不過就算去商台叱咤,一樣是非多多,有傳話佢今晚會攞叱咤女歌手銀獎,唔係金獎,祖兒就話:「有人話我金有人話銀有人話銅,總之係三甲已經好好。大家都知我今年乜嘢環境,九月先至出歌,今年好多私人嘢做,身體狀況,屋企人嘅身體都需要我去照顧,今年嘅崗位就係做一個好好嘅女兒。呢行冇永遠嘅勝利,所以我今年要養好我嘅身體去跑呢場馬拉松。本身我今年都冇諗住角逐,不過公司同歌手好難有共識嘅,所以都尊重公司嘅決定。」
祖兒去年都叫做有新歌推出,雖然係九月至出,遲就遲咗少少,但宇宙巨星G.E.M.一首歌都冇就連掃四個大獎。祖兒笑言:「依家係新世代,依家係新嘅準則同新嘅規則,我哋都要與時並進。」
記者笑言依家啲後輩開始耍大牌喇……祖兒聞言又笑:「咁我都要耍下喇!」係咪覺得G.E.M.遲大到唔應該講大話?祖兒就話喇:「慢慢學習啦,佢都係年紀細。呢行要學做事,技巧上都要慢慢學。我都係不停錯,大家不斷俾機會我,先至今日嘅我囉。」 |