音樂人陳澤鴻GooChan偷食18歲妹豬斷正宣布無限期退出幕前

27歲的音樂人陳澤鴻GooChan ，曾為多位年輕歌手作曲及編曲，當中包括MC張天賦、張蔓莎、馮允謙、洪嘉豪等。GooChan與KOL女友芷希拍拖七年，二人間中都會社交網放閃，近日男方斷正偷食18歲妹豬，更被正印「捉姦在床」，有網民在社文網分享短片及錄音證據，並圖文片並茂寫上「香港著名獨立歌手/作曲人渣GooChan陳澤鴻背七年女友出軌偷食十八歲妹豬被捉姦流出」。

事件爆出後，GooChan 今晨亦火速在社交網發文向女友道歉，並表示無限期退出幕前工作。

疑似GooChan被斷正影片瘋傳

從網民的片中見GooChan 與芷希敲門行入房間，見床上非常凌亂，而18歲妹豬則躲在門後，GooChan表示：「出嚟喇，唔洗（匿埋）喇，出嚟喇。」，芷希就問：「有無覺得對我唔住呀？」而「妹豬」就面無表情。網民更指該名「妹豬」與Tyson Yoshi撞樣。

女友︰佢做乜瞓咗我個位呀？

從另一段錄音中聽到芷希大叫：「我平時瞓主人房，平時瞓入面㗎！佢做乜瞓咗我個位呀？！！！」之後有把男聲（估計是GooChan）則表示：「喊無用㗎，咁搞遲早報警。」芷希的女友人就對GooChan說：「叫佢（妹豬）出嚟啦！你叫佢離開先啦，我哋執埋啲嘢就走㗎喇。」但男方一直維護妹豬：「我唔想你地嚇親佢呀。」

芷希續崩潰咆哮：「你叫佢出嚟啦！嚇親佢？受保護動物呀？我都承受好多嘢！佢會嚇親，我都嚇親！我都嚇親呀！X你老X！嚇親佢！邊個喺度呀？！」當芷希在大罵時，就聽到妹豬表現得好驚慌，不停發出哭泣聲。

GooChan︰辜負了你對我七年真誠的感情和陪伴

GooChan出軌斷正的片段在網上瘋傳，今早凌晨時分，他在社交網發文道歉表示：「對不起，現在就網絡流傳有關本人的片段作正式回應，向芷希再次鄭重道歉，我辜負了你對我七年真誠的感情和陪伴。由我一無所有的時候開始，無論生活如何艱苦，都一直在身邊扶持著我。而我竟然不懂珍惜，親手斷送了你的幸福，對你造成了無法修補的傷害，對不起。」

他續指：「本人將會承擔起責任，即日起無限期退出幕前工作。往後不會再對此事作任何回應，亦承諾絕不會作出傷害別人的行為。最後，很抱歉因為我的私事影響了大家，想向所有受影響的朋友、工作夥伴及大眾說一句，對不起。
GooChan 21/4/2025。」

網民都紛紛留言鬧爆GooChan渣男行為，並立即unfollow及將其歌曲於playlist移除。其實，芷希早於2月已經宣布同GooChan分手，芷希當時表示：「接受呢段佔咗人生四份一有餘嘅感情要結束，並唔容易。事件發生得太突然。」但估計捉姦事件是於年頭發生的。