共和榜榜主討論區

-Prince-

呢度會提供一個平台比各榜主及表同討論任何有關CM共和榜既野
而呢度既討論結果會因應情況影響我地不定期投票既選項設定

然而由於未能因應各榜主而設置有效既會員權限
要留意大家既留言都會對所有其他會員公開
惟此做法都可以提升共和榜既透明度

此帖只作討論用途 投票事項仍會沿用舊有PM方法

-Prince-

由於近年唱片行業市道唔景氣
玩法唔同哂 而同時令到新人既準則愈黎愈模糊

暫時粗略screen左一堆有機會候選新人獎既歌手:
小塵埃
V.N.P.
新青年理髮廳
田蕊妮
C-12
SiS 樂印姊妹
Yukilovey
鍾舒祺
鄭俊弘

而之後我地將會設定一堆有效既新人準則
所以會想係呢度收集大家既意見 之後再得出幾個方案比大家投票
而我地既投票結果將會係之後繼續沿用
當然 如果以後市場情況有變 有需要可以再投票

rIcKyK

我覺得只要係第一次派中文歌黎香港媒體既就可以成為候選新人
不過每個單位就只可以有一次候選機會
如果第一年齋出歌但又唔夠分拎獎
即使去到第二年有出碟兼且又夠分
佢都唔會再有候選新人既資格

所以睇翻 #2 既 LIST
應該全部單位都合乎資格
而如果李榮浩能夠係今年之內上到共和榜
因為佢第一次係香港 PLUG 歌
所以佢都會合乎上述資格 可以候選新人獎

唔知大家又有咩睇法呢?

kwanie

我就好守舊既~ 唔出碟唔洗諗有獎

Yukilovey 幾時出碟呀

CunninG

首先回應番個list
當中有幾個單位我對佢地既新人身份比較有保留

1) C-12係咪一個新組合?
如果佢好似PING PUNG既性質係一個樂隊, 某情度上我可以接受佢地係新組合
但如果我地將C-12定位做關心妍既分身, 個情況就好似阿密特同張惠妹咁,
我會當佢係關心妍既一個side project

2) 鍾舒祺2010年就推出左第一張專輯, 只係無plug去香港
同樣既example我諗起Gin Lee, 09年首張個人專輯, 11年首次plug歌去香港

至於講到有咩新人準則
我諗我會分三TYPE新人
1) 今年派台今年出碟
好似SIS, 無咩爭議一定計

2) 今年有派台但來年出碟
相信會係Yukilovey, 過往例子有AGA
但建基於新既玩法同埋數碼專輯既出現
而佢地又有多於一首派台歌, 我會COUNT佢地係新人

3) 過去有派台歌但今年先出碟
例: 田蕊妮, 有會員話佢好耐之前有PLUG過歌- -
咁如果好似薛凱琪咁, 03年尾PLUG首XBF, 咁我地又計唔計佢做03年新人定04年新人?
呢個問題會唔會牽涉到我地定義新人既時刻呢?

~小Twins妹~

C12唔算新人，A-MIT都唔計啦，唔通改個名又當一次新人？

個人「新人」定義係今年首度出碟，NO MATTER數碼碟定實體碟

kenny1102

其實本身都支持出到碟先當新人，不過加下市度咁不景氣。
難免真係會有d出歌唔出碟既歌手出現。

所以都傾向認同有派台歌就當新人。
但又要解決如果有歌手好似fifi 03年12月就plug歌，04年先出碟呢d情況。
套返今時今日既情況，大家又點睇？

另外當年蔡一傑用自己身份唱碟903都計佢新人，
咁歌手用另一個身份出歌什至唱片，大家又點睇？

akk

個人認為準則應該係:
1) 今年第一次出碟/未出碟
2) 之前未拎過新人獎

至於c12, 我同意cunning
可能要case by case咁投

powerful

而家有三種情況:
上一年派左歌，下一年會出碟 (Yukilovey 有機會2014年唔出碟)
上一年出左碟，下一年先派歌 (新青年理髮廳 2013年出碟，2014年派歌)
派左單曲但唔會有專輯

我覺得新人定義應該係:
1. 第一次派中文歌到香港;
2. 全年有多於一首派台歌

提出第二項原因係好似VnP同鍾舒祺其實只得半首歌，今年計新人令佢地冇左出年候選資格，有少少唔公平，不過先旨聲明，我自己個榜就係未出過碟既第一年有歌上榜，就可以當新人計，大家都可以參考下。

至於 C-12，要睇下到底呢隊個定位係咩，如果係組合形式，咁係新人; 如果係張惠妹 (阿密特) 分身就唔應該計。

張少

我就第一年出碟當新人
當然個人榜同cm榜可以有唔同準則

至於市道唔好出少左碟既問題
如果無出實體cd、又或者無出digital cd都當新人
咁如果網絡歌手有歌出，咁又當唔當新人？

-Prince-

做番個小總結先 同埋都包括左一堆新既引伸問題

大議題

1. 今年已經有多過X首派台歌但來年或之後先首次出碟 計唔計算為今年新人?
2. 過去已經有多過X首派台歌但今年先首次出碟 計唔計算為今年新人?
Prince - 惟每個歌手只會有一次候選機會

引伸問題

3. 出碟 - 實體album/ep 當然計算, 以下情況又如何?
    i) 合輯出版過歌曲? (例子: 黃浩琳上年度以平原集作身份實體出版過兩隻派台歌)
    ii) single? (ep 又要包幾多隻歌先計算?)
    iii) digital cd?
Prince - 以上問題 可能以新碟包括幾多隻歌曲 (如兩隻或以上?) 作為一個客觀準則?

4. 派台歌 - 以下情況又如何?
    i) 以前係香港派過英文/外語歌 (例子: 小塵埃)
    ii) 以前出過碟但今年首次於香港派台 (例子: 李榮浩 李幸倪 新青年理髮廳)
    iii) 以前網路出過歌但今年首次有派台歌
Prince - 個人唔傾向Q4i合資格 如果GD/LADY GAGA派華語歌就有資格候選? 或者外語派台歌同時受限於本人Q5提出的派台歌定義限制 咁通過Q4i都可以接受

5. 新人年份
    i) 以往有派台歌未出碟 但今年先正式以新人身份派歌 (例子: 薛凱琪 田蕊妮)
    ii) 第一年派一隻 第二年派兩隻 第三年先出碟 假設新人定義係派台至少三隻 該新人第二年既時候又當唔當係新人?
Prince - 可考慮以派台歌數目去限制? 如由"出道"以來以個人身份累積不超過兩隻派台歌就不視為新人 (仍受制於Q1/Q2投票結果)

6. 新人身份定義
    i) 組合之後單飛 重新出發 (例子: 蔡卓妍 鍾欣潼 盧凱彤 林二汶)
    ii) 個人歌手 之後組新團體 (例子: Ping Pung)

7. 其他問題
網絡歌手有歌出，咁又當唔當新人？
Prince - 共和榜始終受限於派台歌榜規 惟如無派台但成功打入共和榜榜單 年結時亦可視為有派台歌 (惟受制於Q2及Q4iii投票結果)

歡迎大家再比意見 或者再提出其他引伸問題
唔該哂!

p.s. 如有共和榜榜主下年唔玩共和榜 可以預先通知我~

-Prince-

>C-12，要睇下到底呢隊個定位係咩 (組合形式或者分身)

頭先睇過c-12分數太低 唔會影響賽果 為節省時間及集中討論 所以不會在此費時為c-12定性

powerful

做番個小總結先 同埋都包括左一堆新既引伸問題

大議題

1. 今年已經有派台歌但來年或之後先首次出碟 計唔 ...
-Prince- 發表於 2014-12-14 16:14

其實《多管閒事》係2013年有實體發行過，所以新青年理髮廳係屬於 4. ii) 組別架。

基於CM共和榜只有中文歌可上榜，如果以前派過外語歌既單位不計新人，咁佢地係永遠無機會競逐呢一個獎項，對於以外語市場為主既歌手而言當然冇問題，但好似小塵埃咁，今年先有屬於自己既第一張有中文歌既專輯，冇得參選新人係完全唔合情唔合理。

另外，大議題 1. 係咪應該加上一項，今年已經有多於一首派台歌但來年出碟? 因為好似薛凱琪03年派過XBF，但04年出碟仍奪得CM共和新人獎 ╴放係今年黎講，應該點計?  呢個係第五題但會同第一題答案出現衝突。

-Prince-

其實《多管閒事》係2013年有實體發行過，所以新青年理髮廳係屬於 4. ii) 組別架。

基於CM共和榜只有中文歌可上榜，如果以前派過外語歌既單位不計新人，咁佢地係永遠無機會競逐呢一個獎項，對於以外語市場為主既歌手而言當然冇問題，但好似小塵埃咁，今年先有屬於自己既第一張有中文歌既專輯，冇得參選新人係完全唔合情唔合理。

另外，大議題 1. 係咪應該加上一項，今年已經有多於一首派台歌但來年出碟? 因為好似薛凱琪03年派過XBF，但04年出碟仍奪得CM共和新人獎 ╴放係今年黎講，應該點計?  呢個係第五題但會同第一題答案出現衝突。
powerful 發表於 2014-12-15 00:07

修正左新青年理髮廳個CASE同因應以下更新左個舊帖

其實同意你既觀點 不過如果有主打本地既單位 但係開頭幾年一直都係派外語歌曲 之後先派華語歌曲又如何
會唔會以派台歌作限制會更好? 以前已經出左一隻全外語碟就無辦法啦 如果之前只係派左外語歌但係數目唔超過一定數目 (e.g. 2 or 3) 就仍然有候選資格 你又點睇?

第一/二係大部份情況下應該係唔可以同時發生
我相信有部份榜主會比較注重出碟既年份 而其餘既榜主決定揀一定二既考慮我相信會係派台歌既數目
第五題就去決定以幾多隻派台歌為限 當我地有共識下 就可以將個大議題定位去投票:

1. 今年已經有多過X首派台歌但來年或之後先首次出碟 計唔計算為今年新人?
2. 過去已經有多過X首派台歌但今年先首次出碟 計唔計算為今年新人?

頭先就再諗到一個case 其實有d似yellow! 第一年派一隻 第二年派兩隻 第三年先出碟 假設新人定義係派台至少三隻 該新人第二年既時候又當唔當係新人?

powerful

修正左新青年理髮廳個CASE同因應以下更新左個舊帖

其實同意你既觀點 不過如果有主打本地既單位 但係開頭 ...
-Prince- 發表於 2014-12-15 00:34

講真好多時候一個新人既出碟計劃都好多變數，押後同提前都會有，好難預計佢下年出唔出碟，真係唯有睇佢地累積派台歌既數目，或者累積夠一個數目 (e.g. 兩首) 就可候選，但當然以出第一張專輯作優先計算啦。即係派台第一首歌同出第一張碟係同一年就一定係新人，有差異就以其派第二首歌既年份計算，但第一張碟既定義一定要係個人身份完整成品 (非實體或EP或single亦可) 而非合輯。

John

我本人支持用最守舊/傳統做法, 就係「出個人專輯」去量度一個單位是否新人

我覺得優先原則係容易量度, 出個人碟係最易計算既
如果用派歌, 就會有好多歧異問題,
例如唔關事既人失驚無神唱隻歌仲派台算唔算做左新人呢? (佘詩曼2003, 廖碧兒2007, 周秀娜2010, 陳淑莊2012)
出過合輯又計唔計呢? (田蕊妮1994, 黃浩琳2013)
究竟派幾多隻歌先叫新人呢? (薛凱琪2003, 王菀之2004, 麥家瑜2008)
派過英文歌未派過中文歌計唔計呢? (衛蘭2004, 小塵埃2013)
甚至有d人未派歌已經以歌手身份獲得認識? (羅力威2009, 鄭俊弘2013)

相反, 出個人碟既時候, 第一樣野係個人本身有意投入歌唱事業(徐子珊？), 第二樣野係有關方面通常都會落力宣傳,
我用例子答, 就算最擲界既「麥家瑜」, 第一首歌"殺死我的溫柔"係08年, 但佢09年尾先出碟, 環球一樣會係09年嘗試推佢隻"不方便的真相", 出碟前亦有派一隻"南青山上", 即係話新人首次出碟唔會無聲無色, 就算係黃浩琳, 今年出碟都有另外再力谷過"凡星"
相反首次出歌就可能根本冇人知佢出過, 例如03年既XBF, 04年既想飛/In love again, 13年既顏培珊等等, 雖然佢地係第一次出歌, 但如果根本得極少數人聽過, 對大部分人黎講佢地唔係新人咁簡單, 而係陌生人

當然有部分人係出過好多隻歌, 有認真派歌都冇出碟, 例如2014年既Yukilovey, 2008年既麥家瑜
但我相信佢地好多時等到出碟都會谷第二輪既, 只係冇咁新姐, 但新人既歌都會包含係出個隻碟入面, 都可以算係debut album

至於組合單飛(e.g.Cookies vs Ping Pung vs 吳雨霏), 改名出碟(e.g.張愷憧vs張佩金vs張寧), 已經係另一回事了
我傾向單飛當新人, 純粹為方便/容易量度

-Prince-

投票結果
1. 歌手單位需要於該年度首次發行個人專輯才符合資格候選新人
2. 曾經出版個人專輯但於該年度首次於香港派歌並不符合資格候選新人

本年度CM共和榜合資格既新人為:
C-12 (如視作團體計算)
SiS 樂印姊妹
小塵埃
田蕊妮
黃浩琳
鄭俊弘

kenny1102

其實定左邊日係頒獎禮未???

-Prince-

公佈返投票結果
- 2014年起頒獎禮共和大碟照樣頒三隻 不過有三隻上榜歌或以上既限制

gcgoobi

事項五
榜分計算
現時機制為 3-12分 計十甲
榜主會否考慮將冠亞季嘅得分比重提高?


2分榜分是我係03年提議的，目的是減少極少數榜主控制cm榜的情況
Eg. 4個榜主一齊冠=48分； 等如16榜主同時第十位才可同分。
而排名已考慮最高名次，即已反映冠亞季之重要性

John

事項五
榜分計算
現時機制為 3-12分 計十甲
榜主會否考慮將冠亞季嘅得分比重提高?


2分榜分是我係03年提議 ...
gcgoobi 發表於 2016-12-16 00:39

我都認為如果提高三甲分數
會更加容易出現四榜甚至三榜歌既情況

假設其他位置不變, 第三變11, 第二變13, 第一變15 (應該係最輕微調高三甲比重既情況)
一冠一亞一季已經39, 係某d週數都唔係冇機會上榜

ed8671ed

事項三

新人呢個問題我覺得經過兩年時間有需要再檢討
行單曲制基本上係大趨勢
一年內可以出到碟嘅歌手已經唔算多，更何況係新人
以今年為例，暫時只有剛剛出實體EP嘅鄧小巧同出digital EP嘅王嘉儀合資格候選 (咁當然今年我亦只係數到有呢兩位新人上到榜)

上年嘅Jude，佢冇出碟唔計新人，今年都冇出碟亦都唔計新人
如是者如果佢將來一兩年都唔出碟，以一個出道三四年嘅歌手黎講，仲稱唔稱得上係一個新人呢？
再例如2014年嘅Yukilovey，全年派台歌有4首但翌年出碟，
結果2015年憑2首屬於2016年新碟嘅上榜歌而得到新人獎，
我認為咁樣反映唔到佢以新人身份出道/推出第一張作品嘅成績

所以我覺得修改共和榜對新人嘅定義有一定嘅應然性
例如可以以出道年份要有最少兩首派台歌嚟做定義唔知可唔可行？

大家可以討論下 :)

kwanie

其實今年上過榜既疑似新人單位有幾多

CunninG

事項三

新人呢個問題我覺得經過兩年時間有需要再檢討
行單曲制基本上係大趨勢
一年內可以出到碟嘅歌手已經 ...
ed8671ed 發表於 2016-12-21 23:29

同意我建議除左保留現有新人定義(於當年出碟)
同時亦考慮新人是否於當年有派台作品
例如於同一年有多於一首派台歌亦可視為新人

只要歌手達到其中一個條件即成為該年度新人
過往已成為新人者則不會再視為新人

powerful

事項三
可考慮，如果冇出過碟，該新人於本年度或之前累積派台不少於三首獨唱歌曲即合資格候選新人。

事項四
樂隊應該列入唱作人，否則可考慮增設樂隊獎項以作分別。
曲詞不應作雙計。

事項五
同意gcgoobi

臨走前既最後建議

表妹保莉

其實新人的定義真係要更新一下，
現時有好多新人要會遲一年出碟甚至唔出實體碟，
所以我會同意如果位新人該年出現過兩首派台歌則當作該年新人

John

同意我建議除左保留現有新人定義(於當年出碟)
同時亦考慮新人是否於當年有派台作品
例如於同一年有多於一 ...
CunninG 發表於 2016-12-23 10:17

同意若改制，都應該保留雙軌制
否則好似今年王嘉儀/2010年林奕匡，因為太遲派歌所以得一首歌但又出左碟，又會造成尷尬情況

-Prince-

多謝咁多位有投票既榜主

公佈番投票結果

2016年及以後新人準則投票
B. 雙軌制 即該單位該年度首次發行個人專輯或最少兩首派台歌即符合新人資格

John

大家今年有冇野想討論
掛住各位榜主

CunninG

想問下一個以女人和浴室 同埋 一個男人 一個女人 和浴室應該當一首歌定分開計
我自己prefer分開計因爲兩首靈既旋律同歌詞唔係完全相同
想睇下大家點睇
如果大家決定當一首歌計，我唔會兩首同時上

kwanie

分開 !!

CunninG

另外除左一個女人
我地係咪都應該討論下eason and the duo band 同陳奕迅點計?
大家都知Eason新碟既歌一時會落陳奕迅, 一時會落eason and the duo band
但暫時所知其實佢今年既歌都會係同一隻碟收錄
咁我地應唔應該當佢地係同一個單位計?
而另外eason and the duo band應該當番男歌手定組合?

chanchan0909

另外除左一個女人
我地係咪都應該討論下eason and the duo band 同陳奕迅點計?
大家都知Eason新碟既歌一時 ...
CunninG 發表於 2018-11-11 10:44

我都有同樣嘅疑問 !
定係睇佢最後專輯推出嘅時候會用咩名義收錄 ?

kwanie

其實好似得903 係當可一可再係 "eason and the duo band" 咁落CREDIT
其他台都唔係

-Prince-

想問下一個以女人和浴室 同埋 一個男人 一個女人 和浴室應該當一首歌定分開計
我自己prefer分開計因爲兩首 ...
CunninG 發表於 2018-11-10 15:26

我諗呢個case比較清晰
因為曲詞編唱都唔同原版 所以應該分開計
不過如果大家有唔同意 到時睇情況投票

Wonders

Hello 今次我想講一講同關注共和唱片呢個獎 因為共和唱片起CM頒獎禮亦有一定份量

由2003年創榜開始到2010年每年都會頒一隻最高榜分既專輯成為共和唱片
直到2011年開始新制度下將共和唱片增設為金、銀、銅獎，而當中每年都有三隻榜分最高既專輯得獎
唔經唔覺呢個制度都運行咗八年

隨住本地樂壇每年推出既大碟越黎越少既關係 推出市場既專輯質素亦有一定程度落差下

我想提議黎緊

1. 全面檢討由本年度開始頒獎禮共和唱片一項中是否仍有需要再分金銀銅咁頒三張專輯

ed8671ed

Hello 今次我想講一講同關注共和唱片呢個獎 因為共和唱片起CM頒獎禮亦有一定份量

由2003年創榜開始到2010 ...
Wonders 發表於 2019-12-13 17:46

都有道理 畢竟要符合得獎資格係要3首上榜歌
近幾年最後符合資格嘅碟其實都唔過10隻
我諗今年可能更少

可以睇下其他榜主sss有冇咩睇法

CunninG

Hello 今次我想講一講同關注共和唱片呢個獎 因為共和唱片起CM頒獎禮亦有一定份量

由2003年創榜開始到2010 ...
Wonders 發表於 2019-12-13 17:46

我都同意cut到得番一個

chanchan0909

同意 cut 淨 1 個 , 一黎合乎資格嘅越黎越少 , 二黎係好多碟都係儲夠歌先出
而且要符合我地有 3 首上榜歌嘅資格 , 分分鐘有啲所謂嘅專輯連三首新歌都唔知有無 , 所以都無必要再頒 3 隻

雖然減至 1 個係目前較好嘅辦法 , 但其實呢個獎嘅規則都限制左我地好多
比如因為行開計榜分模式 , 所以三首新歌起碼要派同埋要喺每個禮拜榜單嘅前十名 , 難度好高
就以今年黎睇 , 淨係數左最近十周 , 有四周都係 未出碟單曲 > 出碟單曲
而且出碟單曲裡面有唔合乎資格嘅專輯 , eg《LMF 2009-2019 EP》裡面就只得二零一九呢首唯一新歌
然後有啲派夠數嘅但又唔係首首上到 , eg《Little By Little》《為藝術犧牲》《超級市場伴奏上集》《METABOLISM》...
出左全新大碟但派唔夠又有 , 年尾至出第一 plug 同出新碟 ... 都有好多呢啲例子

所以扣扣埋埋其實每個禮拜可能平均只得兩三首合乎資格嘅出碟單曲上到榜
就做成左合乎資格嘅專輯好少 , 呢個就未必係因為專輯數量太少令到我地好少候選專輯
而可能係我地個規則好高要求 , 令到大量專輯連候選嘅機會都無

所以考慮到專輯 製作時間嘅延長、派台數目、上榜難度 同埋 推出時間 等等嘅問題
我會比較希望呢個獎會脫離計分類

ed8671ed

同意 cut 淨 1 個 , 一黎合乎資格嘅越黎越少 , 二黎係好多碟都係儲夠歌先出
而且要符合我地有 3 首上榜歌嘅 ...
chanchan0909 發表於 2019-12-18 14:54

我數過其實要符合資格 今年只會有5隻碟可以競逐...
如果用遴選方法其實都可以考慮
不過我認為點都要同個榜掛鈎返 唔係就會變咗每個榜主推一隻 同聯頒唱片冇分別

要同個榜有關係 我認為可以降低入閘門檻 例如最少兩首上榜歌
可以擴大返候選量 頒獎亦都可以維持返頒三甲

有兩個可能性去實行到遴選做法
1. 評分制：每位榜主向每隻碟評分 say 1-10分 之後計total
但我個人認為呢個做法太複雜同花時間

2. 投票制：可以係每位榜主投3隻碟 之後最高票就係年度唱片
再複雜少少就排埋1-3名計分
呢個方法就相對容易啲

chanchan0909

我數過其實要符合資格 今年只會有5隻碟可以競逐...
如果用遴選方法其實都可以考慮
不過我認為點都要同個榜 ...
ed8671ed 發表於 2019-12-20 21:35

yes , 如果呢個獎唔睇榜分 , 而係睇上榜數目而得到資格再比大家揀
規限嘅範圍少左好多 , 咁樣得到資格都無咁難 , 解決左大部分嘅問題 , 係一個好方法 , 暫時我都會 prefer 2 !

-Prince-

公布番投票結果先

共和男女歌手組合三甲 - 條件維持現狀 無上榜歌曲數量限制
共和大碟獎 - 只頒發一張

-Prince-

大家點睇共和派台歌包唔包埋本地歌手既非華語派台歌呢

bagfgfcde

大家點睇共和派台歌包唔包埋本地歌手既非華語派台歌呢
-Prince- 發表於 2020-3-21 22:37

睇唔到有任何原因反對
好多香港獨立音樂人都係用英語演唱
例如係為 Serrini 編曲既 Olivier Cong
或者係香港好出名既獨立樂團 GDJYB
早就應該開放埋俾佢地參與
但因為以前唔知有乜英文歌有派台 所以唔成事

而家 my903 同新城會出埋派台既英文歌
以前唯一既concern都冇埋
改制係好合情合理

唯獨係本地歌手定義有少少含糊
好似李幸倪既英文歌唔知當唔當埋一份好

chanchan0909

大家點睇共和派台歌包唔包埋本地歌手既非華語派台歌呢
-Prince- 發表於 2020-3-21 22:37

好想好想呀 !
香港樂壇嘅製作唔淨止只係製作廣東同國語歌，仲有英語，可能台語、韓語同日語都有
既然都係本土嘅派台歌，點解唔可以有同等待遇呢 ?

chanchan0909

睇唔到有任何原因反對
好多香港獨立音樂人都係用英語演唱
例如係為 Serrini 編曲既 Olivier Cong
或者係 ...
bagfgfcde 發表於 2020-3-21 22:48

Gin Lee 呢個真係唔知點定義
所以我希望埋如果華語區嘅其他語言都可以計埋，咁可能可以解決埋呢個問題

我睇過暫時 2020 嘅第一季有 7 首本地派台嘅非華語作品
而除去本地，華語區嘅非華語作品就暫未有派黎香港，以往數量都唔多
但其實都間中都會有公司幫歌手派台，如主打英語嘅 Joanna Wang 都會派歌
所以我覺得反正數量唔多嘅情況下，呢個範疇試下包埋都無壞
最緊要係可以比到更多值得大家支持嘅歌上榜 !

ed8671ed

Gin Lee 呢個真係唔知點定義
所以我希望埋如果華語區嘅其他語言都可以計埋，咁可能可以解決埋呢個問題

我 ...
chanchan0909 發表於 2020-3-21 23:04

我同意係華語區嘅都計
因為香港以外派埋外語嚟嘅 可能全年一隻手都數得晒

其實本身就好應該接受埋英文歌
香港係行兩文三語架
冇道理接受到國語歌 反而接受唔到英文歌囉

仲有一個問題 可能太長遠
如果同一首歌有廣東話版同英文版派台
計分係咪當同一首定分開?

chanchan0909

我同意係華語區嘅都計
因為香港以外派埋外語嚟嘅 可能全年一隻手都數得晒

其實本身就好應該接受埋英文歌
...
ed8671ed 發表於 2020-3-21 23:31

可能以前主打華語市場 ? 歌手出碟出完廣東出國語，出完國語出廣東
係好似上個年代開始多元化左，不過我地真係算發現得遲啦

一曲同時有廣東話版同英文版方面，我覺得會係計兩首歌，就似 Ellen 嘅「光」以及「光之外」咁嘅形式去計

bagfgfcde

華語我冇乜所謂
不過本土歌手既英文歌就好應該包含在內

JasOh103

Gin Lee 呢個真係唔知點定義
所以我希望埋如果華語區嘅其他語言都可以計埋，咁可能可以解決埋呢個問題

我 ...
chanchan0909 發表於 2020-3-21 23:04

Gin Lee唔需要諗點定義
唱乜語言都冇乜機會夠分上榜