年我最喜愛音樂企劃）不過呢，都係一句，應，同推介，係可以分開既。

如果你講周仔、邦係經歷過情緒先至見青天既，以下呢個音樂單位，係，唔係香港人，但誠意推介俾大家，佢叫同理。佢喺聲林3度拎第4，但係佢既R&B 真係好正，唔同既係，你聽過上一代既R&B / Hiphop，好多時係有既定形象，（偽「純愛」嗰D or 有錢炫技最愛囡之類），佢唔係冇，但好聽既更多係講自己喺神檯度作歌、屋企冇錢既躁鬱????、仲有係Down完之後要繼續晴天既自強、還有以心療心既心願。一隻碟20首歌隻隻有歌詞係大癲。

Then 有兩個女歌手喺我度今年係好眼前一亮既，先講真係「嘩」一聲既Regen.C (張惠雅)。其實喺未有「蓮」之前，我聽過Wish you are Okay, 係啲好後疫情既打氣歌囉，但係因為某樂評人一聲「大癲」，我真係wow左一聲兼差唔多700字長文。「通」其實係唔差既，但搶耳度同接受度的確比之前係爭咁啲。特別關注呢兩首既唱腔係配搭件事所以係完全同之前唔同既，但，講完呢啲好特定主題，What’s Next?

同樣有定性問題既，當然仲有今年個人年歌兼女金既主人— 陳蕾身上。陳蕾士的琴箏係點我唔記得，但肯定既係，當年靠陳蕾士食糊/ 食彈既朋友，應該都係陳蕾既受眾。四首有三首Hunter野，但我完全唔睇所以冇留意，但係肯定既係，佢其實好困於三幅被: A. 講30+既生活問題 B. 講世界既現實 C. 要正能量 ＆ D. 全部都係。橋玩得太公式的話其實長遠發展係有D問題，呢下華納高層要諗下佢。

好, 最後講今年既最愛企劃, J1M3隻碟我真係被佢綁架左大量Airplay。本身講自然地貌，係好難吹到人認同既野，但佢搵左小克包全碟填詞之後，CLS地樹海到而家冇播住都經常腦Loop。先旨聲明，我都係知左無耐佢係Fabel既二分一 (但本人係好鍾意Fabel既。) 再加埋MV呢下其實成件事好整齊（甚至佢風蝕崖岸個MV / 雪崩個詞度其實都幾Suit 今年個人既年歌--「窮人的薔薇」。喺以巴未開火之前冇諗過係佢，但後來聽落真係有D戚戚然）

最後 , 講完經就數返個十大

10 – Sensei @ WinWin 楊安妮

9 – 樹海@ J1M3 Ft. 雷芊彤

8 – Dear Myself @ 尹光 Ft. Wan K.

7 – 命@ 藍奕邦

6 – Paramita @ Mastamic

5 – All is Well @ 同理

4 – 雪崩@ J1M3 Ft. Kendy Suen

3 – 風蝕崖岸@ J1M3 Ft. Lolo

2 – 蓮@ Regen.C

1 – 窮人的薔薇@ 陳蕾